Devendra Patel

Journalist and Author

Tag: Politics and public in india

રાજકીય પક્ષોને વિદેશમાંથી કરોડોનું ફંડ કોણે આપ્યું?

ભારતની બિન સરકારી સંસ્થાઓને ૫૦,૦૦૦ કરોડનું ધન કોણે આપ્યું?

સમગ્ર દેશની નજર પાંચ રાજ્યોની ચૂંટણીઓ પર છે. કેટલાંક રાજ્યોમાં કોંગ્રેસ અને ભાજપા વચ્ચે સીધી ટક્કર છે, પરંતુ દિલ્હી વિધાનસભાની ચૂંટણીમાં કોંગ્રેસ, ભાજપા અને આમ આદમી પાર્ટી વચ્ચે ત્રિપાંખીયો જંગ છે. ૨૦૧૪ની લોકસભાની ચૂંટણી પહેલા યોજાઇ રહેલી આ ચૂંટણીઓ કોંગ્રેસ અને ભાજપા માટે લીટમસ ટેસ્ટ હશે. આ બધામાં સહુથી રસપ્રદ ચૂંટણી દિલ્હીની છે. દિલ્હીમાં કોંગ્રેસના શીલા દીક્ષિત છેલ્લા ૧૫ વર્ષથી દિલ્હીના મુખ્યમંત્રી છે, પરંતુ અરવિન્દ કેજરીવાલ હાથમાં ઝાડુંનું નિશાન લઇને શીલા દીદીની પાછળ પડયા છે. કોંગ્રેસના પરંપરાગત મત, ગરીબોના મત, ઝૂંપડપટ્ટીના મતોમાં તેઓ મોટું ગાબડું પાડે તેમ લાગે છે. રાજસ્થાનમાં અને મધ્યપ્રદેશમાં ભાજપા મોખરે રહેશે એમ લાગે છે. છત્તીસગઢમાં કાંટાની ટક્કર છે, છતાં ભાજપા પણ જીતી શકે તેવું વાતાવરણ છે.

રાજકીય પક્ષોને વિદેશમાંથી કરોડોનું ફંડ કોણે આપ્યું?

આવાજકોણ છે?

અરવિન્દ કેજરીવાલની આમ આદમી પાર્ટી દિલ્હીમાં સારા પરિણામો લાવશે તો તે ૨૦૧૪ની ચૂંટણીઓમાં બીજા રાજ્યોમાં પણ પાંખો પ્રસરાવશે. અરવિન્દ કેજરીવાલ અણ્ણા હજારે દ્વારા શરૂ કરવામાં આવેલા ભ્રષ્ટાચાર વિરોધી અભિયાનની ઉપજ છે. મૂળ તો તેઓ આવકવેરા કમિશનર હતા પરંતુ રાજીનામું આપીને અણ્ણાના આંદોલનમાં જોડાયા હતા. રાજકીય પાર્ટી શરૂ કરવાના મુદ્દે અણ્ણા સાથે મતભેદ થતાં તેઓ હવે અણ્ણાથી અલગ છે. આમ તો તેઓ ભ્રષ્ટાચારના વિરોધી છે પરંતુ ભારતીય જનતા પાર્ટીના નેતા સુબ્રમણ્યમ સ્વામીએ એવો આરોપ મૂક્યો છે કે, કેજરીવાલની આમ આદમી પાર્ટીને “આવાજ” નામની સંસ્થાએ કરોડો રૂપિયાનું ફંડ આપ્યું છે. ઘણા ઓછા લોકો એ વાત જાણે છે કે “આવાજ” નામની સંસ્થા આરબ દેશોમાં આવા જ આંદોલનો ચલાવવા કરોડો રૂપિયાનું ફંડ આપે છે. કેન્દ્ર સરકારે પણ આમ આદમી પાર્ટીને નોટિસ આપી વિદેશોમાંથી પ્રાપ્ત થયેલા ધનનો સ્ત્રોત જાહેર કરવા જણાવ્યું છે. “આવાજ” એક વિદેશી સંસ્થા છે.

