Devendra Patel

Journalist and Author

Tag: love

એવી સ્ત્રી સાથે લગ્ન કરજો જે દુર્ભાગ્યથી વિધવા હોય

કભી કભી – દેવેન્દ્ર પટેલ

અગર મને કાંઈ થઈ જાય તો-
મરણ પથારી પર સુતેલી પરમિન્દરે પતિ પાસેથી એક વચન લઈ લીધું

‘ગયા.’

ભારતના ભાગલા પડયા તે પહેલાં તે ભારતનું જ એક ગામ હતું. ચિનાબ નદીના તટવર્તી ગામો પૈકીનું એક ગામ ”ગયા” ત્યારે જ સુર્ખિયોમાં આવ્યું જ્યારે ડો. મનમોહનસિંહ ભારતના વડા પ્રધાન બન્યા. ડો. મનમોહન સિંહ આ ગામમાં જન્મ્યા હતા. ઈશ્વરસિંહ આનંદ પણ ગામના જ વતની હતા. તેમના એક પુત્રનું નામ હરમીતસિંહ આનંદ. હરમીતસિંહ એક મેડિકલ સ્ટોર ચલાવતો હતો. પુશ્તેની બ્રાહ્મણ પરિવારના હોવાના નાતે તે મૂળ હિન્દુ હતા પરંતુ પાછળથી શીખ ધર્મ અપનાવી લીધો હતો. હરમીત આનંદ હવે વયસ્ક બનતાં તેની શાદી લુધિયાણા સ્થિત ત્રિલોચન ચડ્ડાની પુત્રી પરમિન્દર સાથે કરી દેવામાં આવી. પરમિન્દર કૌર સુંદર, સુશીલ અને સુશિક્ષિત હતી. કુશળ ગૃહિણી પણ હતી. પિતા પણ વ્યાપાર સાથે સંકળાયેલા હોઈ તેના અનુભવનો લાભ પતિને પણ આપવા લાગી.પરમિન્દર વેપારમાં સક્રિય બની. તેનો પતિ હરમીત કહેતોઃ ”પરમિન્દર મારી લાઈફ પાર્ટનર જ નહીં પરંતુ બિઝનેસ પાર્ટનર પણ છે એના વગર હું અધૂરો છું.”

એવી સ્ત્રી સાથે લગ્ન કરજો જે દુર્ભાગ્યથી વિધવા હોય

આવક વધતાં હરમીતે કોટામાં એક નવું ઘર પણ લઈ લીધું. સમયાંતરે પરમિન્દર કૌરે એક પુત્રરત્નને જન્મ આપ્યો. હરમીત- પરમિન્દરના પરિવારમાં હવે આનંદ જ આનંદ હતો, પરંતુ એ આનંદ ઝાઝો ટક્યો નહીં. પરમિન્દર અચાનક બીમાર પડી ગઈ. અનેક ડોક્ટરોને બતાવ્યું પણ તેને સારું થયું નહીં. ડોક્ટરોએ નિદાન કર્યું કે પરમિન્દરને ગર્ભાશયનું કેન્સર છે. પરમિન્દરને ઉપલબ્ધ તમામ સારવાર આપવામાં આવી, પણ તેને સારું ના થયું. દિનપ્રતિદિન તેની તબિયત વધુને વધુ કથળવા લાગી. હવે પથારીમાં જ રહેવા લાગી. પરમિન્દરનું બહાર જવાનું બંધ થઈ ગયું. ધીમે ધીમે પરમિન્દરને ખ્યાલ આવી ગયો કે, ”મારો અંત સમય નજીક આવી ગયો છે.”

એક દિવસ પતિને પલંગમાં પોતાની કરીબ બેસાડી પરમિન્દરે પતિનો હાથ પકડયો. તે બોલીઃ ”મારે એક વાત કરવી છે.”

”બોલ શું વાત કરવી છે ?”

”પહેલાં વચન આપો કે હું જેમ કહીશ તેમ કરશો.” પરમિન્દર બોલી રહી.

”તું કહે… હું તને વચન આપું છું.”

વચનબદ્ધ કરી દીધા બાદ પરમિન્દર ગળગળા સ્વરે બોલીઃ ”અગર મને કાંઈ થઈ જાય તો આપણા દીકરાનો ખ્યાલ રાખજો. જુઓ ! મારા વિયોગમાં ડૂબવાના બદલે આપણા પ્રેમના પ્રતીકરૂપ આપણા બાળકને સાચવજો. મારા મૃત્યુ પછી આપણું બાળક માના પ્રેમથી વંચિત ના રહે તે માટે કોઈ એવી સ્ત્રી સાથે લગ્ન કરજો કે જે દુર્ભાગ્યથી વૈધવ્ય ભોગવી રહી હોય. જેને એક સંતાન પણ હોય અને તેનું સંતાન પુત્રી હોય. જેથી આપણા દીકરાને બહેન મળી રહે.”

બોલતાં બોલતાં પરમિન્દરની આંખમાં આંસુ ઉભરાઈ આવ્યા. હરમીત પણ રડી રહ્યો.

તે ચૂપ રહ્યો.

પરમિન્દર બોલીઃ ”આટલેથી અટકતા નહીં. જીવનની અધવચ્ચે જ જીવનસાથીઓને જોડવાનું કામ કરજો. જોડનહાર બનજો. જીવનયાત્રામાં સાથીના વિયોગને પણ તમારાથી વધુ કોણ સમજી શકશે ? ગુરૂનાનકની વાણી યાદ કરજો.”જો તુઘ ભાવે નાનકા સોઈ ભલી કાર.”

