બીસીસીઆઈના બોસ 'NS' ગુડ ફ્રેન્ડ એન્ડ બેડ એનિમી

બીસીસીઆઈના પ્રેસિડેન્ટ શ્રીનિવાસન જ્યારે પણ વિદેશ જાય છે ત્યારે દુબઈ કેમ રોકાય છે?

દિલ્હી પોલીસે આઈપીએલ ક્રિકેટ મેચમાં સ્પોટ ફિક્સિંગ કરનારાઓને શોધી કાઢયા બાદ જે રીતે દેશના ઇલેક્ટ્રોનિક્સ મીડિયામાં ઊહાપોહ મચ્યો હતો તે જોતાં લાગતું હતું કે, દેશના લોકોને હવે આઈપીએલ દ્વારા રમાડવામાં આવતી ક્રિકેટ મેચ જોવામાં કોઈ રસ રહેશે નહીં,પરંતુ મીડિયાની ધારણા કરતાં બન્યું ઊંધું. દેશના કરોડો લોકોએ બે પ્રકારનો ખેલ માણ્યો. એક તો કોલકાતાના ઇડન ગાર્ડન પર રમાયેલી મેચ અને બીજી ક્રિકેટના ગ્રાઉન્ડની બહાર બીસીઆઈના મેદાનમાં રમાયેલી રાજકીય મેચ. કોલકાતાના ઇડન ગાર્ડન પર રમાયેલી મેચ જોવા જે માનવમેદની ઊભરી તે દર્શાવે છે કે, સટ્ટો રમો, જુગાર રમો, મેચ ફિક્સ કરો- જે કરવું હોય તે કરો, અમે તો મેચ જોઈશું જ. એ વાત સાચી છે કે, ક્રિકેટ એ આ દેશની અત્યંત લોકપ્રિય રમત છે. ગરીબમાં ગરીબ માણસથી માંડીને તવંગરો પણ ક્રિકેટને માણે છે. આઈપીએલ ભલે કેટલાક લોકો માટે ધંધો હોય, પરંતુ લોકોને ફાસ્ટ બોલિંગ અને ચોગ્ગા તથા છગ્ગાની થ્રીલ માણવી ગમે છે. ચિયર લીડર્સ ગર્લ્સના ડાન્સ જોવા ગમે છે. બીજા શબ્દોમાં એમ કહી શકાય કે, લોકોએ હવે સટ્ટો, જુગારને અને મેચ ફિક્સિંગને ક્રિકેટના એક હિસ્સા તરીકે સ્વીકારી લીધો છે. લોકોને માત્ર અને માત્ર મનોરંજન જોઈએ છે અને તે આઈપીએલે પૂરું પાડયું છે.

શ્રીનિવાસન-ધી બોસ

હવે વાત ક્રિકેટના ગ્રાઉન્ડ બહાર ખેલાયેલી રાજરમતની. સૌથી પહેલાં જાણી લેવું જોઈએ કે, બીસીસીઆઈના બોસ એન. શ્રીનિવાસન છે કોણ ? તેઓ ઇન્ડિયા સિમેન્ટ કાં.ના વાઈસ ચેરમેન અને મેનેજિંગ ડિરેક્ટર છે. આ કંપની તેમના દાદાએ સ્થાપી હતી. આજકાલ તેઓ બોર્ડ ઓફ કંટ્રોલ ફોર ક્રિકેટના પ્રમુખ છે. બીસીસીઆઈ વિશ્વની સૌથી શક્તિશાળી ક્રિકેટ જગતની સંસ્થા છે. ૨૦૦૧માં તેઓ તમિળનાડુ ક્રિકેટ એસોસિયેશનના વાઈસ પ્રેસિડેન્ટ બન્યા હતા. ૨૦૦૨માં એ. સી. મુથૈયાની ટર્મ પૂરી થતાં એન. શ્રીનિવાસન તમિળનાડુ ક્રિકેટ એસોસિયેશનના પ્રમુખ બન્યા. એ પછી બીસીસીઆઈના એ વખતના બોસ જગમોહન દાલમિયાને હટાવવાની ઝુંબેશમાં શરદ પવાર, શશાંક મનોહર અને લલિત મોદીની સિન્ડિકેટમાં જોડાયા. ૨૦૦૫માં શરદ પવાર બીસીસીઆઈના પ્રમુખ બન્યા અને એન. શ્રીનિવાસન ખજાનચી બન્યા. ૨૦૦૮માં એન. શ્રીનિવાસનની માલિકીની કંપની ઈન્ડિયા સિમેન્ટે આઈપીએલની એમ. એસ. ધોનીના નેતૃત્વ હેઠળની આઈપીએલની ચેન્નાઈ સુપરકિંગ ટીમ ખરીદી. ૨૦૦૯માં એન. શ્રીનિવાસને તેમના જમાઈ મય્યપન ગુરુનાથની ચેન્નાઈ સુપરકિંગ ટીમના વડા તરીકે નિમણૂક કરી. ૨૦૧૧માં એન. શ્રીનિવાસન બીસીસીઆઈના પ્રેસિડેન્ટ બન્યા. ૨૦૧૨માં તેમણે બીસીસીઆઈના બંધારણમાં સુધારો કર્યો જેના કારણે કોઈપણ પ્રેસિડેન્ટ ત્રણ વર્ષની ટર્મ પૂરી કર્યા પછી પણ એ હોદ્દો ધારણ કરી શકે અને એ રીતે તેઓ બીસીસીઆઈના મોસ્ટ પાવરફૂલ ‘બિગ બોસ’ બની ગયા.

