રાજનાથસિંહને અચાનક હિન્દી અને સંસ્કૃત ભાષા પર પ્રેમ કેમ ઊભરાયો ?
ચૂંટણી જીતવા માટે નેતાઓ કાંઈ પણ બોલવા તૈયાર છે. રાજકારણીઓ જ્યાં જાય તેવો વેશ ભજવે છે. મહારાષ્ટ્રમાં જાવ તો છત્રપતિ શિવાજીનાં વખાણ કરવાં પડે. બિહારમાં જાવ તો જયપ્રકાશ નારાયણની પ્રશંસા કરવી પડે. પશ્ચિમ બંગાળમાં જાવ તો રવીન્દ્રનાથ ટાગોરને યાદ કરવા પડે. તમિળનાડુમાં જાવ અન્ના દુરાઈને અંજલિ આપવી પડે. ગુજરાતમાં આવો ત્યારે ગાંધીજી અને સરદાર સાહેબનાં વખાણ કરવા પડે. પાકિસ્તાન જાવ તો મોહંમદ અલી ઝીણાની પ્રશંસા કરવી પડે. અડવાણી આ કામ કરી ચૂક્યા છે.
નેતાશ્રીનો હિન્દીપ્રેમ
આ બધું જ રાજકારણીઓના પાપી પેટ એવા બેલેટ બોક્સ માટે જ. હવે એ જ કામ ભજવતા રાષ્ટ્રીય પ્રમુખ શ્રીમાન રાજનાથસિંહ કરી રહ્યા છે. ભાજપાની આંતરિક ભાંજગડના કારણે વચલા રસ્તા તરીકે જ સંઘની મહેરબાનીથી ભાજપાના પ્રમુખ બનેલા રાજનાથસિંહે તાજેતરમાં બે મુદ્દા ઊભા કર્યા. એક તો તેમણે એમ કહ્યું કે, હિન્દીની ઉપેક્ષા થઈ રહી છે અને બીજું એમ કહ્યું કે,અંગ્રેજી ભાષાએ આ દેશની સંસ્કૃતિને ભારે નુકસાન કર્યું છે. એથીયે આગળ વધીને તેમણે કહ્યું કે, “આ દેશમાં સંસ્કૃત બોલનારા હવે માત્ર ૧૪ હજાર લોકો જ રહ્યા છે.” રાજનાથસિંહનો આ બફાટ ખુદ ભાજપાના જ નેતાઓને ગમ્યો નથી. સૌથી પહેલાં તો એક વાત સમજી લઈએ કે શ્રીમાન રાજનાથસિંહ આમ કેમ બોલ્યા. રાજનાથસિંહ એમ માને છે કે, ભાજપની છબી એક કટ્ટરપંથી પાર્ટી તરીકે ઊપસી રહી છે ત્યારે હિન્દી જ એક એવો મુદ્દો છે કે, જેની પર ઉત્તર ભારતના બધા જ વર્ગો અને સમુદાયને એક પ્લેટફોર્મ પર લાવી શકાય. એ જ રીતે ઉત્તરપ્રદેશ, બિહાર, રાજસ્થાન, મધ્યપ્રદેશ, ઝારખંડ, છત્તીસગઢ અને ઉત્તરાખંડ જેવાં હિન્દી ભાષી રાજ્યોના મતદારોને હિન્દી ભાષાની લોલીપોપ આપી ખુશ કરી શકાય. પરંતુ ભાજપાના વિચારશીલ નેતાઓને ચિંતા એ વાતની છે કે, કર્ણાટક, કેરળ, આંધ્ર, તમિળનાડુ અને ઓરિસ્સા જેવાં દક્ષિણ ભારતીય રાજ્યોમાં હિન્દીનો જબરદસ્ત વિરોધ થઈ શકે છે. ભૂતકાળમાં હિન્દી ભાષાના વિરોધમાં ચેન્નાઈમાં લોકો અગ્નિસ્નાન કરી ચૂક્યા છે. વળી જે રાજ્યોમાં હિન્દીનો વિરોધ છે તે રાજ્યોમાં ભાજપાની હાજરી નામમાત્રની જ છે. એકમાત્ર તમિળનાડુમાંથી ૩૯ અને આંધ્રમાંથી ૪૨ સાંસદો લોકસભામાં આવે છે. ત્યાં રાજનાથના હિન્દી-ગાનની શું અસર થશે એ તો ભગવાન જાણે.