હરમીતસિંહ તો પરમિન્દરની વાત સાંભળી સ્તબ્ધ રહી ગયો. એ બોલ્યોઃ ”પરમિન્દર, તને કાંઈ જ થવાનું નથી.”

પરંતુ પરમિન્દરનો અંદેશો સાચો સાબીત થયો. અંતિમ વાતચીત સમયે જ પરમિન્દરે આંખ મીંચી લીધી અને ત્યારબાદ એણે આંખો કદિયે ના ખોલી. પરમિન્દર મૃત્યુ પામી. હરમીત શોકમાં ડૂબી ગયો. એણે ખાવા-પીવાનું, હસવા- બોલવાનું બધું જ બંધ કરી દીધું. તેના પિતરાઈભાઈ મંજીતસિંહ કાફી તેની કરીબ હતા. તેમણે ખૂબ આશ્વાસન આપ્યું. પરાણે હરમીતને ખવરાવ્યું. શોક પૂરા ત્રણ મહિના ચાલ્યો. હરમીત હજી યુવાન હતો. થોડાક જ મહિના બાદ લગ્ન માટે પ્રસ્તાવ આવવા લાગ્યા. તે સારું કમાતો હતો, સારી પ્રતિષ્ઠા હતી. અન્ય વેપારીઓએ પણ તેને લગ્ન કરી લેવા સલાહ આપી પરંતુ ”પરમિન્દરની જગા કોઈ લઈ શકશે નહીં.” એમ કહી વાત ટાળી દેવા લાગ્યો. વળી નવી પત્ની પોતાના પુત્રને પ્યાર આપી શકશે કે કેમ તે પણ એક સંદેહ હતો. સમય વીતતો રહ્યો. એક રાત એને પરમિન્દર સ્વપ્નમાં આવી. જાણે કે તે કહી રહી હતીઃ ”મને આપેલું વચન પૂરું કરશો ત્યારે જ મારા આત્માને શાંતિ થશે.”

પરંતુ હરમીત કહી રહ્યો હતોઃ ”ક્યાંથી લાવું એવી સ્ત્રી ?”

હરમીતના ચહેરા પર હવે ચિંતા છવાયેલી રહેતી. એને શાદીમાં રસ નહોતો પરંતુ પરમિન્દરને આપેલા વચનની ચિંતા હતી. તેના ભાઈ મંજીતસિંહે કહ્યું: ”ભાઈ, સુખ વહેંચવાથી વધે છે અને દુઃખ વહેંચવાથી ઘટે છે બોલ, શું વાત છે?”

હરમીતે મરતા પહેલાં પરમિન્દરને આપેલા વચનની વાત કરી. મંજીતસિંહે કહ્યું: ”આટલી મોટી વાત છુપાવીને શા માટે ફરે છે?”

મંજીતસિંહે સ્મિત આપ્યું. બીજા જ દિવસથી એણે હરમીત માટે જીવનસંગિનીની શોધ શરૂ કરી, જે વિધવા પણ હોય અને એક પુત્રીની માતા પણ હોય. મંજીતસિંહે હરમીતને કહ્યું હતું : ”તું તારી બધી ચિંતા મારી પર છોડી દે, તારો ભાઈ હજુ જીવે છે. તું વાહેગુરૂનું નામ લે અને ઉદાસી છોડી દે.”

સમય તો પાંખો ફફડાવતો ઉડતો રહ્યો.

એક દિવસ અચાનક મંજીતસિંહ હરમીતના ઘેર પહોંચ્યો. એ બોલ્યોઃ ”હરમીત, તારું કામ થઈ ગયું. જેવું પરમિન્દર ચાહતી તેવી સ્ત્રી મળી ગઈ છે. યુવતીનું નામ મનપ્રીત છે. પિતાનું નામ હનુમંતસિંહ છે. માતાનું નામ હનુમંત કૌર છે. દિલ્હીમાં રહે છે. અચ્છો કારોબાર છે. મનપ્રીતની શાદી એક એન્જિનિયર સાથે થઈ હતી, પરંતુ કાર અકસ્માતમાં તેનું મૃત્યું થઈ ગયું છે. મનપ્રીતને એક દીકરી પણ છે. બોલ શું કરવું છે?”

હરમીત હજી માનસિક રીતે સ્વસ્થ નહોતો. તેની સામે મોટો પ્રશ્ન હતો કે ”સમાજ શું કહેશે? એક વિધવા સાથે લગ્નને સમાજ સ્વીકારશે ?જિંદગી બોઝ તો નહીં બની જાય ને ?”

મંજીતસિંહે આખા પરિવારને વાત કરી, હરમીતના મિત્રોને વાત કરી. શુભચિંતકોને વાત કરી. બધાંએ હરમીતને સલાહ આપીઃ ”હરમીત, સમય બદલાઈ ગયો છે. મનપ્રીત સુંદર છે. યુવાન છે. સુશીલ છે. તારા માટે એકદમ યોગ્ય છે.”