૫૦ હજાર કરોડ રૂપિયા

આ અગાઉ પણ કેટલાક સમય પહેલાં સંસદમાં એવી માંગ ઊઠી હતી કે, ભારતમાં કામ કરતી બીન સરકારી સંસ્થાઓ- એન.જી.ઓ.ને જુદાં જુદાં સ્ત્રોતમાંથી બધી મળીને કુલ ૫૦ હજાર કરોડની મદદ મળેલી છે. આ માંગ ભાજપાના વરિષ્ઠ નેતા લાલકૃષ્ણ અડવાણીએ જ કરી હતી. પરંતુ તેની તરફ કોઇએ ધ્યાન આપ્યું નહીં. અણ્ણા હજારેના દિલ્હીમાં જંતરમંતર પરના આંદોલન દરમિયાન અણ્ણા હજારે ઉપવાસ કરી રહ્યા હતા ત્યારે ત્યાં ઉમટેલી હજારોની ભીડને ફૂડ પેકેટ આપવામાં આવી રહ્યા હતા. એ દૃશ્યો જોતાં લાગતું હતું કે, લાખ્ખો રૂપિયા ખર્ચવામાં આવી રહ્યા છે. એ નાણા કેટલીક બીનસરકારી સ્વૈચ્છિક સંસ્થાઓ તરફથી આવ્યા હોવાનું મનાય છે. એ વખતે ભ્રષ્ટાચાર વિરોધી નાણાં લગાવનારા કેટલાક નેતાઓ પણ ચૂંટણીમાં ઝંપલાવશે અને બીનનિવાસી ભારતીયો પાસેથી ફંડ લઇ ચૂંટણી લડવા નીકળશે તેવો ખ્યાલ કોઇને નહોતો. આમાં સહુથી મોટો પ્રશ્ન એ છે કે કોઇપણ બીનનિવાસી બેંકના ખાતામાંથી ફંડ આપી શકે કે કેમ? આવા ધનને કાળું નાણું સમજી શકાય ખરું? આમ આદમી પાર્ટીના જે કહેવાતા બિનનિવાસી ભારતીયો દ્વારા ફંડ એકત્ર કરવાના પ્રયાસને શું હવાલા કારોબાર પણ ગણી શકાય કે કેમ?

વિદેશોને રસ કેમ છે?

 વિદેશી તાકાતો ભારતની રાજનીતિમાં ભરપૂર રસ લઇ રહી છે. નકસલવાદીઓને શસ્ત્રો અને નાણાં પૂરાં પાડે છે, પરંતુ હવે જો એ તાકાતો ભારતની રાજકીય પાર્ટીઓને પણ પૈસા આપતી હોય તો તે એક ભયજનક ચેતવણી છે. વિદેશી તાકાતો ભારતની રાજનીતિને પ્રભાવીત કરવા માંગે છે. ખાસ કરીને ચીન ભારતની લોકતાંત્રિક વ્યવસ્થાને ખતમ કરવા નકસલવાદ અને માઓવાદને બધી જ રીતે પ્રોત્સાહીત કરે છે. ચીન કે બીજી કોઇ છૂપી તાકાતો ભારતની લોકતાંત્રિક વ્યવસ્થાને ખતમ કરી ભારતમાં અરાજકતા લાવવા માંગે છે. આમ આદમીને ભલે એક રૂપિયો જ મળ્યો હોય પરંતુ તેનો સ્ત્રોત જાહેર ના થાય ત્યાં સુધી તે અંગે કહેવું અત્યારે વહેલું હશે. જો વિદેશી ધનનો ઉપયોગ ભારતની ચૂંટણીઓમાં થશે તો ચૂંટાયેલા પ્રતિનિધિઓ વિદેશી તાકાતોની કઠપૂતળી જ બની રહેશે. આ તો સારું થયું કે અણ્ણા હજારે કેજરીવાલ એન્ડ કા.થી સમયસર અલગ થઇ ગયા. કેજરીવાલનું અંગત જીવન સાદગીપૂર્ણ છે, પરંતુ જો તેઓ વિદેશમાંથી ધન મેળવી પાર્ટી ચલાવતા હોય તો તેની તપાસ થવી જરૂરી છે. કેજરીવાલને ભ્રષ્ટાચાર વિરોધી આંદોલન ચલાવવાનો અધિકાર છે, પરંતુ વિદેશી ધનના આધારે તે આંદોલન હોય તો તેમની પ્રામાણિકતા વિશે કોઇને સંદેહ ઊભો થઇ શકે છે.

