Devendra Patel

Journalist and Author

Date: August 25, 2014

સાનિયા મિરઝાની બ્રાન્ડ સામે નેતાની માર્કેટિંગ વેલ્યૂ ઝીરો

દેશના નેતાઓને કશું કામ રહ્યું નથી. આમ પ્રજાના પ્રશ્નો ઉકેલવાના બદલે કયા શહેરનું નામ શું રાખવું, કયા રાજ્યનું નામ શું રાખવું,કઈ યોજનાને કોનું નામ આપવું અને કયા રાજ્યમાં કોને બ્રાન્ડ એમ્બેસેડર ન બનાવવા ? આવા વાહિયાત અને એબ્સર્ડ મુદ્દાઓ પર જ વિવાદ સર્જવામાં રસ છે. તેલંગાણાના મુખ્યમંત્રી ચંદ્રશેખર રાવે ટેનિસ સ્ટાર સાનિયા મિરઝાને તેલંગાણાની બ્રાન્ડ એમ્બેસેડર બનાવવાની જાહેરાત કરતાં જ ભાજપના નેતા કે. લક્ષ્મણ મેદાનમાં કૂદી પડયા અને એ વાતનો વિરોધ કરતાં કહ્યું કે, “સાનિયા મિરઝા તો મહારાષ્ટ્રમાં જન્મી હતી, પાછળથી હૈદરાબાદમાં આવીને વસી ગઈ તેથી તે ‘બહારની’ છે અને હવે પાકિસ્તાનની વહુ છે.” કે. લક્ષ્મણના આ નિવેદનનો વિરોધ કરતાં સાનિયાએ કહ્યું કે, “મારું પરિવાર એક સદી કરતાં પણ વધુ વર્ષથી હૈદરાબાદમાં વસે છે. મને’બહારની’ કહેવું તે નીંદનીય છે. મેં પાકિસ્તાનના ખેલાડી શોએબ મલિક સાથે શાદી કરી છે, પરંતુ હું ભારતીય છું અને મૃત્યુપર્યંત ભારતીય રહીશ.”

મોદીએ શરીફને બોલાવ્યા

સાનિયા મિરઝાને તેલંગાણાની બ્રાન્ડ એમ્બેસેડર બનાવવાના વિરોધમાં ભાજપના નેતા કે. લક્ષ્મણે જે વિરોધ કર્યો છે તેની સાથે તેમની પાર્ટીના લોકો પણ ભાગ્યે જ સંમત હશે. પક્ષના દિલ્હીના નેતાઓનાં જે બયાન આવ્યા છે તે જોતાં લાગે છે કે, પક્ષ આ વિવાદમાં બહુ ઊંડો ઊતરવા માગતો નથી. હા, સંઘના કોઈ કટ્ટરવાદી નેતાઓ કે. લક્ષ્મણની વાત સાથે સંમત હોઈ શકે છે, પરંતુ જે પક્ષ આજે કેન્દ્રમાં સત્તા પર છે તે આવું બેજવાબદાર વલણ અખત્યાર કરી શકે નહીં. જે રીતે પાકિસ્તાનમાં એક વર્ગ છે જે હંમેશાં ભારત વિરોધી બયાનો કરીને રાષ્ટ્રપ્રેમી તરીકે ઓળખાવા માગે છે તે રીતે ભારતમાં પણ આવા છૂટાછવાયા નેતાઓ છે જેઓ પાકિસ્તાનના નામ માત્રનો વિરોધ કરી પોતાની જાતને દેશભક્ત કહેવરાવવા માગે છે. એ તો સારી વાત છે કે, ભાજપની જ બનેલી કેન્દ્ર સરકારના વડા પ્રધાન નરેન્દ્ર મોદીએ સૂઝબૂઝ વાપરીને તેમના શપથ ગ્રહણ સમારંભમાં પાકિસ્તાનના વડા પ્રધાન નવાઝ શરીફને નવી દિલ્હી બોલાવ્યા હતા.