બીજી બાજુ મનપ્રીત પણ તૈયાર નહોતી. તેના માતા-પિતાએ અને સુધારાવાદી શુભચિંતકોએ સમજાવ્યું ”બેટા, એક યુવાન વિધુર સાથે લગ્ન કરવામાં કશું જ અનૈતિક નથી, કોઈ જ અધર્મ નથી. ઈશ્વરની આમ જ ઈચ્છા છે તેમ માનીને આ પ્રસ્તાવ સ્વીકારી લે.”

લાંબા મનોમંથન બાદ મનપ્રીતે મૌન સમર્થન આપ્યું. આખરે રોજ સ્ટેશન રોડ, ગુરૂદ્વારામાં અત્યંત સાદગીથી હરમીત અને મનપ્રીતના લગ્ન સંપન્ન થયાં. લગ્નના થોડાક દિવસ સુધી તો હરમીતને ચિંતા સતાવતી રહી કે, ”લોકો શું કહેશે ?”

પરંતુ ધીમે ધીમે બેઉનું ગૃહસ્થ જીવન ગોઠવાઈ ગયું. મનપ્રીત અત્યંત ડાહી અને સુશીલ નીકળી. એ પોતાની પુત્રીને સાથે લાવી હતી. પરમિન્દરથી થયેલા પુત્રને તેણે પોતાના જ પુત્ર તરીકે અપનાવી લીધો. એક ભાઈને બહેન મળી ગઈ અને બહેનને ભાઈ. બેઉ ખૂબ નાનાં હતાં તેથી જલ્દી એકબીજા સાથે ભળી ગયાં. હરમીત- મનપ્રીતનો સંસાર તો ગોઠવાઈ ગયો પરંતુ એણે પરમિન્દરને આપેલું બીજું વચન હજી તેને યાદ હતું. ”જોડનહાર બનવાનું. પોતાનું ઘર તો વસાવી લીધું. તૂટેલું જીવન તો જોડી લીધું. પરંતુ આવા બીજા તૂટેલાં પાત્રોને જોડવાનાં હજુ બાકી હતાં. હરમીતે મનપ્રીતને પોતે અગાઉની પત્નીને આપેલા વચનની વાત કરી. મનપ્રીતે પણ હરમીતના ધ્યેયને પોતાનું ધ્યેય બનાવી લીધું. તેમણે મિત્રોની મદદથી ”જોડનહાર” નામની એક સંસ્થા ઊભી કરી. આ સંગઠને એવા પાત્રોની ખોજ ચલાવી કે જેઓનું જીવન અધવચ્ચે જ તૂટી ગયું હોય. એક વિધુર હોય ને બીજી વિધવા હોય તો તેમને જોડવાનું કામ શરૂ કર્યું. આ કામ માત્ર શીખ સમુદાય પૂરતું જ સીમિત ના રાખ્યું. તેમણે તમામ ધર્મ કે સમાજ માટે કામ કરવા માંડયું.

હરમીત અને મનપ્રીત દ્વારા ચલાવવામાં આવતા આ અનોખા સંગઠને અત્યાર સુધીમાં પાંચ યુગલોને નવું દામ્પત્યજીવન બક્ષ્યું છે. આંકડો ભલે નાનો હોય પરંતુ શરૂઆત અનોખી છે, ભાવનાત્મક છે. સરાહનીય છે. વૈધવ્ય વિવાહ પ્રતિ લોકોનું વલણ બદલવાની આ કામગીરી પ્રશંસનીય છે. જ્યારે કોઈને કોઈ નવું યુગલ નવેસરથી તૂટેલી જિંદગી શરૂ કરે છે ત્યારે હરમીત અને મનપ્રીત પરમિન્દરની તસવીર સામે ઊભા રહી પરમિન્દરની આંખો સામે એક અંજલિ આપતાં હોય તેમ ઊભાં રહી જાય છે.Ÿ      

– દેવેન્દ્ર પટેલ
www.devendrapatel.in

આજે જ લગ્ન કરી લઈએ કે સંગસંગ આત્મહત્યા કરીએ

કભી કભી – દેવેન્દ્ર પટેલ

  • નીલમ માત્ર ૧૮ વર્ષની કિશોરી હોવા છતાં એની ઉંમર કરતાં વધુ પુખ્ત લાગતી હતી

વિમલકુમાર શર્મા એક નાનકડા ગામની બેંકના મેનેજર છે. એક દિવસ બપોરના સમયે તેઓ કામકાજમાં વ્યસ્ત હતા ત્યાં જ એક અમિત નામનો છોકરો આવ્યો અને કહ્યું: ”અંકલ, તમારી દીકરી નીલમ સિરિયસ છે. જલ્દી હોસ્પિટલ પહોંચો.”

આજે જ લગ્ન કરી લઈએ કે સંગસંગ આત્મહત્યા કરીએ

વિમલકુમાર શર્મા બધું જ કામકાજ પડતું મૂકીને હોસ્પિટલ પહોંચ્યા. ડોક્ટરોએ કહ્યું: ”નીલમે આત્મહત્યા કરવા કોશિશ કરી છે.”વિમલકુમાર શર્મા ગભરાઈ ગયા. નીલમ બેભાન હતી. એના મોં માંથી ફીણ બહાર આવી ગયું હતું. બે ત્રણ હેડકીઓ આવી અને બંધ થઈ ગઈ. ડોક્ટરોએ કહ્યું: ”શર્મા સાહેબ નીલમ હવે નથી.”