અંગ્રેજીનો વિરોધ
હવે અંગ્રેજીના વિરોધની વાત. એક તરફ ભાજપા અને ખાસ કરીને ભાજપાના ૨૦૧૪ની ચૂંટણીના વડા પ્રધાનપદ માટેના ઉમેદવાર નરેન્દ્ર મોદી જ્યારે ઇન્ટરનેટ પર ફેસબુક, માય સ્પેસ, ટ્વીટર જેવા સોશિયલ મીડિયાનો ભરપૂર ઉપયોગ કરી રહ્યા છે ત્યારે રાજનાથસિંહનું અંગ્રેજી ભાષા વિરોધી ગાન અને વલણ કેટલું તર્કસંગત છે તે તેમણે જ નક્કી કરી લેવું જોઈએ. રાજનાથસિંહને એટલી તો ખબર હશે કે આખા વિશ્વને અને મોદીના લાખો ફેન્સને જોડતું ઈન્ટરનેટ અંગ્રેજી ભાષામાં જ ચાલે છે. તેમના પક્ષે ૨૦૧૪ની ચૂંટણી માટે આપેલો શબ્દ ‘વિઝન ડોક્યુમેન્ટ’ પણ અંગ્રેજી ભાષાનો જ શબ્દ છે. તેમના પુરોગામી પ્રમોદ મહાજને ભાજપા માટે આપેલા શબ્દો ‘ઈન્ડિયા શાઈનિંગ’ અને ‘ફીલ ગુડ’ પણ અંગ્રેજી ભાષાના જ શબ્દો છે. રાજનાથસિંહ જો મોબાઈલ વાપરતા હોય તો તેમના હેન્ડસેટનું કી-પેડ પણ અંગ્રેજીમાં જ છે. ગુજરાતમાં નરેન્દ્ર મોદી દર બે વર્ષે રાજ્યના ઔદ્યોગિક વિકાસ માટે જે અધિવેશન બોલાવે છે તેનું નામ પણ ‘વાઈબ્રન્ટ ગુજરાત’ છે. આ દેશની સુપ્રીમ કોર્ટ અને હાઈકોર્ટ્સ પણ અંગ્રેજીમાં જ ચાલે છે. રાજનાથસિંહને અંગ્રેજી સંસ્કૃતિ સામે વાંધો હોઈ શકે છે, પણ ભાષાની પાછળ કેમ પડી ગયા છે તે સમજ પડતી નથી. અંગ્રેજી એ જ્ઞાનની ભાષા છે. આખી દુનિયાનો રાજકીય અને આર્િથક વ્યવહાર અંગ્રેજીમાં ચાલે છે. વિશ્વનાં તમામ પ્રાચીન અને અર્વાચીન સાહિત્ય, વિજ્ઞાન, ટેક્નોલોજી અને સંસ્કૃતિનું જ્ઞાન આપણને અંગ્રેજી ભાષાના માધ્યમથી મળે છે. રાજનાથસિંહ હમણાં જે વિમાનમાં બેસી અમેરિકા જઈ આવ્યા તે વિમાનનો પાઈલોટ અંગ્રેજીમાં બોલવાનું બંધ કરીને વિમાનમાંથી ન્યૂયોર્કના કંટ્રોલ ટાવરને હિન્દી ભાષામાં પોતાનું લોકેશન આપે તો શું થાય ?
