કભી કભી – દેવેન્દ્ર પટેલ

• મનજીતની દુકાને એક દિવસ મીનુ અરોડા નામની યુવાન વિધવા આવી

હરિયાણાના સિરસા જિલ્લાનું નટાર ગામ. આ ગામના વતની સતપાલસિંહ અને મનજીતસિંહ- એ ભાઇઓએ સિરસાના જનતા ભવન રોડ પર પેસ્ટિસાઇડસની એક દુકાન ખોલી હતી. સતપાલસિંહ વેપાર કરતો અને મનજીતસિંહ જમીનો તથા મકાનોની લે-વેચના દલાલ તરીકે કામ કરતો હતો. બંને ભાઇ પરણેલા હતા. મનજીતસિંહનું લગ્ન અમરજીત કૌર નામની મહિલા સાથે થયું હતું. લગ્ન બાદ અમરજીત કૌર બે બાળકોની માતા પણ બની હતી. મોટી દીકરીનું નામ નવદીપ કૌર અને નાનકડા દિકરાનું નામ સહજપાલ રાખવામાં આવ્યું હતું.

એક દિવસ મનજીતસિંહ એકલો જ દુકાન પર બેઠેલો હતો. એવામાં એક મહિલાએ આવીને કહ્યું : ‘મારે મનજીતસિંહને મળવું છે.’

મહિલાનો મધુર અવાજ સાંભળીને મનજીતસિંહ ભાવવિભોર થઇ ગયો. એણે દુકાનમાં એક નાનકડી કેબિન બનાવી રાખી હતી. એ આવેલી મહિલાને તેની કેબિનમાં લઇ ગયો અને કહ્યું : ‘બોલો મેડમ! શું સેવા કરી શકું?’

મહિલાએ કહ્યું: ‘મારું નામ મીનુ અરોડા છે. મારે એક મકાન વેચવું છે. કેટલાક સમય પહેલાં મારા પતિનું અકસ્માતમાં મૃત્યુ થઇ ગયું હતું. એ મકાન માટે અમે લોન લીધી હતી. પણ હવે હપતા ભરી શકાય તેમ નથી. તેથી મકાન વેચીને મારે બેંકની લોન ભરી દેવી છે.’

મનજીતસિંહ એક યુવાન વિધવાને તાકી રહ્યો. તેની નજર મીનુના અંગઉપાંગો પર હતી. મીનું આકર્ષક લાગતી હતી. મનજીતસિંહે કહ્યું : ‘કામ થઇ જશે પણ એ પહેલાં મારે તમારું મકાન જોવું પડશે. ક્યારે મકાન બતાવશો.’

‘આજે જઃ’ મીનુ બોલી. એમ કહી મીનુ એના ઘરનું સરનામું આપી સાંજે એના ઘેર આવવાનું નિમંત્રણ આપી જતી રહી. મનજીત મીનુની પીઠને જોઇ રહ્યો.

સાંજે મનજીત સમયસર મીનુ અરોડાના ઘેર પહોંચી ગયો. મીનુ વિધવા હતી પણ સરસ રીતે શ્રૃંગાર સજીને બેઠી હતી. મીનુએ મનજીતને આવકારતા કહ્યું : ‘શું પીશો?’

મનજીતે કહ્યું : ‘એટલી જલ્દી શું છે? આવ્યો જ છું તો બેસવા તો દો ને. મારી પાસે તો સમય જ સમય છે!

‘એ તો બહુ સારું. બે કલાક બેસો તો પણ મને વાંધો નથી.’ મીનુએ મનજીતની આંખોમાં આંખ પરોવતાં કહ્યું. એ પછી મકાનની વાત ચાલી. મીનુએ કહ્યું. ‘મારા પતિના મૃત્યુ બાદ હવે હું એકલી રહું છું.’ બસ આ મકાન વેચાઇ જાય એટલે નિરાંત.’

‘મકાન વેચાઇ ગયા બાદ શું કરશો?’

‘ખબર નથી. હું તો સાવ એકલી છું. બીજું લગ્ન કરી લઇશ.’

‘એટલા રૂપિયા હું લાવીશ ક્યાંથી?’ મીનુ બોલી.

મનજીતે પાસો ફેંકતા કહ્યું : ‘જેની પાસે રૂપનો ખજાનો છે તેણે રૂપિયા શોધવાની ક્યાં જરૂર છે?’

‘આવું ઘણા લોકો કહે છે પણ કોઇ હાથ પકડતું નથી.’

મનજીતે મીનુ અરોડાનો હાથ પકડી લેતાં કહ્યું: ‘લ્યો, મેં આ તમારો હાથ પકડી લીધો.’ કહેતાં મનજીતે મીનુનો હાથ પકડી લીધો.

મીનુએ હાથ છોડાવતાં કહ્યું : ‘આટલો જલ્દી?’

‘ધરમના કામમાં ઢીલ શી?’ મનજીતે મીનુનો હાથ ફરી પકડયો.

મનજીતે કસમ ખાધા અને મીનુ અરોડાને પોતાની કરીબ ખેંચી લીધી. મનજીતે કહ્યું: ‘તમારા મકાનના બધા હપતા હું ભરી દઇશ.’

અને મીનુ અરોડાએ પોતાની જાત મનજીતને સોંપી દીધી. મનજીત પણ મીનુની પરવાનગીથી પોતાની જાતને ભાગ્યશાળી સમજવા લાગ્યો. પતિના મૃત્યુ બાદ આમેય તે આવા સ્પર્શથી બેહદ વંચિત હતી. એ સાંજે મનજીત મીનુ અરોડાના ઘેર જ રોકાઇ ગયો. રાત્રે એણે ત્યાં જ દારૂ પીધો અને ત્યાં જ સૂઇ ગયો. આ તરફ મનજીતની પત્ની અમરજીત કૌર અને મનજીતનો ભાઇ આખી રાત મનજીતને શોધતા રહ્યાં. સવારે તે ઘેર પહોંચ્યો ત્યારે એક મિત્રના કામે બહારગામ જવું પડયું તેવું ગપ્પુ મારી દીધું.

હવે રોજ સાંજે મનજીત મીનુ અરોડાના ઘેર જવા લાગ્યો. દિવસે પણ ત્યાં જ પડી રહેવા લાગ્યો. દુકાન પણ બરાબર ચાલતી નહોતી. ઘરમાં પૈસાની તંગી શરૂ થઇ ગઇ. આ તરફ મીનુ અરોડાના મકાનના હપતા મનજીત જ ભરતો હતો. મોડી રાતે ઘેર આવતા મનજીતને તેની પત્નીએ પૂછયું : ‘રોજ મોડા કેમ આવો છો?’

મનજીતે કહ્યું : ‘ધંધામાં મંદી છે. શું કરું? તારા પપ્પા પાસેથી સાત લાખ રૂપિયા લઇ આવ તો ધંધામાં રોકીએ.’ માલ લાવવા પૈસા જ નથી.’