નીલમની લાશ પર સફેદ કપડું ઓઢાડી દેવામાં આવ્યું. પોલીસ પણ આવી ગઈ. જરૃરી કાગળીયાં કરી નીલમના મૃતદેહને પોસ્ટમોર્ટમ માટે મોકલી આપ્યો. શર્મા ભાંગી પડયા. તેમના પત્ની માયા દેવી માનસિક રીતે બીમાર રહેતા હતા. નીલમને એક મોટો ભાઈ હતો. રાજેશ, તે પણ આવી ગયો. ૧૮ વર્ષની વયની નીલમ બેહદ સુંદર છોકરી હતી. ભણવામાં પણ તે હોંશિયાર હતી. તે સ્કૂલમાં સારી એથ્લેટ પણ હતી. પિતાને પોતાની પુત્રી પર ગર્વ હતો. નીલમ બધી જ રીતે ડાહી હતી તો એવુ તે શું બન્યું કે તેણે આત્મહત્યા કરી લીધી ! નીલમનું મૃત્યુ આખા ગામમાં ચર્ચાનો વિષય બની ગયો. પોલીસે તપાસ શરૃ કરી. નીલમના પિતાને કોઈની યે પર શંકા નહોતી. પોલીસે પૂછયું: ”નીલમને હોસ્પિટલમાં કોણ લઈ આવ્યું હતું ?”

શર્માએ કહ્યું: ”અમિત”
”અમિત કોણ છે ?”

”મારા પુત્ર રાજેશનો મિત્ર.”

પોલીસે ગામમાં જ રહેતા અમિતને બોલાવી પૂછપરછ શરૃ કરી. અમિતે કહ્યું: ”એ દિવસે સવારે ૧૧-૩૦ વાગે હું મારી મોટરબાઈક પર કામનાથ મંદિર જઈ રહ્યો હતો. હું નીલમના ઘર પાસેથી પસાર થતો હતો ત્યારે મેં જોયું તો નીલમ ઘરની બહાર ઊલટીઓ કરી રહી હતી. નીલમે મને કહ્યું કે એણે ઝેર ખાઈ લીધું છે. મેં તરત જ ઓટો બોલાવી નીલમને હોસ્પિટલમાં ભરતી કરાવી દીધી.”

પોલીસે અમિતને આટલી પૂછપરછ બાદ જવા દીધો. પોલીસ માટે પણ મૂંઝવણ એ હતી કે નિલમે ઝેર કેમ ખાધું ? શું એના ઘરમાં કોઈ લડયું હતું ? સ્કૂલમાં ટીચરે કોઈ ઠપકો આપ્યો હતો ? પણ એવું કાંઈ ના નીકળ્યું. પોલીસે હવે ઘરના જ સભ્યોની પૂછપરછ શરૃ કરી. નીલમની મા માનસિક રીતે બીમાર રહેતી હતી અને સૂઈ જ રહેતી હતી. નીલમે કોઈ સ્યૂસાઈડ નોટ પણ લખી નહોતી. પોલીસે નીલમની બેગ તપાસી. એક નોટના એક પાના પર અનેક જગાએ લખ્યું હતું: ”અમિત આઈ લવ યુ. તું મને છોડી દઈશ તો હું આત્મહત્યા કરી લઈશ.”

પોલીસને લાગ્યું કે, નીલમની આત્મહત્યાનું કારણ અમિત જ લાગે છે. પોલીસે એક રાતે અચાનક જ અમિતના ઘેર દરોડો પાડયો. પોલીસ રાત્રે જ અમિતને પોલીસ સ્ટેશને લઈ ગઈ અને નીલમે ”આઈ લવ યુ લખેલી નોટ બતાવી.” અમિત પણ હજી ૨૦ વર્ષની વયનો જ હતો. પોલીસે કડકાઈથી કામ લીધું અને અમિતે બોલવા માંડયુ.

અમિતે કહ્યું: ”સર, મને મારશો નહીં, હું અને નીલમનો ભાઈ રાજેશ બેઉ મિત્રો છીએ. કોલેજમાં સાથે જ ભણીએ છીએ. દોસ્ત હોવાના નાતે હું એકવાર રાજેશના ઘેર ગયો. મારી નજર નીલમ પર પડી. નીલમની જુવાની ઊભરી રહી હતી. નીલમ મને ગમી ગઈ હતી. મને લાગ્યું કે નીલમ પણ મારી તરફ આર્કિષત થઈ ચુકી હતી. પહેલી મુલાકાતમાં તો અમે આંખોથી જ વાતો કરી. પરંતુ એ પછી હું અવારનવાર રાજેશને મળવાના બહાને નીલમના ઘેર જવા લાગ્યો.

એક દિવસ નીલમ એકલી જ ઘરમાં હતી. મેં એને કહ્યું : ”નીલમ આઈ લવ યું. હું તને જ મળવા આવ્યો છું.”

અને નીલમ કોઈ પણ જવાબ આપ્યા વિના મીઠું સ્મિત આપીને જતી રહી. પરંતુ એના રૃમમાં જઈ મેં નીલમને પકડી લીધી. મેં નીલમને પૂછયું: ”બોલને નીલમ…. પ્લીઝ!”

”શું ?”
” તું મને ગમે છે. શું તને હું ગમું છું ?”