વેદાન્તા-ડાઉકેમિકલ્સ

ચૂંટણીમાં ફંડ એકત્ર કરવાની બાબતમાં કોંગ્રેસ અને ભાજપા પર પણ આરોપ છે. બંને પક્ષો કરોડો રૂપિયા ચૂંટણી પ્રચાર વખતે વાપરે છે, પરંતુ આ બંને પાર્ટીઓ પર એવો આરોપ મૂકી શકાય તેમ નથી કે તેઓ વિદેશમાંથી ચૂંટણી ફંડ એકત્ર કરે છે. એક વખત ભાજપાએ નાની ભૂલ કરી હતી પરંતુ તરત જ તેણે એ ભૂલ સુધારી લીધી હતી. ભોપાલમાં ગેસ કાંડ કરનાર બદનામ કંપની યુનિયન કાર્બાઇડને ખરીદવાવાળી ડાઉ કેમિકલ્સ કંપનીએ આપેલું ફંડ ભાજપાએ પાછું આપી દીધું હતું.

અલબત્ત, વેદાન્તા કંપનીએ તેની ભારતીય કંપનીઓ દ્વારા કોંગ્રેસ અને ભાજપાને પાંચ-પાંચ કરોડ રૂપિયા ચૂંટણી ફંડ આપ્યું હતું. હા, એ કંપનીએ તેની ભારતીય શાખાની કંપનીઓ દ્વારા એ ફંડ આપ્યું હોઇ તે વિદેશી ધન ગણાય નહીં એવો એ બંને રાજકીય પક્ષોનો દાવો છે. આ બધું જ આર્થિક ઉદારીકરણની ઉપજ છે. બહુ ઓછા લોકોને એ વાતની ખબર છે કે વેદાન્તા જૂથની સ્ટાર લાઇટ ઇન્ડિયા નામની એક કંપનીએ વાજપેઇના શાસન વખતે બાલ્કો નામની કંપની મફતના ભાવે ખરીદી હતી. એ જ રીતે ડાઉ કેમિકલ્સ એ જ કંપની છે જે ભારતમાં એવરેડી ટોર્ચ બનાવે છે. વિદેશી કંપનીઓ ભારતમાં તેની સહાયક કંપનીઓ ખરીદે છે અને તેમના ઉત્પાદનોને ભારત પર લાદી કરોડોનો નફો રળે છે. એ સ્પષ્ટ છે કે આવી કંપનીઓ ભારતની વ્યાપારી પ્રણાલીને પોતાની તરફે રાખવા આવા ચૂંટણી ફંડ આપીને ભારતની રાજનીતિને પ્રભાવીત કરવા પ્રયાસ કરતા હોય છે. સામાન્ય માનવીને તો બિચારાને આ બધી ભીતરની વાતોની ખબર જ હોતી નથી. આ સંજોગોમાં આમ આદમી પાર્ટીને કહેવાતા હવાલા દ્વારા કરોડોનું ધન અમેરિકા અથવા બીજા કોઇ દેશમાંથી મળ્યું હોય તો તેની પૂરેપૂરી તપાસ થવી જોઇએ.