અમરજીત કૌરે કહ્યું : ‘આપણાં બાળકો પણ રોજ સાંજે પપ્પા ક્યારે આવશે તેમ પૂછીને રડતાં રડતા સૂઇ જાય છે. મારા પપ્પા પૈસાવાળાં ક્યાં છે?’

મનજીતે કહ્યું : ‘તારા પપ્પા પાસે પૈસા નહીં તો આબરૂ તો છે ને! તેમને તો કોઇપણ વ્યક્તિ ઉધાર આપી દેશે. તું કાલે પિયર જાને, ડાર્લિંગ.’

પતિને મદદરૂપ થવાના ઇરાદે અમરજીત બીજા જ દિવસે તેના પિયર ગઇ. એણે તેના પપ્પાને બધી વાત કરી. તેના પિતા પાસે રોકડા રૂપિયા નહોતા પણ ચાર-પાંચ દિવસ પછી તેમણે ક્યાંકથી ઉછીના લઇને પાંચ લાખ રૂપિયા દીકરીને મોકલી આપ્યા. એ રૂપિયા આવતાં જ મનજીત સીધો મીનુ અરોડાના ઘેર પહોંચ્યો. બાકીના હપતા ભરી જે રૂપિયા વધ્યા તે મીનુ અરોડાને વાપરવા આપ્યા. થોડા દિવસ બધું બરાબર ચાલ્યું. હવે તો મનજીત રોજ દારૂ પીને ઘેર જવા લાગ્યો. અમરજીત કોરને ખ્યાલ આવી ગયો કે એના પતિને કોઇ સ્ત્રી સાથે આડો સંબંધ છે. એણે પતિને મોડા આવવાનું કારણ પૂછયું તો એ રાત્રે મનજીતે એની પત્નીને માર માર્યો. બાળકો પણ ડરી ગયાં.

આ તરફ મીનુ અરોડાએ પણ પ્રશ્ન ઊભો કર્યોઃ ‘ક્યાં સુધી આમ આપણે ગૂપચૂપ મળ્યા કરીશું? હું તમારી રખાત બનીને રહેવા માંગતી નથી.’

‘મારી સાથે લગ્ન કરી લ્યો.’

‘એની સાથે છૂટાછેડા લઇ લો.’ મીનુ અરોડાએ માંગણી મૂકી.

‘તો મને બીજે લગ્ન કરી લેવા દો.’

‘એ પણ શક્ય નથી.’ મનજીત બોલી રહ્યો.

મીનુ અરોડાએ મનજીતને આખરીનામું આપતા કહ્યું : ‘તમે તમારી પત્ની અને મારામાંથી એકની પસંદગી કરી લો. તમારે તમારી પત્નીને છૂટી ના કરવી હોય તો કાલથી મારા ઘેર આવશો નહીં.’

મનજીતને ખ્યાલ આવી ગયો કે મીનુ અરોડાએ અસલ સ્ત્રી-સ્વરૂપ ધારણ કર્યું છે. તે કોઇપણ હદે જઇ શકે છે. મનજીત મીનુ અરોડાના પ્રેમમાં એટલો ગરકાવ હતો કે તે કોઇપણ સંજોગોમાં મીનુ અરોડા બીજા પુરુષને પસંદ કરી લે તે માટે તે જરા પણ તૈયાર નહોતો. બીજી બાજુ પતિની હરકતોથી અમરજીત કૌર પણ તંગ આવી ગઇ હતી. એને એને પડોશીઓને પણ ખબર પડી ગઇ હતી કે, મનજીત હવે મીનુ અરોડાના ઘેર જ પડી રહે છે. ફરી એકવાર ઝઘડો થયો. મનજીતે કહ્યું : ‘તને ખબર છે ને કે પૈસાના અભાવે મારો ધંધો ડૂબી રહ્યો છે.’

અમરજીત કોરે કહ્યું : ‘મને ખબર છે કે, પૈસા બધા મીનુ અરોડાના ઘરમાં જાય છે.’

એ સાંભળી મનજીત લ્હાય લ્હાય થઇ ગયો. એણે પત્નીને ફટકારી. અમરજીત કૌરે પણ રડતાં-રડતાં કહ્યું : ‘મને ગમે તેટલી મારશો પણ હું તમારો સામનો કરીશ. આજે જ મારા પપ્પા અને ભાઇને તમારા ધંધા વિશે જાણ કરું છું. કાલે પોલીસને પણ જાણ કરીશ.’

અમરજીત કૌરનું વિકરાળ સ્વરૂપ જોઇ મનજીત ઘરમાંથી બહાર નીકળી ગયો. ઘરમાંથી બહાર નીકળતાં પત્નીને ગાળો બોલતો હતો. જતાં જતાં એ બોલ્યો હતો : ‘હું તને જોઇ લઇશ.’

અમરજીત કૌરે તરત જ તેના ભાઇને ફોન લગાવી પતિના મીનુ અરોડા સાથેના સંબંધની અને પોતાને મારી નાંખવાની બધી વાત કહી દીધી. તે પછી તેણે જલદી આવી જવા કહ્યું: અમરજીતનો ભાઇ રણધીર કોઇના મૃત્યુ પ્રસંગે બેસવા ગયો હતો. એણે કહ્યું:’હું કાલે આવી જઇશ, તું ચિંતા ના કર.’

એ રાત્રે મનજીત મીનુ અરોડાના ઘેર પહોંચી ગયો. તા.૧૯ સપ્ટેમ્બર ૨૦૧૨ની એ રાત હતી. એ રાત્રે એણે મીનુ અરોડાના ઘેર દારૂ પીધો. અમરજીત કૌરે તેને આપેલી ધમકીની વાત એણે મીનુ અરોડાને કરી. મીનુએ તેને કહ્યું. ‘હું કાંઇ ના જાણું. તમારે તમારી પત્નીનું જે કરવું હોય તે કરો અથવા મને છુટી કરો.’

એ રાત્રે મનજીત અને મીનુ અરોડાએ એક ખતરનાક યોજના ઘડી કાઢી. દારૂની ખાલી બાટલી લઇ તે પેટ્રોલ પંપ પર ગયો. પંપ પરથી તેણે બાટલીમાં પેટ્રોલ ભરાવી લીધું. રાતના બારેક વાગે તે પોતાના ઘેર ગયો. ઘરનું બારણું ખટખટાવ્યું. પત્નીએ બારણું ખોલ્યું. મનજીતે બારણુ અંદરથી બંધ કરી દીધું. છૂપાવી રાખેલી બાટલીનું પેટ્રોલ પત્ની પર ઢોળી લાઇટર પ્રજવલિત કરી અમરજીત કૌરના શરીર પર આગ ચાંપી દીધી, એણે બાકીનુ પેટ્રોલ બે નાનાં બાળકો પર પણ છાંટી તેમની પર પણ આ લાઇટર અડકાડી દીધું. અમરજીત કૌર અને બાળકો ભડભડ બળવા લાગ્યાં. ચીસાચીસ શરૂ થઇ ગઇ. લોકો જાગી ગયા. લોકોને જોઇ મનજીત પાછળના ઓરડામાં છૂપાઇ ગયો. થોડીવાર પછી તે પણ બહાર આવી રડવાનું નાટક કરવા લાગ્યો. અમરજીત કૌર અને બાળકો સખત રીતે દાઝી ગયાં હોઇ તે તમામ મૃત્યુ પામ્યાં.