એણે માત્ર માથું હલાવી હા પાડી અને ફરી તે ડ્રોઈંગરૃમમાં દોડી ગઈ. એ પછી હું નીલમ એકલી જ ઘરે હોય ત્યારે મળવા જતો. ત્યારપછી અમે બહાર પણ મળવા લાગ્યા.નજીકના ટાઉનમાં જઈ સાથે પિકચર પણ જોતા. કોઈ વાર ગાર્ડનમાં મળતાં. નીલમના પપ્પા બેંકમાં ગયા હોય અને તેનો ભાઈ નોકરીએ જતો હોઈ અમને મળવાનું અનુકૂળ રહેતું. નીલમની મમ્મી એના બેડરૃમમાંથી બહાર આવી શક્તી જ નહોતી. હું નીલમના સૌંદર્ય પાછળ પાગલ હતો. દિવસો જતાં મારી અને નીલમ વચ્ચેની તમામ મર્યાદાઓ તૂટી ગઈ. આ સિલસિલો જારી રહ્યો. નીલમ હવે મારા વગર રહી શક્તી નહોતી. એનો આગ્રહ હતો કે હું તેને રોજ મળું. તેણે કોલેજ ભણવાનું શરૃ કર્યું હતું. પરંતુ ગમે તે કારણસર તેને હવે ભણવા કરતાં મારી સાથે જલ્દી લગ્ન કરી લેવામાં વધુ રસ હતો. પહેલાં તો મેં કહ્યું કે ”નીલમ, હજી તારીને મારી ઉંમર ઓછી છે.”

તો નીલમ કહેતીઃ ”મને તેની પરવા નથી. મને હવે ભણવા કરતાં તારામાં વધુ રસ છે. હું તને દિવસમાં એક વાર જોતી નથી તો રહી શક્તી નથી. મને બધી જ રીતે તું રોજ જોઈએ.”

મને લાગ્યું કે નીલમના શારીરિક આવેગો અતિ તીવ્ર હતા. શાયદ તે ઉંમર કરતાં વધુ વહેલી પુખ્ત થઈ ગઈ હતી. એની રોજેરોજની માગણીને હું સંતોષી શક્તો નહોતો કારણ કે રોજ મારી પાસે એવો સમય નહોતો. માત્ર શારીરિક રીતે જ નહીં પરંતુ માનસિક રીતે લાગણીઓથી પણ મારી સાથે વણાઈ ચુકી હતી. નીલમે કહ્યું: ”હું લગ્ન કરીશ તો તારી સાથે જ નહીંતર આત્મહત્યા કરી લઈશ.”

હું ગભરાઈ ગયો. મારી અને નીલમની જ્ઞાતિ અલગ હતી. મારા માતા-પિતા આ લગ્નને કદી માન્ય રાખવાના નહોતા. હું નીલમનો બોય ફ્રેન્ડ જ બની રહેવા માગતો હતો પણ તે એથી આગળ વધી ચુકી હતી. મેં એક દિવસ કહ્યું: ”નીલમ તારી અને મારી બિરાદરી અલગ છે, બંને જ્ઞાતિઓ આ આપણા લગ્નને માન્ય રાખશે નહીં.”

ત્યારે એ બોલી હતીઃ ”જો અમિત, હું તને બે મર્યાદ મહોબ્બત કરું છું. તું જ્ઞાતિ કે કોમનું બહાનું કાઢીને છટકવાનો પ્રયાસ કરીશ તો હું આત્મહત્યા કરી લઈશ. મારી પાસે જે હતું એ બધું જ તને સોંપી દીધું છે. તેથી મારી સાથે દગો કરતો નહીં.”

હું સમજી ગયો કે જે છોકરીને હું સમય પસાર કરવાનું કે આનંદનું સાધન સમજતો હતો તે હવે મારા પ્રત્યેના પ્રેમમાં વધુ પ્રગાઢ હતી અને એ રીતે સમય પસાર થતો રહ્યો. નીલમની માગણી મુજબ લગભગ રોજ મારે એના ઘેર જવું પડતું. એની માનસિક લાગણીઓને તથા શારીરિક જરૃરિયાતોને સંતોષવી પડતી. પરંતુ હવે હું એનાથી ઉબાઈ ગયો હતો. વળી નીલમ તેની ઉંમર કરતાં યે વધુ વયસ્ક લાગતી હતી.

એક દિવસ નીલમે મને કહ્યું: ”અમિત, મારા ઘરમાં મારા ભાઈને મારી પર શક થવા લાગ્યો છે. મારા પર્સમાં ગર્ભ નિરોધક ટેબ્લેટ તે જોઈ ગયો છે. એણે મારા પપ્પાને ફરિયાદ કરી. મારા પપ્પાએ પણ મને ખૂબ મારી હતી. હવે એ લોકો શોધે છે કે મારે કોની સાથે સંબંધ છે? તેથી હવે આપણે જ આપણા ઘરમાં જ વાત કરી દઈએ કે આપણે પરણી જવા માંગીએ છીએ.”

મેં કહ્યું: ”આટલું જલ્દી ?”

નીલમે કહ્યું: ”હા… બે દિવસ પછી મને છોકરો જોવા આવવાનો છે. હું બીજાની સાથે રહી નહીં શકું. હું ભાગીને તારી સાથે લગ્ન કરી લેવા માંગુ છું. આજે રાત્રે જ નિર્ણય લેવાનો છે. કાલે ભાગીને લગ્ન કરી લઈએ અથવા બેઉ જણ સાથે આત્મહત્યા કરી લઈએ. તેં અને મેં સાથે જ જીવવાની ને સાથે જ મરવાની કસમ ખાધી છે યાદ છે ને!”