પબ્લિક જાય તેલ લેવા અમને સલામતી આપો

દેશમાં ૫,૦૦૦ જેટલા નેતાઓ પ્રજાના પૈસે સલામતી ભોગવે છે

અમદાવાદ હવે લૂંટફાટનું નગર બની રહ્યું છે. રોજ ધોળા દિવસે લાખોની લૂંટ થાય છે. પહેલાંના જમાનામાં બહારવટીયાઓ રાત્રે ત્રાટકતા હતા. હવે દિવસે ત્રાટકે છે. ભગવાનના મંદિરો પણ સલામત નથી. સ્ત્રીઓના ગળામાંથી રોજ દોરા લૂંટાય છે. રોજ સ્ત્રીઓની ઇજ્જત લૂંટાય છે. દિલ્હીની એક પેરા મેડિકલ વિદ્યાર્થિની પર થયેલા ગેંગ રેપે દિલ્હીના શાસકોને ધ્રૂજાવી દીધા છે. દેશમાં દર ૨૦ મિનિટે એક બળાત્કાર થાય છે. ગુજરાતમાં એકમાત્ર ૨૦૧૧ના વર્ષમાં ૪૩૯ જેટલા બળાત્કારના કિસ્સા નોંધાયા છે. તેમાંથી ૨૬૩ જેટલા બળાત્કાર ૧૮ થી ૩૦ વર્ષની વયની યુવતીઓ પર થયા હતા. ગેંગ રેપની વિરુદ્ધ દિલ્હીમાં હજારો લોકો સડકો પર ઊતરી આવ્યા હતા ત્યારે ગુજરાતમાં બળાત્કારની ઘટનાઓ ચાલુ હતી. પહેલા અંજારમાં એક યુવતી પર બળાત્કાર થયો તે પછી હાલોલમાં તો માત્ર અઢી વર્ષની બાળકી પર બળાત્કાર થયો અને માસુમ બાળકીનું હોસ્પિટલમાં મૃત્યુ નીપજ્યું.

સ્ટેટસ સિમ્બોલ

આવી ઘટનાઓ માટે પોલીસ અને કાનૂનને જવાબદાર ઠેરવવામાં આવે છે. એ વાત સાચી છે કે મોટા ભાગના દૂરના પોલીસ મથકો રાત્રે સૂમસામ થઇ જાય છે. ક્યાંકતો પોલીસ ઊંઘતી જણાય છે. બાકીની પોલીસ બડાખડા નેતાઓની સલામતીમાં વ્યસ્ત જણાય છે. પોલીસ નાગરિકો, મહિલાઓ અને બાળકોને સુરક્ષા બક્ષવાના બદલે એ.કે.૪૭ સાથે માત્ર નેતાઓને જ સુરક્ષા બક્ષતી દેખાય છે. નેતાઓને અપાતી સુરક્ષાનો ખર્ચ પણ પ્રજા જ ભોગવે છે. નેતા પસાર થવાના હોય તો તેમની આસપાસ મોટરકારોનો દોડતો કાફલો હવે વરવો લાગે છે. નેતાઓ પોતાની પ્રતિષ્ઠા વધારવા કે વટ પાડવા આવો કાફલો લઇને નીકળે છે ત્યારે તે કાફલો તેમના સ્ટેટસ દર્શાવવાના બિભત્સ પ્રદર્શન જેવું લાગે છે. કેટલાક નેતાઓ તો માત્ર સ્ટેટસ સિમ્બોલ માટે જ સુરક્ષાના ઘેરામાં રહેવાનો માનસિક આનંદ માને છે.

એમને સુરક્ષા કેમ?

સહુથી પહેલા શ્રીમાન બિટ્ટાની વાત. પંજાબના આ શખસ એક જમાનામાં આતંકવાદી વિરોધી સંસ્થા ચલાવતા હતા. હવે તેઓ ભારે સુરક્ષા હેઠળ રહે છે. તેમને દિલ્હીમાં ભવ્ય બંગલો અને સુરક્ષા પ્રદાન કરવામાં આવ્યાં છે.

શા માટે?

કેટલાક સમય પહેલાં માયાવતી જ્યારે ઉત્તર પ્રદેશના મુખ્યમંત્રી હતા ત્યારે તેની સલામતીના મુદ્દે બહુજન સમાજપાર્ટીએ લોકસભામાં હોબાળો મચાવી દીધો હતો. તેમના પક્ષના સભ્યોએ લોકસભામાં ધાંધલ મચાવી દીધી ત્યારે સરકારે કહેવું પડયું હતું કે, “અમે માયાવતી કે મુલાયમસિંહ-કોઈની યે સુરક્ષા ઘટાડવાના નથી.”

શા માટે?