બીજા દિવસે પોલીસ આવી અને મરનાર અમરજીત કૌરનો ભાઇ રણધીર પણ આવી પહોંચ્યો. એણે પોલીસને અસલી વાત કહી દીધી. પોલીસે મનજીત અને મીનુ અરોડાની ધરપકડ કરી.

www.devendrapatel.in

જેમ્સ બોન્ડની શ્રેણીની એક આખી ફિલ્મ મીડિયાના પાવર પર આધારિત હતી. મીડિયા હીરોને ઝીરો અને ઝીરોને હીરો બનાવી શકે છે. મીડિયા પાવરને કારણે અમેરિકાના પૂર્વ પ્રેસિડેન્ટ નિક્સને સત્તા ગુમાવવી પડી હતી. યાદ કરો, વોટરગેટ સ્કેન્ડલ. મીડિયાએ અમેરિકાના પૂર્વ પ્રેસિડેન્ટ બિલ ક્લિન્ટન અને મોનિકા લેવેન્સ્કિના સેક્સસંબંધોનો પર્દાફાશ કર્યો હતો. મીડિયાને કારણે દિલ્હી ગેંગરેપના કિસ્સામાં ફાસ્ટટ્રેક કોર્ટની રચના થઈ હતી અને ઝડપથી ચુકાદો આપી દેવાયો હતો. હવે પાકિસ્તાનમાં રહેતા ભારતના દુશ્મન નંબર -વન ડોન દાઉદ ઇબ્રાહિમને આ સમજાયું છે. ડોન પાસે બધું જ છે, પણ મીડિયા પાવર નથી. પાકિસ્તાનમાં BOL Channel નેટવર્ક જાણીતું છે. તેના માલિકો એક મીડિયા ગ્રૂપ છે. કહેવાય છે કે ડોન દાઉદ ઇબ્રાહિમ તેને ખરીદી રહ્યો છે.

BOLChannel આ વર્ષના અંત સુધીમાં તેનું પ્રસારણ શરૂ કરી દેશે. એણે સ્ટાફની ભરતી શરૂ કરી દીધી છે. અત્યાર સુધીમાં ૪૦,૦૦૦ અરજીઓ આવી ચૂકી છે. પાકિસ્તાનમાં અત્યારે ૪૦ જેટલી ન્યૂઝ ચેનલો છે. તે બધી જ દર્શકોને ખેંચી લાવવા સંઘર્ષ કરી રહી છે ત્યારે તેમાં હવે એકનો વધારો થશે. પાકિસ્તાનની ત્રણ ન્યૂઝ ચેનલો બંધ થવાની તૈયારીમાં છે ત્યારે BOL Channel તેના સ્ટાફને અત્યંત ઊંચાં વેતન ઓફર કરી રહી છે. માત્ર વેતન જ નહીં, રહેવા માટે લક્ઝુરિયસ ઘર અને લક્ઝરી મોટર કાર્સની પણ ઓફર કરી રહી છે. હાઈ પ્રોફાઇલ એન્કર્સ અને ટીવી શોના હોસ્ટસને બોડીગાર્ડ્સ પણ આપવામાં આવશે. પાકિસ્તાનના જિયો ટીવી ન્યૂઝ ચેનલના વડાને મહિને એક કરોડ રૂપિયાના વેતનથી રોકી લેવામાં આવ્યા છે, જે ભારતના ૬૦ લાખ રૂપિયા થાય. પાકિસ્તાનમાં ‘આજ કામરાન ખાન કે સાથ’ નામનો લોકપ્રિય શો ચલાવતા જિયો ટીવીના હોસ્ટ કામરાન ખાન જે માગે તે વેતન આપવા BOL Channel તૈયાર છે.

કહેવાય છે કે BOL Channel ની પાછળ બે મુખ્ય પાર્ટીઓ છે. એક તો ગેંગસ્ટર ડોન દાઉદ ઇબ્રાહિમ અને બીજી છે પાકિસ્તાનની નોટોરિયસ ગુપ્તચર સંસ્થા- આઈએસઆઈ. આઈએસઆઈનું આખું નામ ‘ઇન્ટર સર્વિસીસ ઇન્ટેલિજન્સ’ છે. જાણકાર વર્તુળો માને છે કે પાકિસ્તાનની હાલની પ્રાઇવેટ ન્યૂઝ ચેનલો હવે વધુ પડતી સ્વતંત્રતા ભોગવતી હોઈ સરકારી તંત્રની વધુ ને વધુ ટીકા કરતી થઈ ગઈ છે અને ખાસ કરીને પ્રશાસનમાં આઈએસઆઈની તે ખૂબ ટીકા કરે છે. આ કારણે તે પ્રાઇવેટ ચેનલોનો સામનો કરવા એક વધુ રોનકદાર ન્યૂઝ ચેનલ ચાલુ કરવી જોઈએ જે આઈએસઆઈની ટીકા ન કરે અને બીજી ન્યૂઝ ચેનલોને હંફાવી દે.BOLChannel અધિકૃત સ્પોન્સર કરાંચીસ્થિત એક્ઝેક્ટ ગ્રૂપના માલિકો છે. આ ગ્રૂપના સ્થાપક અને માલિકનું નામ શોએબ શેખ છે. આ કંપની આમ તો વાઇબ્રન્ટ સોફ્ટવેર હાઉસ સાથે સંકળાયેલ છે. ૫૦૦૦ જેટલા લોકો તેમાં કામ કરે છે. હવે એ કંપનીને ફાઇનાન્સ કરવા માટે ડોન દાઉદ ઇબ્રાહિમ આગળ આવ્યો છે. એ કંપનીને જરૂરી નાણાકીય સહાયતા કરવાનું કામ દાઉદ ઇબ્રાહિમે છોટા શકીલને સોંપ્યું છે.