સીબીઆઈની તપાસ

એન. શ્રીનિવાસન ગોલ્ડન ટચ ધરાવતા એક સફળ બિઝનેસમેન છે, પરંતુ તેમણે કમાયેલા નાણાંની પાછળ કેટલાક આરોપો પણ છે. આંધ્રપ્રદેશમાં જ્યારે વાય.એસ.આર. રેડ્ડીનું શાસન હતું ત્યારે એ સરકાર તરફથી તેમને કેટલીક ખાસ ફેવર કરીને કેટલાક લાભ ખટાવી આપ્યાની બાબતમાં તેમની સામે સીબીઆઈની તપાસ ચાલી રહી છે. ખાસ કરીને વાયએસઆરના પુત્ર જગનમોહન રેડ્ડીની સંપત્તિના કેસમાં તેમની સંડોવણીની તપાસ થઈ રહી છે. તેમની સામે એવો આરોપ છે કે, ઇન્ડિયા સિમેન્ટને રેડ્ડી સરકારે કેટલાક લાભ ખટાવી આપ્યા તેના બદલામાં એન. શ્રીનિવાસને જગનમોહન રેડ્ડીની ‘જગતી પબ્લિકેશન્સ’ કંપનીમાં રૂ. ૧૪૦ કરોડનું મૂડીરોકાણ કર્યું હતું. જગનમોહનની આ કંપની તેલુગુ ભાષામાં સાક્ષી તેલુગુ નામનું દૈનિક ચલાવે છે. કહેવાય છે કે, રેડ્ડી સરકારે એન. શ્રીનિવાસનની સિમેન્ટ કંપની માટે ૬૦ એકર જમીન બજારભાવ કરતાં માત્ર એક ટકાના ભાવે ફાળવી આપી હતી. સિમેન્ટ કંપની માટે પાણી પણ મફતના ભાવે આપેલું છે. આ સંદર્ભમાં તપાસ માટે સીબીઆઈએ જૂન, ૨૦૧૨માં એન. શ્રીનિવાસનને હૈદરાબાદ ખાતે બોલાવી પૂછપરછ કરી હતી. અલબત્ત, તેમની અટકાયત કરી નહોતી. તેમની સામે આરોપ છે કે, વાયએસઆર જ્યારે આંધ્રના મુખ્યમંત્રી હતા ત્યારે એન. શ્રીનિવાસનની સિમેન્ટ કંપની માટે રોજનું ૧૦ હજાર ગેલન પાણી ક્રિશ્ના નદીમાંથી ફાળવી આપ્યું હતું. તે પછી વાયએસઆરની સરકારે ફરી એકવાર એન. શ્રીનિવાસનની કંપનીને કંગના નદીમાંથી રોજનું ૧૩ મિલિયન ક્યૂબીક ફીટ પાણી ખેંચી લેવાની પરવાનગી આપી હતી. પ્રાપ્ત માહિતી અનુસાર સીબીઆઈ એન. શ્રીનિવાસન સામે ચાર્જશીટ પણ તૈયાર કરી રહી છે અને વાયએસઆર રેડ્ડીના પુત્ર જગનમોહન રેડ્ડીની જેમ એન. શ્રીનિવાસનની પણ ધરપકડ કરવા વિચારી રહી છે.