માયાવતી અને મુલાયમસિંહ- એ બેઉ સામે આવક કરતાં સંપત્તિ વધુ હોવાના કેસો ચાલી રહ્યાં છે. એક માત્ર ઉત્તર પ્રદેશમાં ઊંચામાં ઊંચી વિવિધ પ્રકારની સિક્યોરિટી મેળવતા નેતાઓ ૨૫૦૦ છે. આ બધાને વીઆઈપીની કક્ષામાં મૂકવામાં આવ્યા છે. આ વીઆઈપીઓની સુરક્ષા માટે અત્યંત આધુનિક તાલીમ પામેલા અને ઓટોમેટિક રાઇફલોથી સજ્જ એવા ૩૫૦૦ જેટલા કમાન્ડોઝ ખડેપગે હાજર હોય છે. જાણવા જેવી વાત એ છે કે ઉત્તરપ્રદેશની વસતી જોતાં દર એક લાખ માણસે ૨૫ પોલીસ છે. તેની સામે ૨૫૦૦ જેટલા વીઆઇપીઓ માટે ૩૫૦૦ સશસ્ત્ર કમાન્ડો જ છે. ઉત્તરપ્રદેશમાં એક્સ, વાય, ઝેડ અને ‘ઝેડ પ્લસ સલામતી ધરાવતા ટોચના ૧૧૫ જેટલા ખાસ વીઆઈપીઓની સુરક્ષા માટે રૂ. ૮ થી ૧૦ કરોડનું ખર્ચ આવે છે. માત્ર આ ૧૧૫ વીઆઈપીઓ માટે જ ૨૦૦૦ સશસ્ત્ર ગાર્ડસ દિવસ રાત તૈનાત છે. એક્સ, વાય,ઝેડ અને ઝેડ પ્લસ સિક્યોરિટી ધરાવતા નેતાઓમાં મુલાયમસિંહ યાદવ, રાજનાથ સિંહ, કલ્યાણસિંહ, રામનરેશ યાદવ, વિનય કટિયાર, મુરલી મનોહર જોષી અને અશોક સિંઘલનો સમાવેશ થાય છે. આ સિવાય બીજા કેટલાયે એવા સાંસદો, ધારાસભ્યો, પ્રધાનો, ભૂતપૂર્વ પ્રધાનોને સશસ્ત્ર ગાર્ડસની સલામતી આપવામાં આવી છે. ચોંકાવનારી વાત તો એ છે કે સંદિગ્ધ ચારિત્ર્ય ધરાવતા કેટલાક લોકોને, કોન્ટ્રાકટરોને, વિદ્યાર્થીન્ નેતાઓને તથા વિવાદાસ્પદ રાજકારણીઓને પણ ઉત્તરપ્રદેશની સરકારે ચોવીસે કલાકની સશસ્ત્ર સુરક્ષા પૂરી પાડી છે. તેમાંથી કેટલાક તો ક્રિમિનલ રેકોર્ડસ ધરાવે છે. એક માત્ર યુ.પી.માં જ વી.આઇ.પી.ઓની સલામતી પાછળ પ્રતિવર્ષ રૂ. ૨૦૦ કરોડનું ખર્ચ થાય છે. આ એવા એક રાજ્યની વાત છે જ્યાં માથાદીઠ આવક વર્ષે દહાડે માત્ર ૧૨૦૦ રૂપિયાની છે.