”પણ…?”

”પણ ને બણ નહીં ચાલે તારે મારી સાથે આજે જ લગ્ન કરવાં પડશે અથવા મારી સાથે આજે જ આત્મહત્યા કરી લેવી પડશે.”

નીલમની આંખો જોઈ હું ગભરાઈ ગયો. થોડીક ક્ષણો સુધી કાંઈક વિચાર્યા બાદ મેં પણ મનમાં એક નિર્ણય લઈ લીધો. મેં કહ્યું :”ઠીક છે નીલમ. આપણાં લગ્ન શક્ય નથી. તો સાથે જ જીવનનો અંત લાવી દઈએ. હું કાલે ઝેર લઈને આવીશ. કાલે સાથે જ પી લઈશું અને સાથે જ ઉપર જઈશું.”

નીલમ સાથે મરવાની વાત સાંભળીને રાજી થઈ. મેં તેને એક ચુંબન કર્યું. એણે પણ મને વહાલ કર્યું. નીલમે કહ્યું: ”કાલે ૧૧ વાગે હું તારી રાહ જોઈશ.”

બીજા દિવસે સવારે હું જંતુનાશક દવાની દુકાનેથી ઝેરી દવા લઈ આવ્યો.એ દિવસે ઘરમાં નીલમ મારી રાહ જોતી હતી. તેની બીમાર મા એના રૃમમાં સૂઈ ગઈ હતી. મેં બે ગ્લાસ મંગાવ્યા. બંને ગ્લાસમાં ઝેરી દવા રેડી, મેં નીલમ સામે જોયું. એ મને ભેટી પડી. એ બોલીઃ ”વહાલા, આવતા ભવમાં પણ આપણે સાથે જ રહીશું.” એમ કહેતાં તે મારા પગે પડી. તે પછી મેં ગ્લાસ લીધો. એણે પણ ગ્લાસ હાથમાં લીધો. એણે કહ્યું: ”ચાલ શરૃ કર.”

મેં કહ્યું: ”પહેલાં તું,નીલમ.”

નીલમ બોલીઃ ”મને વાંધો નથી. તું કહે તે બધું જ કરવા તૈયાર છું.” એમ કહેતા એણે ઝેર ગટગટાવી દીધું. પણ મેં ગ્લાસ ફેંકી દીધો. હું મરવા માંગતો જ નહોતો. નીલમથી છુટકારો મેળવવા મેં આ પ્લાન કર્યો હતો કે નીલમ પહેલાં ઝેર પી લે અને મારે ગ્લાસ ઢોળી દેવો. અને થોડી જ ક્ષણોમાં ચીસો પાડીને નીલમ બેભાન થઈ ગઈ. અને હું જ તેને હોસ્પિટલ સુધી લઈ આવ્યો.”

અમિતે એની વાત પૂરી કરી. પોલીસ સ્તબ્ધ થઈને વાત સાંભળી રહી. પરંતુ પોલીસ અધિકારીએ પૂછયું: ”મરતી વખતે નીલમના ભાવ કેવા હતા ?”

અમિત બોલ્યોઃ ”એની આંખોમાં આંસુ હતાં. મેં કરેલા દગા બદલ એની આંખોમાં અફસોસ હતો. પરંતુ તે લાચાર થઈને મને જોઈ રહી હતી અને હું એને તરફડતી જોઈ રહ્યો હતો. હું મારી જાતને કદી માફ કરી શકીશ નહીં.

અને અમિત પણ ભાંગી પડયો. નીલમને આત્મહત્યામાં મદદ કરવા બદલ તેની ધરપકડ કરવામાં આવી.

 
– દેવેન્દ્ર પટેલ
www.devendrapatel.in

સૌંદર્ય સામ્રાજ્ઞી સાથે એક અસુંદર છલના

એનું નામ છે : જિના લોલોબ્રિગીડા.

એક જમાનાની ‘મોસ્ટ બ્યૂટીફૂલ વૂમન ઓફ ધી વર્લ્ડ’ તરીકે જાહેર થયેલી જિના લોલોબ્રિગીડા એક ઇટાલિયન ફિલ્મસ્ટાર છે. ૧૯૫૦ના ગાળામાં ‘ગોડેસ ઓફ સ્ક્રીન’ તરીકે પંકાયેલી જિના લોલોબ્રિગીડાની વય આજે ૮૫ વર્ષની છે. આ ઉંમરે પણ તેની સાથે તેના એક પૂર્વ બોયફ્રેન્ડે તેની જાણ બહાર જ તેની સાથે સિક્રેટ મેરેજ કરી લીધું હોવાની અજીબોગરીબ ઘટનાએ ઇટાલીથી માંડીને છેક હોલિવૂડમાં રસપ્રદ ચર્ચા જગાવી છે. જિના લોલોબ્રિગીડા હાલ ઇટાલીમાં સિસિલીના એક ભવ્ય ફાર્મહાઉસ, રોમના ‘વીપા એપિના એન્ટિકા’નામના વિલા અને મોન્ટેકાર્લોના એક ભવ્ય વિલામાં રહી તેનું સિક્રેટ જીવન પસાર કરે છે. એક દિવસ અચાનક જ તેને ખબર પડી કે,તેના પૂર્વ બોયફ્રેન્ડ જેવિયર રાફોલે તેની સાથે લગ્ન કરી લીધાનાં દસ્તાવેજો રજિસ્ટર કરાવી લીધા છે.