ગુડ ફ્રેન્ડ-બેડ એનિમી

એન. શ્રીનિવાસનને એક ક્રૂર બોસ તરીકે લોકો ઓળખે છે. તેમની આસપાસના લોકો તેમને ‘એનએસ’ના નામે બોલાવે છે. તેઓ એક સારા મિત્ર અને ખરાબ દુશ્મન તરીકે પણ ઓળખાય છે. કેટલાક તેમને મજબૂત નિર્ણયશક્તિવાળા માણસ તરીકે ઓળખે છે. ૬૮ વર્ષની વયના એન. શ્રીનિવાસન અત્યંત મહત્ત્વાકાંક્ષી છે. તેઓ ચેસ અને ગોલ્ફ રમવાના શોખીન છે. આ બધું હોવા છતાં તેઓ તેમના જ પરિવારમાંથી પેદા થયેલા દુશ્મનોનો સામનો કરી રહ્યા છે. એક તો તેમના જમાઈના કારણે વિવાદમાં ફસાઈ ગયા છે અને બીજી તરફ તેમનો પુત્ર અશ્વિન પણ તેમની સામે મેદાને પડયો છે. એન. શ્રીનિવાસનનો પુત્ર અશ્વિન ખુદ કહે છે : “મારો બનેવી ગુરુનાથ મય્યપન ખુદ સટોડિયો અને ફિક્સર છે. ગુરુનાથ ચેન્નાઈ અને દુબઈના બુકીઓ સાથે સંપર્ક ધરાવે છે. ગુરુનાથ અમારા કરતાં બીજી જ્ઞાાતિનો છે. અમે બ્રાહ્મણ છીએ. મારો બનેવી અને મારી બહેન રૂપા ધીમે ધીમે મારા પિતાના બિઝનેસ પર તેમનું સામ્રાજ્ય જમાવી રહ્યા છે. મારા પિતા જ્યારે પણ પરદેશ જાય ત્યારે દુબઈ એરપોર્ટ પર અવારનવાર કલાકો સુધી રોકાય છે. શા માટે ? મારા અને મારા પિતા વચ્ચેના મતભેદોનું કારણ પણ મારા બનેવી ગુરુનાથ દ્વારા મારા પિતાના કાનમાં રેડવામાં આવતું ઝેર જ છે. મારો બનેવી મને ‘હું ડ્રગ એડિક્ટ છું” એમ બધાને કહ્યા કરે છે, પણ હું તેના કરતાં વધુ ભણેલો અને અનુભવી છું.” ૨૦૦૨ પછી મેં ડ્રગ્સ લેવાનું છોડી દીધું . હું મારા યુરિન સેમ્પલનો રિપોર્ટ બતાવવા પણ તૈયાર છું. ગુરુનાથ અને મારી બહેન રૂપા એકબીજાના પ્રેમમાં પડયા ત્યારે મારા પિતા ખૂબ નારાજ હતા, કારણ કે અમે બ્રાહ્મણ છીએ અને ગુરુનાથ ચેટ્ટીયાર છે. મારી મા તો કાયમ માટે રૂપાને ઘરમાંથી કાઢી મૂકવા માગતી હતી, પરંતુ મારા પિતા રોજ રાત્રે સ્કોચ વ્હિસ્કીના પાંચ પેગ ચડાવી રોજ ગુરુનાથને ગાળો બોલતા હતા, પણ બીજા દિવસે ગુરુનાથના પરિવાર સાથે ગોલ્ફ રમતા હતા.”

નેતાઓને પછડાટ

આવા એન. શ્રીનિવાસન ખુદ રાજકારણી ના હોવા છતાં તેમણે ક્રિકેટ ગ્રાઉન્ડની બહાર તમામ રાજકારણીઓને શિકસ્ત આપી છે. બુકીઓ સાથેના સંપર્કનો પર્દાફાશ થતાં જમાઈની ધરપકડ બાદ શ્રીનિવાસન પર શરદ પવાર, અરુણ જેટલી અને રાજીવ શુક્લાએ બીસીસીઆઈનું પ્રમુખપદ છોડી દેવા દબાણ પણ કર્યું અને રાજરમત પણ ખેલી. અરુણ જેટલી તો પ્રમુખ બનવાના અભરખાં સાથે કોલકાતા પહોંચી ગયા હતા, પરંતુ એક જ રાતમાં એન. શ્રીનિવાસને બોર્ડના બહુમતી સભ્યોને પોતાની ફેવરમાં કરી લઈ અરુણ જેટલીના મનસુબા પર પાણી ફેરવી દીધું. કેટલીકવાર રાજકારણીઓ કરતાં બિઝનેસમેન મોટી ગેમ ખેલી જતા હોય છે. નેતાઓની અને બીસીસીઆઇના બોસની જે કોઇ ગેમ હોય પણ એક વાત સ્પષ્ટ છે કે એન. શ્રી નિવાસન પર હવે દાગ લાગી ચૂક્યો છે. તેમનો જમાઇ ફિકસર પણ છે અને ડોન દાઉદના બુકીઓના સંપર્કમાં પણ હતો. બીસીસીઆઇ દેશની સર્વોચ્ચ ક્રિકેટ સંસ્થા છે. વિશ્વ ક્રિકેટને કંટ્રોલ કરવામાં પણ બીસીસીઆઇની મહત્ત્વપૂર્ણ ભૂમિકા હોય છે ત્યારે તેના પ્રેસીડેન્ટ એક ટીમના માલિક હોય, જમાઇ ફિકસર હોઇ અને પુત્ર પણ આરોપ લગાવતો હોય ત્યારે આ સંસ્થાની પારદર્શીતાને અને શુદ્ધતાને આંચ ના આવે તે માટે પણ શ્રી નિવાસને પદ છોડી દેવું જોઇએ.