એક બ્રિટિશ ન્યૂઝપેપરના અહેવાલ અનુસાર એક્ઝેક્ટ ગ્રૂપનો માલિક શોએબ શેખ મોટો કૌભાંડિયો છે, તેની કંપની વર્ષોથી ખોટાં કામો જ કરે છે. તેની સોફ્ટવેર કંપની ગેરકાયદે પોર્ન સાઇટ્સ ચલાવતી હોવાના આક્ષેપ થયેલા છે. યુવાનોને બનાવટી ડિગ્રી ર્સિટફિકેટ્સ પણ બનાવી આપતો હોવાના આક્ષેપ થયેલા છે. પાકિસ્તાનના મોટા ભાગનાં સોફ્ટવેર હાઉસીસ તેનાથી દૂર રહે છે,પરંતુ શોએબ શેખની કંપની કરાંચીમાં ઘણી મોટી વગ ધરાવે છે. તેની કંપની ‘એક્ઝેક્ટ’ પાકિસ્તાનની સલામતી સંસ્થાઓ સાથે પણ સંકળાયેલી છે. તેની સોફ્ટવેર લિંક પાકિસ્તાનની ગુપ્તચર એજન્સી સાથે જોડાયેલી છે. એ કારણે જ આઈએસઆઈ શોએબ શેખનો ઉપયોગ ન્યૂઝ ચેનલ ચાલુ કરવા માટે કરી રહી છે. એકઝેક્ટ તો કંપનીનું નામ છે, પરંતુ તેની ટર્ફ પર આઈએસઆઈ રમશે અને જરૂરી તમામ નાણાં ડોન દાઉદ ઇબ્રાહિમ પૂરાં પાડશે. કહેવાય છે કે શોએબ શેખની ‘એક્ઝેક્ટ’ કંપની આઈએસઆઈની સાયબર પ્રવૃત્તિ પણ ચલાવે છે. એ કંપની પાકિસ્તાનની ડિફેન્સ ઇન્ડસ્ટ્રી માટે પણ કામ કરે છે. એ કંપનીએ ડિફેન્સ હાઉસિંગ સોસાયટી પણ બાંધી આપી છે. આ વાત એક્ઝેક્ટ કંપનીએ ગૌરવપૂર્વક પોતાની વેબસાઇટ પર મૂકી છે.

આમ, પાકિસ્તાનમાં આવી રહેલી નવી ન્યૂઝ ચેનલનું બહારનું મહોરું એક્ટેક્ટ કંપનીનું છે, પરંતુ તેનો અસલી માલિક ડોન દાઉદ ઇબ્રાહિમ અને તેનું અસલી ભેજું આઈએસઆઈ હશે. બીજા શબ્દોમાં એમ કહી શકાય કે દાઉદ ઇબ્રાહિમનું હાર્ડવેર હશે અને આઈએસઆઈનું સોફ્ટવેર હશે. દાઉદ ઇબ્રાહિમ અત્યારે આઈએસઆઈની મદદ અને સલાહથી દુબઈમાં છે. અમેરિકાની બીકથી તેને દુબઈ મોકલી દેવામાં આવ્યો છે, પરંતુ તેનો પાકિસ્તાનમાં બિઝનેસ યથાવત્ છે. પાકિસ્તાનમાં તેનો કારોબાર અકીલ કરીમ ધેડી સંભાળી રહ્યો છે. અકીલ કરીમ કરાંચી સ્ટોક એક્સચેન્જનો મુખ્ય ખેલાડી ગણાય છે. દાઉદ ઇબ્રાહિમ દુબઈમાં હોઈ તેનું કરાંચીમાં ક્લિફટન એરિયા ખાતેનું ભવ્ય નિવાસસ્થાન હાલ ખાલી છે. અલબત્ત, તેથી દાઉદનો ધંધો અટકતો નથી. એથી ઊલટું દાઉદના ખાસ માણસ અકીલ કરીમે તાજેતરમાં જ એક લક્ઝુરિયસ હાઉસિંગ પ્રોજેક્ટ કરાંચીમાં હાથ ધર્યો છે. અકીલ કરીમ ધેડી આ અગાઉ પાકિસ્તાનમાં સન બિઝ ટીવી ચેનલ પણ ચલાવી ચૂક્યો છે. તેમાં એણે ઘણું નુકસાન કર્યું હતું.

BOL Channel નો લક્ષ્યાંક

દાઉદ ઇબ્રાહિમ અને આઈએસઆઈની નવી ન્યૂઝ ચેનલ BOL Channel નો લક્ષ્યાંક GEOTV છે. તે GEOTV ને પછાડવા માગે છે. પાકિસ્તાનમાં આજકાલ GEO TV ની ન્યૂઝ ચેનલ લોકપ્રિય છે. તેની માલિકી જંગ ગ્રૂપની છે. આ ગ્રૂપ શરૂઆતમાં પાકિસ્તાન સરકારની તરફેણ કરતું હતું, પણ હવે તે પાકિસ્તાનના લશ્કર અને ગુપ્તચર એજન્સીઓનું ટીકાકાર બની ગયું છે. તેને પછાડવા શરૂ થઈ રહેલી નવી ચેનલ BOL સહુથી પહેલાં ન્યૂઝ અને એન્ટરટેઇનમેન્ટ ચેનલ શરૂ કરશે. એ પછી સ્પોર્ટ્સ ચેનલ શરૂ કરશે. એ પછી BOL ગ્રૂપ પ્રિન્ટ મીડિયામાં પણ આવવા માગે છે. BOL ગ્રૂપનો પ્લાન અંગ્રેજી અને ઉર્દૂ એમ બંને ભાષામાં અખબારો શરૂ કરવાનો છે. અલબત્ત, BOL નો આ હાઈ પ્રોફાઇલ પ્રોજેક્ટ નાણાકીય દૃષ્ટિએ કેટલો ફાયદાકારક છે તે એક પ્રશ્ન છે. ઘણાંને લાગે છે કે પ્રિન્ટ અને ઇલેક્ટ્રોનિક્સ ટીવી મીડિયામાં સ્પર્ધા એટલી હદે છે કે તેને પૂરતું વળતર મળવાની શક્યતા ઘણી ઓછી છે. ઘણાંને લાગે છે કે BOL TV Channel એક દિવસ દેવાળું ફૂંકશે. તેને બચાવવા BOL ટીવીએ સરકારી જાહેરાતો પર જ નિર્ભર રહેવું પડશે. BOL ટીવી ચેનલ અંગે ભારતના નિષ્ણાતો માને છે કે આ ટીવી ચેનલ પર આઈએસઆઈનો પ્રભાવ હશે, તેથી તે પત્રકારોને ખરીદશે. પોતાને ગમતા કાર્યક્રમો પ્રદર્શિત કરાવશે. આ કામ તે ભૂતકાળમાં કરી ચૂકી છે.

www.devendrapatel.in

કભી કભી – દેવેન્દ્ર પટેલ

Ÿ  ઐશ્વર્યા અને ભરત બે સારાં મિત્રો હતાં પણ બેઉના વિચારોમાં ઘણો ફરક હતો

૨૪વર્ષની વયનો ભરત એ મનોહર જોશી પરિવારનો સહુથી મોટો પુત્ર હતો. તે જયપુરમાં રહેતો હતો. ભરતની એક બહેનનું નામ ડોલી. ડોલીની એક સહેલીનું નામ ઐશ્વર્યા. ઐશ્વર્યા અવાર નવાર ડોલીને મળવા આવતી હતી. એ કારણે ઐશ્વર્યાનો ડોલીના ભાઈ ભરત સાથે પણ પરિચય હતો. ઐશ્વર્યા તેને ગમવા લાગી હતી. ઐશ્વર્યામાં ગજબનું આકર્ષણ હતું. ભરત તેના તરફ આર્કિષત થતો જ ગયો. તે હવે પોસ્ટગ્રેજ્યુએશન કરતો હતો. પરંતુ તેનું મન ભણવામાં લાગતું નહોતું. આમ તો ભરતને તેના બધા જ મિત્રો સાથે ઘરોબો હતો. ક્યારેક ક્યારેક ઐશ્વર્યા પણ તેને મળતી હતી. ઐશ્વર્યા તેને ગમતી હતી, તેથી તે તેને નજીકથી જાણવા પ્રયાસ કરતો હતો પરંતુ ઐશ્વર્યા વધુ ગંભીર રહેતી હતી. તે ભણવામાં વધુ વ્યસ્ત રહેતી હતી. ગ્રેજ્યુએશન કરી લીધા બાદ તે સ્પર્ધાત્મક પરીક્ષાઓની તૈયારી કરતી હતી.