જેવિયર રાફોલ જિના લોલોબ્રિગીડાથી ૩૪ વર્ષ નાના છે અને સ્પેનિશ બિઝનેસમેન છે. જેવિયરની ઉંમર હાલ ૫૧ વર્ષની છે. જિના લોલોબ્રિગીડા કહે છે : “જેવિયર રિગાઉ રાફોલ એક જમાનામાં મારો મિત્ર હતો એ વાત સાચી, પરંતુ મેં તેની સાથે કદીયે લગ્ન કર્યાં નથી. અમે વર્ષો સુધી સાથે રહ્યાં છીએ અને કેટલાંયે વર્ષોથી છૂટાં પણ પડી ગયાં છીએ. જો જેવિયરે મારી સાથે લગ્ન ક્યાંય રજિસ્ટર કરાવ્યાં હોય તો તે મારી સાથે થયેલું ફ્રોડ-છળકપટ છે. મારી પરવાનગી વિના જ આમ થયું છે અને હું સમજું છું કે, મારા મૃત્યુ પછી જેવિયર મારી સંપત્તિનો માલિક-વારસદાર બની જાય તે હેતુથી જ તેણે આ ફ્રોડ કર્યું છે. જેવિયર સ્પેનિશ છે અને તે જ્યારે મારો બોયફ્રેન્ડ હતો ત્યારે મારા કેટલાક કાનૂની કેસોમાં તે મને મદદ કરતો હતો. મેં તેને પાવર ઓફ એટર્ની પણ આપી રાખ્યો હતો. એક વખત તેણે મને કેટલાંક ફોર્મ પર સહી કરવા કેટલાક કાગળો મને મોકલી આપ્યા હતા. એ ફોર્મ સ્પેનિશ ભાષામાં હતાં. હું સ્પેનિશ જાણતી નથી. એ ફોર્મ પર મેં સહીઓ કરી હતી, પણ મને ખબર નથી કે તેમાં શું હતું ? આ સમગ્ર કાવતરાની મેં તપાસ માગી છે.”

એક જમાનાની ખૂબસૂરત અભિનેત્રી સાથે તેની જાણ બહાર જ લગ્નનાં કાગળો ઊભાં કરવા માટે જિના લોલોબ્રિગીડાના પૂર્વ બોયફ્રેન્ડ જેવિયરે જિના લોલોબ્રિગીડા જેવી જ દેખાતી કોઈ સ્ત્રીનો ઉપયોગ કર્યો હોવાનું મનાઈ રહ્યું છે. મેડ્રિડ-સ્પેનમાં રહેતા એક સ્પેનિશ ધારાશાસ્ત્રીના જણાવ્યા અનુસાર “જેવિયરે અસલી જિના લોલોબ્રિગીડા સાથે બનાવટી લગ્ન કરવા માટે જિના જેવી દેખાતી કોઈ સ્ત્રીનો પૈસા આપી ઉપયોગ કર્યો હતો. લગ્નનાં કાગળો રજૂ કરવા એણે જિના લોલોબ્રિગીડાની કહેવાતી સહીવાળા અસલી કાગળો રજૂ કર્યા હતા. જેવિયર સ્પેનની હાઈ સોસાયટીમાં ફરતો-પાર્ટીઓમાં ઘૂમતો માણસ છે.”

કહેવાય છે કે, જિના લોલોબ્રિગીડા અને જેવિયરના મિત્રતાપૂર્ણ સંબંધો ૨૦ વર્ષ ટક્યા હતા. એક તબક્કે તે તેની સાથે લગ્ન કરવા પણ વિચારતી હતી, પરંતુ પાછળથી તેણે વિચાર બદલ્યો હતો અને એ સંબંધોનો ૨૦૦૬માં અંત આવી ગયો હતો.

જિના લોલોબ્રિગીડાનો જન્મ ઇટાલીના સુબિઅકો ખાતે થયો હતો. તેના પિતા એક ફર્નિચર મેન્યુફેક્ચરર હતા. એક નાનકડા ગામમાં તેનો ઉછેર થયો હતો. તેણે મોડેલિંગથી તેની કારકિર્દીની શરૂઆત કરી હતી. તે પછી ઇટાલીમાં યોજાતી સૌંદર્ય સ્પર્ધાઓમાં તે ભાગ લેતી રહી. ૧૯૪૭માં તેણે ‘મિસ ઇટાલી’ સ્પર્ધામાં ભાગ લીધો પણ ત્રીજા નંબરે આવી. એ પછી એને ઇટાલિયન ફિલ્મોમાં કામ મળ્યું. ૧૯૪૯માં એણે મિલ્કો સ્કોફિડ નામના યુગોસ્લોવિયન સાથે લગ્ન કર્યાં. તેનાથી તે એક પુત્રની માતા બની. તેમનું આ લગ્નજીવન ૨૪ વર્ષ ટક્યું. તે પછી છૂટાછેડા થઈ ગયા. ૧૯૬૦ના ગાળામાં વિશ્વનું પ્રથમ હૃદય ટ્રાન્સપ્લાન્ટ કરનાર ડો. ક્રિશ્ચિયન બર્નાડ સાથે પણ તેને એફેર હોવાની વાતો સંભળાતી હતી. તે પછી સ્પેનિશ બિઝનેસમેન જેવિયર રિગાઉ રાફોલના સંપર્કમાં આવી અને બેઉ એકબીજાના પ્રેમમાં પડી ગયાં. પૂરાં ૨૦ વર્ષ સુધી તેઓ એકબીજાના કંપેનિયન થઈને રહ્યાં.