એ કોઈ એસેટ નથી

માયાવતી, મુલાયમસિંહ, જયલલીતા, લાલુ જેવા નેતાઓ તો સત્તા ભૂખ્યાં છે. વરુણ ગાંધીએ એકવાર એક કોમના લોકોના હાથ કાપી નાંખવાની વાત કરી એટલે તેમને સજા કરવાના બદલે કમાન્ડોઝની સુરક્ષા આપી દેવામાં આવી. આ બધા નેતાઓ દેશ માટે કોઇ એસેટ નથી. સત્તા પ્રાપ્તિ સિવાય તેમને કોઇ ધ્યેય નથી. દેશમાં આવું સુરક્ષા ચક્ર ભોગવતા નેતાઓની સંખ્યા ૫૦૦૦ જેટલી થાય છે. હજારો કમાન્ડોઝ તેમની સેવામાં રાતદિવસ તૈનાત રહે છે. પણ રાત્રે ૯ વાગે દિલ્હી જેવા શહેરમાં બસમાં બેસતી એક વિદ્યાર્થિની માટે કોઇ સલામતીની વ્યવસ્થા નથી. અમદાવાદની કેટલીક કોલેજોની બહાર રોજ અસામાજિક તત્ત્વો મોટરબાઇક પર પસાર થતી વિદ્યાર્થિનીઓની અશ્લીલ મશ્કરી કરે છે પણ પોલીસ એમની સાફસુફી કરી શકતી નથી. દિલ્હીમાં સરેરાશ એક નેતા વીઆઇપી દીઠ ત્રણ જવાન સુરક્ષા માટે છે તેની સામે આમ જનતાની વાત કરીએ તો દર ૬૭૩ લોકોએ એક પોલીસની સરેરાશ બેસે છે. લોકોના ગુસ્સાનુ કારણ આ પણ છે. ગુનાખોરીનો રેકોર્ડ ધરાવનાર ધારાસભ્ય કે સાંસદ ગૃહમાં પ્રવેશ કરે છે તો તેની સુરક્ષાની જવાબદારી તેની પોતાની છે. જેમની સામે ક્રિમિનલ કેસો ચાલે છે તેમની સુરક્ષાનુ ખર્ચ પ્રજા શા માટે ભોગવે?

મોરારજી દેસાઇ

અત્રે એ નોંધનીય છે કે મોરારજી દેસાઇ ગમે તેટલા વિવાદાસ્પદ વ્યક્તિ હોય તો પણ તેઓ એકલા ચાલીને દિલ્હીમાં તેમના નિવાસ સ્થાનેથી પાર્લામેન્ટ જતા. તેઓ વડાપ્રધાન બન્યા અને જ્યારે તેઓ મુંબઇ મરીન ડ્રાઇવ પર તેમના નિવાસ સ્થાને જતા ત્યારે તેમના નિવાસસ્થાનની બહાર માત્ર એક જ પોલીસ કોન્સ્ટેબલ દેખાતો. પશ્ચિમ બંગાળમાં માઓવાદીઓ નો આંતક હોવા છતાં પણ પશ્ચિમ બંગાળના મુખ્યમંત્રી મમતા બેનરજી પણ સુરક્ષાના કાફલા વગર જ બહાર નીકળે છે. સુરક્ષા કમાન્ડો વિના જ રહે છે. પૂર્વ સરંક્ષણમંત્રી જ્યોર્જ ફર્નાન્ડિઝ કદીયે સુરક્ષા જવાનોની છાયામાં રહેવાનં પસંદ કર્યું નહોતું. ગુજરાતના પૂર્વ મુખ્યમંત્રી અમરસિંહ ચૌધરીને દિલ્હી હાઇકમાન્ડની સૂચનાથી હટાવવામાં આવ્યા તે પછી માધવસિંહ સોલંકીએ એક પોલીસ જીપ અમરસિંહના ઘરે મોકલી આપી હતી. પોલીસ અધિકારીએ અમરસિંહને કહ્યું કે, ‘સાહેબ, સીએમ સાહેબે આપની સિક્યોરિટી માટે અમને મોકલી આપ્યા છે.’

અમરસિંહે સવિનય ઉત્તર વાળ્યો કે “તમારા સાહેબને કહેજો કે મેં એવાં કોઇ કામ કર્યાં નથી કે મારે મારી સલામતીની જરૂર પડે. તમે પાછા જતા રહો.”

 – અને અમરસિંહ ચૌધરીએ સિક્યોરિટી માટે આવેલી પોલીસજીપ પાછી મોકલી આપી હતી.

આ દેશમાં હવે એક એવા કાનૂનની જરૂર છે કે દેશના આમ આદમીને જેટલી સલામતી છે તેટલી જ સલામતી નેતાઓને પણ અપાય અને તેમને વધારાની સલામતી જોઇતી હોય તો પ્રાઇવેટ કંપનીઓ પાસેથી પોતાના ખર્ચે સલામતી ગાર્ડસ રાખી લે.

Powered by WordPress & Theme by Anders Norén