ભરત હવે ઐશ્વર્યામાં વધુને વધુ રુચિ લેવા માંડયો હતો. તે ઐશ્વર્યાની નાનામાં નાની વાતોનો ખ્યાલ રાખતો હતો. ઐશ્વર્યા પણ ભરતનો ખ્યાલ રાખતી હતી. એક દિવસ ભરતે પૂછયું: ”ઐશ્વર્યા ! તેં ભવિષ્યની બાબતમાં શું વિચાર્યું છે?”

તે બોલીઃ ”ભરત ! હું કોઈ સારું કામ કરવા માંગુ છું. મારા પોતાના પગ પર ઊભી રહેવા માંગુ છું. મારા માતા-પિતાનું નામ રોશન કરવા માંગુ છું.”

ભરતે કહ્યું: ”આ તો સારી વાત છે, તારું સ્વપ્ન પૂરું કરવામાં મારી કોઈ જરૂર હોય તો કહેજે.”

ઐશ્વર્યાએ કહ્યું : ”થેંક્સ”.

એ પછી ભરત અને ઐશ્વર્યા વચ્ચે અવારનવાર ફોન પર વાત થયા કરતી. ભરતને હવે અહેસાસ થઈ ગયો કે ઐશ્વર્યા હવે માત્ર એની મિત્ર જ નહીં પણ તેનો પ્રેમ પણ છે. તે ઐશ્વર્યાને પ્રેમ કરવા લાગ્યો હતો. આ તરફ ઐશ્વર્યા એરહોસ્ટેસ બનવાની તૈયારી કરવા લાગી હતી, છતાં વચ્ચે વચ્ચે ભરતને મળવાનો સમય કાઢી લેતી હતી. બંનેની દોસ્તી પ્યાર તરફ આગળ વધવા લાગી હતી. ભરતના ઘરમાં પણ બધાને ખ્યાલ આવી ગયો કે ભરત અને ઐશ્વર્યા વચ્ચે કાંઈક ચાલી રહ્યું છે. બંને પરિવારો અતિ શિક્ષિત હોઈ તેમને એ સંબંધો પર કોઈ એતરાજ નહોતો. ભરતનું પરિવાર આર્થિક રીતે વધુ સંપન્ન હતું. જ્યારે ઐશ્વર્યા મધ્યમવર્ગના પરિવારની પુત્રી હતી. ભરતની તમામ જરૂરિયાતો પૂરી કરવામાં આવતી. જ્યારે ઐશ્વર્યા સ્વયં કરકસરથી રહેતી હતી. ભરત ધનવાન પિતાનો પુત્ર હોવાથી જીદ્દી હતો જ્યારે ઐશ્વર્યા અત્યંત સ્વરૂપવાન હોવા છતાં સાદગીથી જીવતી હતી. કેટલીકવાર બેઉ કલાકો સુધી વાતો કરતા. એ દરમિયાન ઐશ્વર્યા ભરતને સમજવા કોશિશ કરતી હતી. અલબત્ત, તે પોતાના ભવિષ્ય અંગે ગંભીર હતી.

આ તરફ ઐશ્વર્યા માત્ર ભરતને જ નહીં પરંતુ તેના આખા ઘરને ગમતી હતી. એક તો તે અત્યંત સુંદર હતી અને બીજું તે એકદમ ગંભીર હતી. આવી રૂપાળી છોકરી ઘરમાં વહુ બનીને આવે તો એક શ્રીમંત ઘરની શોભા વધી જાય તેમ ભરતના ઘરવાળા માનતા હતા. ઘરમાં બધાએ ભરતની લગ્નની ઈચ્છા વિશે પૂછયું તો એણે ઐશ્વર્યાનું નામ આપ્યું. ભરતનાં માતા-પિતા એ બેઉના સંબંધો જાણતાં જ હતા. તેઓ રાજી થઈ ગયા. પરિવારે નક્કી કર્યું કે ”હવે શુભ કાર્યમાં વિલંબ કરવો જોઈએ નહીં. કાલે જ ભરતની મમ્મીએ ભરત અને ઐશ્વર્યાની સગાઈની વાત કરવા જવી” એમ નક્કી થયું. હવે ભરતે જ ઐશ્વર્યાને ફોન કરી કહ્યું :”ઐશ્વર્યા! તું અત્યારે જ મારા ઘેર આવી જા. એક ખુશખબર આપવા માંગું છું.”

ઐશ્વર્યાએ કહ્યું: ”ભરત ! હું અત્યારે સ્પર્ધાત્મક પરીક્ષાની તૈયારી કરી રહી છું. આજે નહીં આવી શકું. અઠવાડિયા પછી મળીશું.”

”થોડીવાર માટે પણ નહીં આવી શકે ?”

”ના ભરત. હું વાંચી રહી છું. લક્ષ્યની પ્રાપ્તિ માટે એક એક મિનિટ કિંમતી છે.”

ભરતને ઐશ્વર્યાની આ વાત ગમી નહીં. એણે ફટાક દઈ ફોન મૂકી દીધો. એને લાગ્યું કે, સગાઈ પછી બધું બરાબર થઈ જશે. બીજા દિવસે તેની મમ્મી વિવાહની વાત કરવા જવાની હતી પરંતુ મુલાકાત નક્કી કરવા માટે ભરતની મમ્મીએ ફોન કર્યો ત્યારે ઐશ્વર્યાની મમ્મીએ નમ્રતાથી કહ્યું: ”બહેન! અત્યારે ઐશ્વર્યા પરીક્ષાની તૈયારી કરી રહી છે. એક વાર તેની પરીક્ષા પતી જવા દો.”

”ઠીક છે. પરીક્ષા પછી વાત કરીશું.” ભરતની માતાએ એ વાત સમજદારીપૂર્વક સ્વિકારી લીધી. બીજા જ દિવસે ભરત ઐશ્વર્યાને મળવા તેના ઘેર ગયો પરંતુ ખબર પડી કે ઐશ્વર્યા પરીક્ષા આપવા દિલ્હી જતી રહી છે. તે પરીક્ષા આપવા જવાની છે એ વાત ઐશ્વર્યાએ તેને કહી ના હોઈ ભરતને ગુસ્સો આવ્યો. ઐશ્વર્યાને તે લડવા માંગતો હતો પણ તેનો મોબાઈલ બંધ હતો. ભરત હવે તનાવમાં રહેવા લાગ્યો. તેને લાગ્યું કે, તે જેટલો ઐશ્વર્યાની નજીક જાય છે એટલી જ તે દૂર જઈ રહી છે. ઐશ્વર્યા દિલ્હીથી ક્યારે પાછી આવી તે વાતની જાણ પણ તેણે ભરતને ના કરી. એ પરીક્ષામાં પાસ થઈ ગઈ એ વાતની જાણ પણ તેણે ભરતને ના કરી. એે વાતની ખબર એને બીજા દોસ્તો મારફતે પડી. આમ છતાં ઐશ્વર્યાને અભિનંદન આપવા તે એના ઘરે ગયો પરંતુ તેના આવવાથી ઐશ્વર્યાના ચહેરા પર કોઈ ખુશી ના જોઈ. આમ છતાં એણે કહ્યું: ”ઐશ્વર્યા, હવે તો એરહોસ્ટેસની તાલીમ માટે તારી પસંદગી થઈ ગઈ છે. હવે આપણી સગાઈ થઈ જવી જોઈએ.”

