ડોન દાઉદ ક્રિકેટ રમાડે છે અને દેશ તેને નિહાળે છે !

આઈપીએલના ખેલાડીઓની બોલી રોમન કાળના ગુલામો- સ્ત્રીઓના હરાજી બજારની યાદ અપાવે છે

આઈપીએલ- સિઝન-૬ના ત્રણ ખેલાડીઓ શ્રીસંત, અંકિત ચૌહાણ અને અજીત ચંડિલા સ્પોટ ફિક્સિંગના મામલામાં પકડાઈ ગયા. આશ્ચર્યની વાત એ છે કે, આ ખેલાડીઓ ફિક્સિંગ માટે નાણાંની સાથે છોકરીઓ પૂરી પાડવાની પણ માંગણી કરતા હતા. ફોન ટેપિંગ પરથી માહિતી મળી છે કે શ્રીસંત અને અજીત ચંદેલાને આનંદપ્રમોદ માટે બે સટોડિયાઓએ તેમની હોટલની બે રૂમોમાં ત્રણ વખત છોકરીઓ મોકલી હતી. આઈપીએલ ક્રિકેટ મેચની બાબતમાં રોજેરોજ નવાં પ્રકરણો ખૂલી રહ્યાં છે, એ જોતાં લાગે છે કે,ક્રિકેટની રમત હવે આ દેશ માટે એક ગેમ નહીં પરંતુ દેશના કરોડો ક્રિકેટ પ્રેમીઓને બેવકૂફ બનાવીને આયોજકો, ખેલાડીઓ, સટોડિયા,બુકીઓ અને અંડરવર્લ્ડના માણસો માટે રાતોરાત કરોડો રૂપિયા કમાવાનો ગેરકાનૂની ધંધો બની ગઇ છે. આઈપીએલ ક્રિકેટ સાથે સંકળાયેલા તમામ લોકોએ દેશપ્રેમ, સ્વાભિમાન, રાષ્ટ્રગૌરવ અને કર્તવ્યને નેવે મૂકી દીધા છે. અત્યારે જે પકડાયા છે તે નાની માછલીઓ જ છે, અસલી મગરમચ્છો પકડાવાના બાકી છે.

માસ્ટર માઈન્ડ કોણ ?

સ્પોટ ફિક્સિંગના તાર અંડરવર્લ્ડ સાથે જોડાયેલા છે. ડોન દાઉદ ઈબ્રાહિમનો દુબઈ સ્થિત ખાસ માણસ સુનીલ રામચંદાની સટ્ટા બેટિંગ સિન્ડિકેટનો ખાસ માણસ હોવાનું મનાય છે. પોલીસને શંકા છે કે કેટલાંક બુકીઓ ઘણા નેતાઓ, બિલ્ડરો તથા પોલીસ અધિકારીઓ સાથે ઘરોબો ધરાવે છે. નાણાંની ચુકવણી માટે હવાલા સિસ્ટમનો ઉપયોગ થતો હતો. અબજો રૂપિયાના સટ્ટા નેટવર્કનો દોરી સંચાર કરાંચીના ક્લિફટન એરિયામાં રહેતા ડોન દાઉદના માણસના હાથમાં રહેલો છે. મુંબઈમાં કામ કરી રહેલા બુકીઓએ પોલીસને આપેલી માહિતી પ્રમાણે ડોન દાઉદનો રહસ્યમ માણસ ”ડોક્ટર”ના નામે અંડરવર્લ્ડમાં જાણીતો છે. ડોન દાઉદ કરાંચીમાં છે પણ આખીયે આઈપીએલને તે દુબઈ દ્વારા ઓપરેટ કરે છે. તા.૧૪મી મેના રોજ મુંબઈની પોલીસે રમેશ વ્યાસ નામના એક માણસને તેના બે સાગરીતો સાથે કાલબાદેવી વિસ્તારમાંથી પકડયો હતો. એ પહેલાં દાઉદનો ખાસ વિશ્વાસુ માણસ ફિરોજ અન્સારી પકડાયો હતો. ફિરોજ અન્સારી ડોન દાઉદના ખાસ માણસ છોટા શકીલનો ખાસ માણસ છે. ફિરોજ અન્સારી પકડાઈ જતાં તેનું સ્થાન રમેશ વ્યાસે લીધું હતું અને તે પાકિસ્તાની બુકીઓ અને ભારતીય બુકીઓ વચ્ચેનો સેતુ હતો. તેઓ કોન્ફરન્સ કોલથી વાત કરતા હતા. વ્યાસ અને તેમના માણસો ફોન મ્યુટ કરી દેતા હતા અને કોન્ફરન્સ કોલથી વાત કરતા હોઈ તેમના ભારતીય બુકીઓના સેલ ફોન પર પાકિસ્તાનના બુકીઓના ફોન નંબર કદી પ્રર્દિશત થતા નહોતા. વ્યાસ સાથે જે પાકિસ્તાની બુકીઓ સંપર્કમાં હતો. તેમાં કુમાર, વિકી, જામ્બુ, અનિલ મિયાં, બબલુ, ગુલામ મોહંમદ, ઉમરભાઈ, કાશીફભાઈ, રહેમતભાઈ,જાવેદ અને સલમાનનો સમાવેશ થાય છે. સલમાનનો પિતા હાજી નઈમ પાકિસ્તાનનો જાણીતો બુકી રહ્યો છે અને તે છોટા શકીલના સાગરીત છોટે મિયાંના સીધા સંપર્કમાં હતો. ૨૦૦૯માં નાગપાડા ખાતે છોટે મિયાંની હત્યા થઈ ગઈ તે પછી તેનાં સ્થાને ફિરોજ અન્સારી આવ્યો અને ફિરોજ અન્સારી પકડાઈ જતાં રમેશ વ્યાસ તેના સ્થાને આવ્યો.