દીકરી એ દીકરી છે

ભાજપના નેતા કે. લક્ષ્મણને સાનિયા મિરઝાના નામ સામે વાંધો એટલા માટે છે કે, તેણે પાકિસ્તાની ક્રિકેટર શોએબ મલિક સાથે લગ્ન કર્યાં છે અને તે હવે પાકિસ્તાનની વહુ છે. આ વિચારધારા જૂનવાણી અને વામણી છે. સાનિયા પાકિસ્તાનની વહુ થઈ છે તેથી તે ભારતની દીકરી મટી જતી નથી. દીકરી તો દીકરી જ રહે છે. એ પરાયું ધન થાય એટલે તે જન્મ આપનાર માતા-પિતાની દીકરી મટી જતી નથી. એ જ રીતે કોઈપણ રાજ્યના બ્રાન્ડ એમ્બેસેડર બનવા માટે જે તે સેલિબ્રિટી એ જ રાજ્યની વતની હોય તે જરૃરી નથી. અમિતાભ બચ્ચને ગુજરાતના બ્રાન્ડ એમ્બેસેડર બનીને ગુજરાતની ખુશ્બૂનો આખા દેશમાં પ્રચાર કર્યો,પણ અમિતાભ બચ્ચન તો મૂળ અલ્હાબાદના છે અને વર્ષોથી મુંબઈમાં સ્થાયી થયા છે. તેમ છતાં નરેન્દ્ર મોદીએ તેમને ગુજરાતના બ્રાન્ડ એમ્બેસેડર બનાવ્યા હતા. તેની સામે સાનિયા મિરઝાના તો દાદાઓ જ નહીં, પણ વડદાદાઓ પણ વર્ષો પહેલાં હૈદરાબાદમાં સ્થાયી થયા હતા. સાનિયા મિરઝાની લોકપ્રિયતા માત્ર દેશમાં જ નહીં, પરંતુ વિશ્વભરમાં છે. જો ભાજપના નેતા કે. લક્ષ્મણ એકલા જ દેશભક્ત છે તો તેમણે જ તેલંગાણાના મફતમાં બ્રાન્ડ એમ્બેસેડર બની જવાની જરૃર હતી. કે. લક્ષ્મણને આજે પણ કોઈ ઓળખતું નથી. તેઓ સાનિયા મિરઝાનો વિરોધ કરીને જ જાણીતા થયા છે. તેઓ દેશભરમાં જાણીતા થયા તે માટે પણ તેમણે સાનિયા મિરઝાનો આભાર માનવો જોઈએ. તેલંગાણામાં ટુરિસ્ટ્સને કે મૂડીરોકાણકારોને ખેંચી લાવવા હોય તો સાનિયા મિરઝા સામે કે. લક્ષ્મણની વેલ્યૂ ઝીરો છે.