ઐશ્વર્યાએ કહ્યું: ”હમણાં સગાઈની ઉતાવળ શું છે ? મારા જીવનનું લક્ષ્ય લગ્ન નહીં, પણ કારકિર્દી છે. હજુ તો મારી પસંદગી થઈ છે, તાલીમ બાકી છે, તાલીમ બાદ મને ખબર નથી કે હું ક્યાં હોઈશ ? હમણાં હું લગ્નના બંધનમાં પડવા માંગતી નથી.”

”પણ તારે એરહોસ્ટેસની નોકરી કરવાની શું જરૂર છે? મારા પિતા પાસે કાફી જાયદાદ છે.”

”જો ભરત! હું લગ્ન કરીને એશ આરામ કરવા માંગતી નથી. હું રોજ નવાં વસ્ત્રો પહેરીને પાર્ટીઓમાં જવા માંગતી નથી. હું બાળકો પેદા કરનારી ફેકટરી બનવા માંગતી નથી. જે માતા-પિતાએ મને જન્મ આપ્યો છે, મને ભણાવી છે અને મારો ઉછેર કર્યો છે તેમના પ્રત્યે પણ મારે કેટલીક જવાબદારી નિભાવવાની છે. હું કોઈની પુત્રવધૂ તરીકે નહીં પણ કોઈની પુત્રી તરીકે ઓળખાવા માંગુ છું. હું લગ્ન કરીશ પણ અત્યારે નહીં, અત્યારે મને મારી કારકિર્દી બનાવવી છે અને મારા માતા-પિતા પ્રત્યેનું ઋણ અદા કરવું છે.”

”પણ તું મારી સાથે લગ્ન કરીને પણ એ ફરજ નિભાવી શકે છે. ઐશ્વર્યા?” ભરતે કહ્યું.

ઐશ્વર્યાએ મક્કમતાથી કહ્યું: ”ભરત! હવે મારે તને સાચી વાત કહેવી જ પડશે. જો સાંભળ ! તારા અને મારા વિચારોમાં ફરક છે. તું સારો મિત્ર બની શકે છે. સારો જીવનસાથી નહીં. તું પિતાના પૈસા પર જીવવા માંગે છે. તું તારી કારકિર્દી માટે કદીયે ગંભીર નહોતો, અને આજે પણ નથી. પિતાની સંપત્તિનો તો ક્યારેય પણ અંત આવી જતો હોય છે, પણ જેની પાસે જ્ઞાાન છે, કેળવણી છે, તાલીમ છે તે જ લાંબુ ચાલે છે, તારે મારી સાથે લગ્નનો ખ્યાલ હવે છોડી દેવો જોઈએ.”

ઐશ્વર્યાનો આ જવાબ સાંભળી ભરત સ્તબ્ધ થઈ ગયો. છ વર્ષના પ્રેમ સંબંધનો એક ઝાટકે ઐશ્વર્યા અંત લાવી દેશે એની તેને કલ્પના પણ નહોતી. હવે ઐશ્વર્યાના ઘેર વધુ રોકાવું તેને ઠીક ના લાગ્યું. તે સીધો જ ઘેર આવ્યો. એની મમ્મીને લાગ્યું કે કાંઈક ગરબડ થઈ ગઈ છે. મમ્મીએ પૂછયું : ”શું થયું, બેટા ?”

”એમાં પરેશાન થવાની જરૂર શું છે ? આપણે બીજી છોકરી શોધી કાઢીશું”: ભરતની મમ્મીએ કહ્યું!

ભરત કાંઈ જ બોલ્યા વગર પોતાના બેડરૂમમાં ચાલ્યો ગયો. એને લાગ્યું કે, ઐશ્વર્યા અત્યાર સુધી મારી ભાવનાઓ સાથે જ ખેલતી રહી. જરૂર એના જીવનમાં બીજો કોઈ યુવાન આવ્યો હશે. એ જાતજાતના વિચારો કરતો રહ્યો. તે બીજા દિવસે તે મિત્રોને મળ્યો. મિત્રોએ પણ તેને સમજાવ્યો કે ”તને તો કેટલીયે છોકરીઓ લગ્ન માટે મળી જશે. આખો દિવસ ભણભણ કરતી પંતુજી જેવી છોકરી સાથે લગ્ન કરીને તું શું સુખી થવાનો? જે થયું તે સારું થયું. ભૂલી જા ઐશ્વર્યાને.” પરંતુ ભરત પોતાના મનને ના મનાવી શક્યો. એ ડિપ્રેશનમાં રહેવા લાગ્યો. બહુ જલ્દીથી નર્વસ બ્રેકડાઉનનો શિકાર બની ગયો. તે એકલો જ બેસી રહેવા લાગ્યો. કોઈની યે સાથે વાત કરવાનું એણે બંધ કરી દીધું. હવે તો ઐશ્વર્યાના ફોન આવતા પણ બંધ થઈ ગયા હતા. તે માનસિક રીતે પરેશાન થવા લાગ્યો. તેને વાતાવરણ બદલવા જયપુરથી તેના મામાના ઘરે દિલ્હી મોકલવામાં આવ્યો. એક દિવસે એણે તેની ભાભીને ફોન કર્યોઃ ”ભાભી! હવે હું જીવવા માંગતો નથી. મમ્મી- પપ્પાનો ખ્યાલ રાખજો.”

અને તા. ૯ ઓગસ્ટ, ૨૦૧૨ના રોજ એણે પોતાની ફેસબુક પર લખ્યું: ”ઐશ્વર્યાને ભૂલવી મારા માટે મુશ્કેલ છે. ૨૪ કલાકમાં હું મારી જીવનલીલા સમાપ્ત કરી રહ્યો છું.”

એ પછી એ રાત્રે તેના મિત્ર નીરજને ફોન કરી પોતાની ફેસબુક ખોલવા વિનંતી કરી. નીરજે ભરતની ફેસબુક ખોલી. તેના હોશ ઊડી ગયા. નીરજે ભરતની મમ્મીને ફોન કરી કહ્યું: ”આન્ટી ! ભરત ૨૪ કલાકમાં આત્મહત્યા કરવાનો છે ?”