અંડરવર્લ્ડની માયાજાળ

ક્રિકેટ જગતમાં અંડરવર્લ્ડની દરમિયાનગીરી પુરાણી છે. સ્પોટ ફિક્સિંગ માટે શ્રીસંત જેવા ક્રિકેટરોને તૈયાર કરવા માટે અંડરવર્લ્ડના માણસો તમામ તરકીબોનો ઉપયોગ કરી રહ્યા છે. માત્ર પૈસા જ નહીં પણ સેક્સની માયાજાળમાં પણ તેમને ફસાવવામાં આવી રહ્યા છે. ધમકીઓથી કામ લેવું તે અંડરવર્લ્ડની પુરાણી આદત છે. ક્રિકેટ તેમના વગર ચાલે જ નહીં તેવી પરિસ્થિતિ અંડરવર્લ્ડ એ પેદા કરી દીધી છે. આપણા ટેલિવિઝન સ્ક્રીન સામે બેસતાં બાળકો, યુવાનો, ક્રિકેટ પ્રેમીઓ તથા હોટલો અને રેસ્ટોરાંના ટીવી સ્ક્રીન સામે ઊભા રહી મેચ જોતા લોકો સમક્ષ જે કોઈ રમત દર્શાવવામાં આવે છે તે અંડરવર્લ્ડ દ્વારા પીરસાતું છેતરામણું મનોરંજન છે. કરાંચીમાં બેઠેલો ડોન દાઉદ તેનો ડાયરેક્ટર, સ્ક્રીપ્ટ રાઈટર, કેમેરામેન, એક્ટર, વિલન અને અસલી પ્રોડયુસર છે. બીસીસીઆઈ,આઈપીએલ અને ખેલાડીઓ તેનાં પ્યાદાં છે. ડોન દાઉદ તેમને જેમ નચાવે તેમ તે બધા નાચે છે અને લોકો તાળીઓ પાડે છે. દાઉદ, બીસીસીઆઈએ અને આઈપીએલએ આખા દેશને એક નશામાં ડૂબાડી દીધો છે. ક્રિકેટના કરોડો ચાહકોને એ વાતની ખબર નથી કે ટેલિવિઝન સ્ક્રીન સામે તેમને જકડી રાખી પાકિસ્તાનમાં બેઠેલો એક માણસ આખા દેશને લૂંટી રહ્યો છે.