રાષ્ટ્રીયતા બદલી નથી

સાનિયા મિરઝા ભારતની સૌથી વધુ સફળ મહિલા ટેનિસ ખેલાડી છે. તેની એટીપી રેંકિંગ જેટલી હતી એટલી આજ સુધી કોઈપણ ભારતીય મહિલા મેળવી શકી નથી. ટેનિસ દ્વારા પોતાની સ્વતંત્ર પહેચાન બનાવનાર સાનિયા મિરઝાએ શાદી પછી નથી તો પોતાનું નામ બદલ્યું કે નથી તો રાષ્ટ્રીયતા. સાનિયા મિરઝાએ હજુ સુધી પાકિસ્તાનની રાષ્ટ્રીયતાનો સ્વીકાર કર્યો નથી. તેનો પાસપોર્ટ પણ ભારતીય છે અને નિઃસંદેહ તે ભારતીય છે. સાનિયાએ કહ્યું છે કે, “હું મૃત્યુપર્યંત ભારતીય રહીશ.” આથી વધુ સાનિયાની ભારતીયતા માટેની બીજી કસોટી શું હોઈ શકે ? આમ પણ બ્રાન્ડ એમ્બેસેડર એ કોઈ બંધારણીય હોદ્દો નથી કે જેના માટે નાગરિકતા સૌથી અહમ મુદ્દો હોય છે. સૌથી મોટી નોંધપાત્ર વાત એ છે કે, ટેનિસ સ્ટાર સાનિયા મિરઝાને તેલંગાણાની બ્રાન્ડ એમ્બેસેડર બનાવવા સામે રાજ્યના એક પણ ખેલાડીએ કે રમતગમતના મંડળે વિરોધ કર્યો નથી. બલ્કે આવી ટીકા રાજકારણી તરફથી જ આવી છે તેથી મનપસંદગીના યુવક સાથે માત્ર લગ્ન કરવાના કારણે જ તેને પાકિસ્તાની કહી સાનિયાને રડાવી દેવાનું કામ ભારતના આવા ક્ષુલ્લક રાજકારણીઓ કરી રહ્યા છે. આ બેજવાબદાર નેતાઓને એ વાતની ખબર નથી કે તેલંગાણા તાજું જ જન્મેલું રાજ્ય છે. તેને પગભર થવા માટે મૂડીરોકાણકારોની કેન્દ્રની મદદની અને દેશ-દુનિયાના લોકોની જરૃર છે. તેલંગાણા તરફ ધ્યાન કેન્દ્રિત કરવા માટે સાનિયા મિરઝાથી શ્રેષ્ઠ બ્રાન્ડ એમ્બેસેડર બીજી કોઈ વ્યક્તિ હોઈ શકે નહીં. કારણ કે સાનિયા મિરઝા ખુદ હૈદરાબાદની છે. તેમના જ રાજ્યની દીકરી છે. ભાજપાના કે. લક્ષ્મણ જેવા બેજવાબદાર નેતાના વિરોધના કારણે તો જે ઇન્વેસ્ટર્સ તેલંગાણા જવા માગતા હશે તેઓ પણ વિચાર માંડી વાળશે. ઉદ્યોગકારોને કોમી ઉશ્કેરણી કરનાર નેતાઓના સંવેદનશીલ રાજ્યોમાં વેપારધંધા કે ઉદ્યોગો નાખવામાં કોઈ જ રસ હોતો નથી.

અસલી પ્રશ્નો કયા ?

દેશમાં આવી સંકુચિત વિચારધારાવાળા નેતાઓ અનેક છે. જે પ્રશ્ન જ નથી તેને પ્રશ્ન-સમસ્યા બનાવી રહ્યા છે. તેલંગાણાની સમસ્યા છે ગરીબી, બેકારી, ભૂખમરો અને વિકાસ. દેશના રાજનેતાઓએ આવી ગંભીર સમસ્યાઓ પરત્વે ધ્યાન આપવું જોઈએ. આવો વ્યર્થ વિવાદ કરવાથી તો તેઓ તેમના રાજ્યને જ નુકસાન પહોંચાડી રહ્યા છે. કોઈને મહારાષ્ટ્ર ભવનમાં ખાવાનું સારું મળતું નથી તે સામે વાંધો છે તો કોઈને રાજ્યનો પ્રચાર કરનાર સેલિબ્રિટી સામે વાંધો છે. આ બધા પ્રશ્નો આંધ્ર અને તેલંગાણાની કે મહારાષ્ટ્રની પ્રજાના નથી. નેતાઓએ આંધ્ર અને તેલંગાણાના વિભાજનથી જે સમસ્યાઓ પેદા થઈ છે તેની તરફ ધ્યાન આપવું જોઈએ. દેશનું નામ ઊંચું કરનારી દેશની બેટીને પરાઈ કહેવાવાળા તેમની સંકુચિત માનસિકતા જ દર્શાવે છે. તેલંગાણાને સાનિયા મિરઝાની જરૃર છે, આપણા નેતાઓની નહીં.

રાજ્યોની પ્રજાની અસલી સમસ્યાઓ પર ધ્યાન આપવાના બદલે નેતાઓ નવા પ્રશ્નો ઊભા કરે છે

એની નજર રાજકુમારી પરથી હટીને તેની દીકરી પર હતી

રાજકુમારી અને કોમલ- એ મા- દીકરી હતાં. કાનપુરમાં રહેતા ગુપ્તા પરિવારમાં બે દીકરીઓ જન્મી હતી. મોટી દીકરીનું નામ શિવકુમારી અને નાની દીકરીનું નામ રાજકુમારી. વયસ્ક થતાં મોટી દીકરી શિવકુમારીને ઉમાશંકર ગુપ્તા નામના ડ્રાઈવર સાથે પરણાવી દેવાઈ. પરંતુ એક અકસ્માતમાં શિવકુમારીનું મોત થતાં નાની દીકરી રાજકુમારીને પણ ઉમાશંકર સાથે પરણાવી દેવાઈ.