ઘરમાં પણ બધાએ ભરતની ફેસબુક ખોલી. બધાં સ્તબ્ધ થઈ ગયા. તેમણે દિલ્હી ફોન કર્યો તો ખબર પડી કે ભરત દિલ્હી છોડી ચુક્યો હતો. પરોઢિયે તે જયપુર આવ્યો અને ઘરના પગથિયાંમાં જ બેસી ગયો. તેના હાથમાં તમંચો હતો. ઘરના બધા જ સભ્યોએ તેને રોકવા કોશિશ કરી. બધાં જ સભ્યો રડવા લાગ્યા. કેટલાંકે તેની પાસે જવા કોશિશ કરી પરંતુ ભરતે તમંચાનું ટ્રીગર દબાવી દીધું. ગોળી તેના લમણાની આરપાર નીકળી ગઈ. થોડી જ વારમાં લોહીના ખાબોચીયામાં તે ઢળી પડયો. પોલીસ આવી પહોંચી,પણ હવે ઘણું મોડું થઈ ગયું હતું. પોલીસે સ્વેચ્છાએ આત્મહત્યાનો કેસ નોંધી ફાઈલ બંધ કરી દીધી. લાગણીઓ અને કારકિર્દી વચ્ચેનો સંઘર્ષ કદીક આવા દુઃખદ પરિણામો પણ લાવી શકે છે.

ચૂંટણીઓ હવામાં ઘૂમરાઈ રહી છે. દેશનાં મોટાં મોટાં શહેરોમાં અત્યારથી જ હોર્ડિંગ્સ લાગી રહ્યાં છે. મોટી મોટી પ્રચાર સભાઓ યોજાઈ રહી છે. વડાપ્રધાનપદના સંભવિત ઉમેદવારો દેશભરમાં ફરી રહ્યા છે. સોશિયલ મીડિયા પર પણ પ્રચાર અને પ્રહારનો મારો થઈ રહ્યો છે. ટેલિવિઝનની ન્યૂઝ ચેનલો પર ઉગ્ર ચર્ચાઓ થઈ રહી છે. આ પરિપ્રેક્ષ્યમાં નોંધપાત્ર વાત એ છે કે આવનારી લોકસભાની ચૂંટણી માટે જેઓ રાજનીતિમાં નથી, પરંતુ બીજી રીતે જાણીતી પ્રતિભાઓ છે તેમની પણ ખોજ થઈ રહી છે. વિવિધ રાજકીય પક્ષો આવી વ્યક્તિઓને તેઓ આગામી ચૂંટણીમાં પોતાના ઉમેદવાર બનાવી મેદાનમાં ઉતારવા માગે છે.

નંદન નિલેકણી ઇન્ફર્મેશન ટેક્નોક્રેટ છે. આમ તો તેઓ પહેલાં ઇન્ફોસિસ સાથે સંકળાયેલા હતા. તે પછી તેમને ‘આધાર કાર્ડ’બનાવવાનો પ્રોજેક્ટ સોંપવામાં આવ્યો. કોંગ્રેસ પાર્ટી તેમને બેંગલુરુમાંથી ચૂંટણી લડાવવા માગે છે. વી.કે. સિંહ ભારતીય લશ્કરના નિવૃત્ત વડા છે. તાજેતરમાં જ તેઓ નરેન્દ્ર મોદી સાથે મંચ પર દેખાયા હતા. એવી જ રીતે કૃષ્ણા પુનિયા એક એથ્લીટ છે. તેમને પણ કોંગ્રેસ ટિકિટ આપવા માગે છે. વિશ્વ ઓલિમ્પિકમાં ભારતનું નામ રોશન કરનાર રાજ્યવર્ધનસિંહ રાઠૌર પણ ભારતીય લશ્કરમાંથી રાજીનામું આપી ભારતીય જનતા પાર્ટીમાં જોડાયા છે. ૪૩ વર્ષના રાઠૌર કહે છે : “રાજનીતિ મારા જીવનને સંપૂર્ણ બનાવશે.”

રાજનીતિ અને સેલિબ્રિટીઝનો સંબંધ પુરાણો છે. તામિલનાડુના પૂર્વ મુખ્યમંત્રી એમ.જી. રામચન્દ્રન એક જમાનાના મશહૂર તમિલ અભિનેતા હતા. તે પછી તેઓ રાજનીતિમાં આવ્યા હતા. તામિલનાડુનાં હાલનાં મુખ્યમંત્રી જયલલિતા પણ એક જમાનામાં તમિલ અભિનેત્રી હતાં અને એમ.જી. રામચન્દ્રનના આશીર્વાદથી જ રાજનીતિમાં આવ્યાં હતાં. એ જ પ્રમાણે આંધ્રના પૂર્વ મુખ્યમંત્રી એન.ટી. રામારાવ પણ મશહૂર એકટર હતા. તેઓ રામનો રોલ કરતા હતા. તે પછી રાજનીતિમાં આવ્યા હતા. ચન્દ્રાબાબુ નાયડુ તેમના જમાઈ થાય છે. બોલિવૂડના જાણીતા અભિનેતા સુનીલ દત્ત કોંગ્રેસની ટિકિટ પર ચૂંટણી લડી લોકસભામાં ચૂંટાયા હતા. એ સિવાય વિનોદ ખન્ના, ગોવિંદા, ધર્મેન્દ્ર, રાજ બબ્બર, શત્રુઘ્ન સિંહા, કીર્તિ આઝાદ અને મોહંમદ અઝરુદ્દીન જેવી જાણીતી પ્રતિભાઓ પણ રાજનીતિમાં પ્રવેશીને તેનો સ્વાદ ચાખી ચૂક્યાં છે. રાજેશ ખન્નાને કોંગ્રેસે ટિકિટ આપી હતી, પરંતુ તેઓ હારી ગયા હતા. ફિલ્મમેકર પ્રકાશ ઝા પણ રામવિલાસ પાસવાનની પાર્ટીમાંથી ટિકિટ લઈને પરાજય પામી ચૂક્યા છે. એ ચૂંટણીમાં હાર્યા બાદ પ્રકાશ ઝા હવે ફરી ફિલ્મ નિર્માણમાં વ્યસ્ત થઈ ગયા છે.