૪૦ હજાર કરોડનો ધંધો

ભારતના ક્રિકેટ જગત પર ડોન દાઉદનું રાજ છે. દાઉદના નિયંત્રણ હેઠળનું આ સામ્રાજ્ય રાતોરાત ઊભું થયું નથી. દેશના નેતાઓ, પોલીસ અધિકારીઓ અને સ્થાનિક ગુનેગારોની સાંઠગાંઠથી સજ્જ તેનું નેટવર્ક ભારત, પાકિસ્તાન, દુબઈ અને હવે છેક યુરોપ સુધી વિસ્તર્યું છે. ‘ભાઈ’ શબ્દ મુંબઈના સામાજિક વાતાવરણનો એક હિસ્સો છે. હવે તો મુંબઈમાં બનતી ફિલ્મોના સંવાદો પણ શુદ્ધ હિન્દી કે શુદ્ધ ઉર્દૂમાં બોલાવાના બદલે અંડરવર્લ્ડની ભાષામાં જ બોલાય છે. મુંબઈમાં ગુલશનકુમાર જેવી વ્યક્તિઓ પણ અંડરવર્લ્ડની જંગલિયતના શિકાર બન્યા છે. અંડરવર્લ્ડના ષડયંત્રના કારણે ભરત શાહની ભૂમિકા પણ સંદિગ્ધ રહી છે. અનેક ફિલ્મી કલાકારોએ પણ અંડરવર્લ્ડની દાદાગીરી સામે કાચબાની જેમ રહેવું પડે છે. આ ફિલ્મી કલાકારોએ ડોનના ઈશારે આરબ દેશોમાં શો કરવા પડે છે અને નાચવું પણ પડે છે. કેટલીક ફિલ્મી અભિનેત્રીઓ પણ અંડરવર્લ્ડના લોકો સાથે સંબંધ રાખે છે. આવા ડોન વિદેશની ધરતી પર બેઠાં બેઠાં પોતાની સિન્ડિકેટ ચલાવે છે. તેમાં આઈપીએલના ક્રિકેટરો ફસાઈ જાય તે કોઈ નવી ઘટના નથી. ૪૦ હજાર કરોડનો સટ્ટો ક્રિકેટના નામે થાય તે કોઈ નાની રકમ નથી. લોકો આ જાણતા નથી એવું પણ નથી.

ગુલામોની બોલી

સમાજની રગરગમાં ભ્રષ્ટાચાર ફેલાઈ ગયેલો છે. આઈપીએલની શરૂઆત જ ક્રિકેટની નિર્દોષ ગેમ માટે નહીં પણ જુગાર માટે થઈ હતી. જે રમત માટે ખેલાડીઓની બોલી બોલવામાં આવે તે રોમન સમયની યાદ અપાવે છે. રોમન સમયમાં ગુલામો કે જાનવરોને ખરીદવા હરાજી થતી હતી અને તેમની બોલી બોલવામાં આવતી હતી. તે સમાજની માનસિક વિકૃતિનું બીભત્સ પ્રદર્શન હતું. રોમનકાળમાં સ્ત્રીઓને વેચવામાં આવતી હતી અને ગુલામોને ગ્લેડિયેટર્સ બનાવીને જાહેરમાં વેચવામાં આવતા હતા. આ ગ્લેડિયેટર્સ હજારો માણસની હાજરીમાં એકબીજાની સામે લોહીયાળ તલવાર બાજી કરતાં હતા અને કોઈ પણ એક વ્યક્તિ મૃત્યુ ન પામે ત્યાં સુધી તે ખેલ ચાલું રહેતો હતો. આજે પણ આઈપીએલ ખેલાડીઓની બોલી બોલે છે અને તેમને એકબીજાની સામે, હજારો માણસની સામે રમતના મેદાનમાં ઉતારવામાં આવે છે. ત્રણ હજાર વર્ષ પહેલાંની એ પરિસ્થિતિમાં અને આઈપીએલએ ઊભી કરેલી આજની પરિસ્થિતિ વચ્ચે કોઈ જ ફરક નથી. ગ્લેડિયેટર્સને પણ એરેનામાં સામેના ગ્લેડિયર સાથે જીવલેણ જંગમાં ઉતારતા પહેલાં ખૂબ સારું ભોજન આપવામાં આવતું હતું અને આગલી રાત્રે ખૂબસૂરત યુવતી આપવામાં આવતી હતી. આજે આ જ કામ સટોડિયાઓ કરી રહ્યા છે અને શ્રીસંત, અંકિત ચૌહાણ તથા અજીત ચંદેલા ક્રિકેટ પ્રેમીઓ સાથે દગાબાજી કરવા માટે રમતની આગલી રાતે તમામ અનૈતિક કૃત્ય કરી રહ્યાં છે.

 આઈપીએલનું કડવું સત્ય એ છે કે ભારતનો દુશ્મન નંબર વન -ડોન દાઉદ ક્રિકેટ રમાડે છે અને દેશ તેને નિહાળે છે. કેવી નિઃસહાયતા?