ઉમાશંકર ટ્રક ચલાવતો હોઈ આખું અઠવાડિયું બહાર રહેતો હતો. તેની પત્ની રાજકુમારી અત્યંત ખૂબસૂરત હતી. તેને સુંદર દેખાવાનો બેહદ શોખ હતો. ફેશનપરસ્ત પણ હતી. તે બહાર નીકળતી તો કેટલાંયે યુવાનો તેની સાથે વાત કરવા પ્રયાસો કરતા. ધીમે ધીમે તે બે દીકરીઓની માતા પણ બની ગઈ.

એક દિવસ નક્કી કરેલા દિવસ કરતાં આગળના દિવસે ઉમાશંકર મોડી રાત્રે ઘેર આવ્યો હતો. રાજકુમારી ઘરના બેડરૃમમાં એક યુવાન સાથે અજુગતી હાલતમાં રાત્રી પોષાકમાં હતી. બંને નાની દીકરીઓ બીજા રૃમમાં સૂતી હતી. એણે એ રાત્રે જ પત્ની રાજકુમારીને બંને પુત્રીઓ સાથે ઘરની બહાર કાઢી મૂકી.

થોડાક સમય માટે રાજકુમારી પિયરમાં રહી પરંતુ તેની ચાલચલગતના કારણે માતા-પિતાએ પણ તેને તેની બે દીકરીઓ સાથે ઘરની બહાર કાઢી મૂકી. હવે તે કાનપુરના એક અંતરિયાળ વિસ્તારમાં ભાડાનું મકાન લઈ દીકરીઓ સાથે રહેવા લાગી. દિવસે તે રેલવે સ્ટશને જઈ ગુટકા વેચતી. અહીં પણ એ યુવાનોને પોતાના હસીન સ્વરૃપથી આકર્ષતી. ગુટકા વેચવાની સાથે સાથે પોતાના શરીરના પ્રદર્શન દ્વારા એણે કેટલાયે યુવાનોને પોતાને દિવાના બનાવી દીધા હતા. તેની દીકરીઓ પણ હવે મોટી થવા લાગી હતી.

પાન-મસાલા વેચતાં વેચતાં તે તેને મનપસંદ યુવકને શિકાર બનાવતી. એ રીતે એનું ઘર ચાલતું. એક દિવસ રેલવે સ્ટેશન પર સંદીપ દીક્ષિત ઉર્ફે નેતા નામના યુવાન સાથે તેનો સંપર્ક થયો. સંદીપ દીક્ષિત તેને જોતાં જ રાજકુમારીના પ્રેમમાં પડી ગયો. સંદીપ દીક્ષિત રોજ રાત્રે તેના ઘેર આવવા લાગ્યો. સંદીપ હૃષ્ટપુષ્ઠ અને દેખાવડો હતો. રાજકુમારીને તે ગમી ગયો હતો. રાજકુમારી પણ બે દીકરીઓની મા હોવા છતાં જબરદસ્ત આકર્ષક લાગતી હતી. બંને વચ્ચે અનૈતિક સંબંધો બંધાયા. હવે સંદીપ દીક્ષિત નિયમિત રીતે રાજકુમારીના ઘરે આવવા લાગ્યો. બંને દીકરીઓ પણ તેને પિતા સમજવા લાગી હતી. સમય વીતતો ગયો.

રાજકુમારીની મોટી દીકરી રીના હવે ૧૬ વર્ષની થઈ ગઈ. તે હવે યુવાનીના ઉંબરે ઊભી હતી. સંદીપ દીક્ષિત ઉર્ફે નેતાની નજર હવે મા પરથી હટીને તેની દીકરી રીના પર સ્થિર થઈ. રોજ કોઈને કોઈ બહાને તે રીનાને સ્પર્શી લેતો. વળી રીના પણ હવે સમજણી થઈ ગઈ હતી. તે પણ માતાના સંદીપ દીક્ષિત સાથેના અવૈદ્ય સંબંધો વિશે જાણતી હતી. એ ચોરી છૂપીથી ઘણું બધું જોઈ ગઈ હતી.