ગુજરાતી ફિલ્મોના અભિનય સમ્રાટ ઉપેન્દ્ર ત્રિવેદી પણ ભાજપમાંથી ચૂંટાઈને ગુજરાત વિધાન સભામાં પ્રવેશ્યા હતા. તેમના ભાઈ અને ‘મહાભારત’ ટીવી સિરિયલમાં રાવણનો રોલ કરનારા એકટર અરવિંદ ત્રિવેદી પણ ભાજપની ટિકિટ પર ચૂંટાઈને લોકસભામાં ગયા હતા. રામાયણમાં સીતાનો રોલ કરનાર દીપિકા ચીખલિયા પણ ચૂંટણી લડી ચૂક્યાં છે. ગુજરાતની જાણીતી સંગીતબેલડી મહેશકુમાર અને નરેશકુમાર પણ સફળતાપૂર્વક ચૂંટણી લડી ચૂક્યા છે. આજે બક્ષીપંચની ઠાકોર જ્ઞાતિની બહુમતી વસ્તીવાળા મતવિસ્તારમાંથી વિક્રમ ઠાકોરને ટિકિટ આપવામાં આવે તો ગુજરાતનો એક પણ નેતા તેમની સામે જીતી શકે નહીં. અલબત્ત,બધા જ કલાકારો ચૂંટણી જીતે છે એવું નથી. ગુજરાતનાં જાણીતાં નૃત્યાંગના મલ્લિકા સારાભાઈ ચૂંટણી હારી ગયાં હતાં. ‘સાસ ભી કભી બહૂ’થી નામની ટેલિવિઝન શ્રેણીનાં જાણીતાં અભિનેત્રી સ્મૃતિ ઈરાની ભાજપમાં જોડાયાં છે. તેમને ૨૦૦૪માં દિલ્હીમાંથી ભાજપે ટિકિટ આપી હતી, પરંતુ તેઓ કપિલ સિબ્બલ સામે હારી ગયાં. ૨૦૦૨નાં ગુજરાતનાં રમખાણો વખતે નરેન્દ્ર મોદીની ટીકા કરનાર સ્મૃતિ ઈરાની આજકાલ મોદીનાં પ્રશંસક બની ફરી ટિકિટ લેવા માગે છે. ટેલિવિઝનની ન્યૂઝ ચેનલો પર વધુ ને વધુ ઉગ્રતાપૂર્વક ચર્ચા કરતાં જણાય છે.

બોલિવૂડના સુપરસ્ટાર અમિતાભ બચ્ચન ગાંધી પરિવારની ખૂબ નિકટ હતા. રાજીવ ગાંધી સાથે તેમને મૈત્રી હતી. અમિતાભ બચ્ચન પૂનાની ફિલ્મ ઇન્સ્ટિટયૂટ દ્વારા અભિનયની તાલીમ લઈને બહાર આવી સંઘર્ષ કરી રહ્યા હતા ત્યારે ઇન્દિરા ગાંધીએ કે. અબ્બાસ નામના મશહૂર લેખક અને ફિલ્મમેકરને ભલામણ કરી અમિતાભ બચ્ચનને ‘સાત હિન્દુસ્તાની’ ફિલ્મમાં કામ અપાવ્યું હતું. પાછળથી રાજીવ ગાંધી તેમને કોંગ્રેસ તરફથી ટિકિટ આપી અલાહાબાદ મતક્ષેત્રમાંથી ચૂંટણી લડાવી લોકસભામાં લઈ આવ્યા હતા. પાછળથી અમિતાભના ગાંધી પરિવાર સાથે સંબંધો બગડી ગયા હતા અને બચ્ચન પરિવાર અમરસિંહ સાથેની દોસ્તીના કારણે મુલાયમસિંહની પાર્ટીનો સમર્થક બની ગયો હતો. આજે જયા બચ્ચન મુલાયમસિંહના આશીર્વાદથી રાજ્યસભામાં છે અને તેમને મુલાયમસિંહ સાથે દોસ્તી કરાવનાર અમરસિંહ મુલાયમસિંહની પાર્ટીમાંથી આઉટ થઈ ગયા છે. એ જ રીતે અમિતાભ બચ્ચન સાથે ‘શરાબી’ ફિલ્મમાં રોલ કરનાર અભિનેત્રી જયાપ્રદા પણ અમરસિંહને કારણે રાજનીતિમાં છે. અમિતાભ બચ્ચન પર જેમના અનેક ઉપકાર છે તેવા ગાંધી પરિવારને છેહ દેવાની ઘટના બાદ યુપીએ સરકારે અભિનેત્રી રેખાને રાજ્યસભામાં નિયુક્ત કરી મોટી સોગઠી મારેલી છે.

જેઓ રાજનીતિમાં નહોતા છતાં રાજનીતિમાં આવ્યા હોય તેવું સહુથી મોટું ઉદાહરણ હાલના વડાપ્રધાન ડો. મનમોહનસિંહ ખુદ છે. તેઓ અર્થશાસ્ત્રી છે. તેઓ અગાઉ ભારતની રિઝર્વ બેન્કના ગવર્નર હતા. તેમને રાજનીતિમાં લાવવાનું કામ પૂર્વ વડાપ્રધાન નરસિંહ રાવે કર્યું હતું. ભાજપના યશવંત સિંહા ખુદ એક આઈએએસ ઓફિસર છે અને બ્યુરોક્રસીમાંથી આવેલા છે. ભાજપના જસવંતસિંહ આર્મીમાંથી આવેલા છે. કોંગ્રેસના શશી થરૂર રાજનીતિમાં આવતા પહેલાં સંયુક્ત રાષ્ટ્રમાં ન્યૂ યોર્ક ખાતે મહત્ત્વપૂર્ણ ફરજ બજાવતા હતા. ભાજપનાં મહિલા પ્રવક્તા નિર્મલા સીતારામન રાજકારણમાં આવતા પહેલાં લંડનના એક ઔદ્યૌગિક ગૃહમાં મોટો હોદ્દો ધરાવતાં હતાં. ભાજપના નવજોતસિંહ સિદ્ધુ ક્રિકેટર હતા. આજકાલ રાજનીતિમાં વિદૂષકનો રોલ ભજવે છે.

ફિલ્મ કલાકારોની લોકપ્રિયતાથી લોકોની ભીડ એકત્ર કરી શકાય છે, પરંતુ દરેક વખતે એ માનવ ભીડને મતમાં પરિવર્તિત કરી શકાતી નથી. દા.ત. એકટર ચિરંજીવી આંધ્રમાં ૨૦૦૯ની ચૂંટણી લડયા હતા. તેમની જાહેરસભામાં લાખોની માનવભીડ એકત્ર થતી હતી, પરંતુ આંધ્ર વિધાનસભાની કુલ ૨૯૪ બેઠકોમાંથી તેમની પ્રજારાજ્યમ્ પાર્ટીને માત્ર ૧૮ બેઠકો જ મળી શકી હતી. વળી આવી સેલિબ્રિટીઝ ઘણી વાર વિધાનસભા કે લોકસભા- રાજ્યસભામાં માત્ર શો-પીસ જ બની રહે છે. કેટલાક તો ચર્ચામાં ભાગ્યે જ ભાગ લે છે, કારણ કે વિવિધ રાજકીય પાર્ટીઓ ચૂંટણીઓ દરમિયાન તેમની લોકપ્રિયતા વટાવવા જ તેમને ટિકિટ આપે છે. કેટલાક સભ્યો તો પાર્લમેન્ટમાં દેખાતા જ નથી. કેટલાંક દેખાય છે તો ભાગ્યે જ કોઈ પ્રશ્નો પૂછે છે. કેટલાક પ્રશ્નો પૂછે છે તો ભાગ્યે જ ચર્ચામાં ભાગ લે છે. અલબત્ત, વિવિધ ક્ષેત્રોમાંથી સારા માણસો રાજનીતિમાં આવે તે જરૂરી છે.