૧૯૫૫માં જિના લોલોબ્રિગીડાની ફિલ્મ ‘બ્યૂટીફૂલ બટ ડેન્જરસ’ રજૂ થઈ અને એ ફિલ્મ પછી તે વિશ્વની સૌથી સુંદર સ્ત્રી તરીકે નામના પામી. એ ફિલ્મ બાદ જ જિનાને ‘લોલો’ એવું તખલ્લુસ આપવામાં આવ્યું. જિના ટિપિકલ ઇટાલિયન બ્યૂટી ધરાવતી હતી. માથામાં વાંકડિયા વાળની ખાસ સ્ટાઈલ માટે ઇટાલીમાં ‘લોલો’ શબ્દપ્રયોગ થાય છે. ૧૯૬૧માં હોલિવૂડના સુપ્રસિદ્ધ એક્ટર રોક હડસન સાથે તે ‘કમ સપ્ટેમ્બર’ નામની સુપરહિટ ફિલ્મમાં ચમકી. આ ફિલ્મે ગોલ્ડન ગ્લોબ એવોર્ડ મેળવ્યો. એણે યુલબ્રીનર સાથે’સોલોમન એન્ડ શીબા’ ફિલ્મમાં કામ કર્યું. તેણે ક્વિન શીબાનો રોલ કર્યો. એ જમાનાના મશહૂર કલાકારો ફ્રેન્ક સિનાત્રા, ટોની કર્ટીસ, બર્ટ લેન્કેસ્ટર અને બોબ હોપ સાથે પણ કામ કર્યું. જિના લોલોબ્રિગીડાએ ફાલ્કન ક્રેલ્ટા જેવી ટી.વી. સિરિયલમાં પણ કામ કર્યું.

બહુ ઓછા લોકોને એ વાતની ખબર છે કે, ૧૯૭૦માં તેની ફિલ્મી કારકિર્દી મંદ પડી ત્યારે જિનાએ ફોટો જર્નાલિઝમ શરૂ કર્યું. એણે પોલ ન્યૂ મેન, સાલ્વાડોર ડાલી, હેન્રી કિસીંજર, ઓડ્રી હેપબર્ન અને એલા ફિટઝગેરાલ્ડની પણ એક્સક્લુઝિવ ફોટોગ્રાફી કરી. ક્યૂબાના સરમુખત્યાર ફિડલ કાસ્ટ્રોનો એક્સક્લુઝિવ ઇન્ટરવ્યૂ લઈ એણે વિશ્વના અખબારજગતને સ્તબ્ધ કરી દીધું હતું.

જિના લોલોબ્રિગીડા ૧૯૯૭ પછી નિવૃત્ત જીવન ગાળે છે. રોમ અને મોન્ટેકાર્લોના તેના ભવ્ય વિલામાં કોઈનેય પ્રવેશ નથી. જિના લોલો ખુદ એક શિલ્પકાર છે. તેનું ઘર ભાતભાતનાં શિલ્પોનું સંગ્રહસ્થાન પણ છે. તેનાં ત્રણ પુસ્તકો જાણીતાં છે (૧) ‘ઇટાલિયન મિઆ’ કે જે તેણે લીધેલી ઇટાલીની તસવીરોનો સંગ્રહ છે. (૨) વન્ડર ઓફ ઇનોસન્સ : તે અન્ય ફોટોગ્રાફ્સનો સંગ્રહ છે (૩) ત્રીજું પુસ્તક ‘સ્કલ્પ્ચર ૨૦૦૩’ છે.

તે કહે છે : “લોકપ્રિયતાની એક ઊજળી બાજુ છે, તે ઘણાં દ્વાર ખોલી નાખે છે, પરંતુ બીજી વાસ્તવિકતા એ પણ છે કે, મને મારી લોકપ્રિયતા ગમતી નથી. લોકપ્રિયતા તમારી પ્રાઈવેટ લાઈફને સીમિત કરી દે છે. ‘૫૦ અને ‘૬૦ના વર્ષોમાં બનતી ફિલ્મો અને આજની ફિલ્મોમાં ઘણો ફરક છે.”

આવો ભવ્ય અને રોમાન્સસભર ભૂતકાળ ધરાવતી ઇટાલીની એક જમાનાની સૌંદર્ય સામ્રાજ્ઞાી હવે તેના પૂર્વ બોયફ્રેન્ડ જેવિયર સાથે બનાવટી લગ્નનું ફ્રોડ કરવા બદલ કોર્ટમાં જઈ રહી છે અને રોમની પોલીસ સમક્ષ ફરિયાદ પણ નોંધાવી દીધી છે. જિના કહે છે : “મારે ઘણા પ્રેમીઓ હતા. હજુ પણ છે. હું બહુ જ સ્પોઈલ્ડ લેડી છું. મારે ઘણા પ્રશંસકો પણ છે. અલબત્ત, મારે જે કરવું હોય તે હું કરું જ છું.”

યાદ રહે કે, જિના લોલોબ્રિગીડાની ઉંમર અત્યારે ૮૫ વર્ષની છે.

– દેવેન્દ્ર પટેલ

Powered by WordPress & Theme by Anders Norén