ઘડિયાળના કાંટા અવળા
ખરી વાત એ છે કે, રાજનાથસિંહની વાત ઘડિયાળના કાંટા અવળા ફેરવવા જેવી છે. રાજનાથસિંહની વાત કદાચ રાષ્ટ્રીય સ્વયંસેવક સંઘના થોડાક રૂઢિચુસ્ત નેતાઓને ગમી હશે, પણ નરેન્દ્ર મોદી સોશિયલ મીડિયા દ્વારા દેશના ૧૮થી ૩૫ વર્ષની વયના જે યુવાનોને આકર્ષવા પ્રયાસ કરી રહ્યા છે તેઓ રાજનાથસિંહના આ અંગ્રેજી વિરોધી ‘ગાન’ની શું પ્રતિક્રિયા આપે છે તેમણે જ સોશિયલ મીડિયા દ્વારા જાણી લેવું જોઈએ. રાજનાથસિંહ જેવા નેતાઓએ એ વાત સમજી લેવાની જરૂર છે કે, બર્મુડાના જમાનામાં ખાખી ચડ્ડી અને ક્રિકેટ-બેડમિન્ટન કે ટેનિસના જમાનામાં લાઠીદાવ હવે આઉટ ઓફ ડેટ છે.
અસલી સમસ્યા
રાજનાથસિંહે જે એક દુઃખ વ્યક્ત કર્યું તે સંસ્કૃત અંગેનું છે. એ વાત સાચી કે સંસ્કૃત ભાષા એ ભારતની જ દેન છે. સંસ્કૃત ભાષામાં ભારતનું શ્રેષ્ઠ સાહિત્ય સચવાયેલું છે. એ ભાષા ભારતનો અમૂલ્ય વારસો છે, પણ હકીકત એ પણ છે કે, સંસ્કૃત પહેલેથી જ દેવોની ભાષા રહી છે. સંસ્કૃત પહેલેથી જ સાહિત્ય માટેની ભાષા રહી છે. ભગવાન શ્રીરામના જમાનામાં પણ સંસ્કૃતમાં વાતચીત કરાતી હોવાના કોઈ પ્રમાણ અયોધ્યામાં નથી. ભગવાન શ્રીકૃષ્ણના કાળમાં પણ મથુરાના લોકો સંસ્કૃતમાં વાર્તાલાપ કરતા નહોતા. સરયુના તટે અયોધ્યાના લોકો અને યમુનાના તટે મથુરાના લોકો સ્થાનિક ભાષામાં જ વાત કરતા હતા- જે આજે પણ બોલાય છે. પોતાના સંતાનોને અંગ્રેજી માધ્યમની સ્કૂલોમાં ભણાવતા નેતાઓ લોકોને બેવકૂફ બનાવવા ગમે તે બકવાસ કરતા રહે છે. આજે આ દેશમાં અસલી સમસ્યા ભાષા નહીં, પરંતુ મોંઘવારી, બેકારી અને ભ્રષ્ટાચાર છે. આ દેશની અસલી સમસ્યા ગરીબી અને ભૂખમરો છે. આ દેશની અસલી સમસ્યા કુપોષણ અને મોંઘીદાટ તબીબી સેવાઓ છે. આ દેશની અસલી સમસ્યા ભારતની આંતરિક અને બાહ્ય સલામતી સામે ઊભા થયેલા ખતરાની છે. આ દેશની અસલી સમસ્યા કાયદો અને વ્યવસ્થાની ખાડે ગયેલી પરિસ્થિતિની છે. આ દેશની અસલી સમસ્યા વસતી વિસ્ફોટ અને વધી રહેલા ગરીબોની છે. આ દેશની અસલી સમસ્યા રાજકારણીઓ દ્વારા લોકોમાં વકરાવવામાં આવતાં જ્ઞાતિવાદ અને કોમવાદની છે.
મિનરલ વોટરની બોટલ ગટગટાવનારાઓએ ભારતીય સંસ્કૃતિના નામે લોકોને ગૌમૂત્ર પીવાની સલાહ આપવી ના જોઈએ. પહેલાં તમારા ઘરમાં ગૌમૂત્ર પીવડાવો પછી બીજાને સલાહ આપો. પહેલાં તમારા પુત્રના હાથમાંથી અંગ્રેજી ભાષાની ચોપડી છીનવી લઈ તેને માત્ર સંસ્કૃત જ ભણાવો પછી બીજાને સલાહ આપો. આ તો ગાંડી સાસરે જાય નહીં ને ડાહીને સલાહ આપે તેવી વાત છે.
Leave a Reply