એક દિવસ રાજકુમારી બીમાર હતી. સંદીપ દીક્ષિત તેના માટે દવા લેવા ગયો. સાથે ઊંઘની ગોળીઓ પણ લેતો આવ્યો. તેણે રાજકુમારીને દવાની સાથે ઊંઘની ગોળીઓ પણ ખવરાવી દીધી. રાજકુમારી થોડી જ વારમાં ઊંઘી ગઈ એટલે થોડી જ વારમાં સંદીપ દીક્ષિત બાજુના રૃમમાં સૂતેલી રીના પાસે પહોંચી ગયો. એ રીનાને સ્પર્શ્યો. રીના જાગી ગઈ. તે ચીસ પાડવા જતી હતી ત્યાં જ સંદીપે એનું મોં દબાવી તેને પાશમાં લઈ લીધી. રીનાને એક વિચિત્ર અહેસાસ થયો. રીનાને બધું ગમવા લાગ્યું. એ થોડીક જ ક્ષણોમાં વિહ્વળ થઈ. સંદીપને વળગી રહી. બીજા દિવસે રાતની ઘટનાની કોઈ ફરિયાદ માનેે કે નાની બહેન કોમલને કરી નહીં.

એ રાત પછી સંદીપ દીક્ષિત રોજ રાજકુમારી માટે ઊંઘની ગોળીઓ લઈ આવતો. ચાની સાથે તેને ઊંઘની ગોળીઓ પીવરાવી દેતો. રાજકુમારી ઊંઘી જતી અને તે તેની પુત્રી રીના પાસે પહોંચી જતો. રીના સાથે સંબંધ બંધાયા બાદ તે રાજકુમારીથી દૂર ભાગવા લાગ્યો. રાજકુમારીને હવે શક પણ થવા લાગ્યો હતો. તેને પુત્રી રીનાની ગતિવિધિ પર શક થયો. એક દિવસ ખુદ રીનાએ જ કહ્યુંઃ ”મમ્મી! બે મહિનાથી મને….”! રાજકુમારી સ્તબ્ધ થઈ. રીનાના ઉદરમાં બે માસનો ગર્ભ હતો. રીનાએ કબૂલ કર્યુંઃ ”હા… મમ્મી મારા પેટમાં સંદીપનું બાળક છે.”

આ સાંભળતા જ રાજકુમારીએ માથું પટક્યું. એ પ્રેમી કેવો જે મા અને દીકરી સાથે સંબંધ રાખે? તેને ખ્યાલ આવી ગયો કે ”મેં ઘરમાં સંદીપ નામનો સાપ જ પાળ્યો છે, જેણે મારી દીકરીને પણ ડંસી લીધી.” રોજની જેમ રાત્રે સંદીપ ઘરે આવ્યો ત્યારે રાજકુમારીએ એની સાથે ખૂબ ઝઘડો કર્યો અને બૂમરાણ મચાવી તેને ઘરમાંથી બહાર ચાલ્યા જવા કહ્યું. એ સાંભળ્યા બાદ સંદીપ દીક્ષિતે ઠંડા કંલેજે કહ્યુંઃ ”બૂમો પાડવાનો કોઈ અર્થ નથી. તારી જ આબરૃ જશે.”

રાજકુમારીને લાગ્યું કે, સંદીપની વાત સાચી છે. બૂમરાણ મચાવવાથી દીકરીની જ આબરૃનું લીલામ થશે અને પોતાના સંદીપ સાથેના નાજાયજ સંબંધોની પોલ પણ ખૂલી જશે. છેવટે સંદીપ અને રાજકુમારીએ મળીને એવો રસ્તો શોધી કાઢયો કે, રીનાને ગર્ભપાત કરાવી તેનું લગ્ન ક્યાંક કરાવી દેવું. સંદીપ દીક્ષિત ખુદ એક ગુનેગાર વૃત્તિ ધરાવતો શખ્સ હતો. તેણે એના જ ગોવિંદ દુબે નામના ગુનેગાર મિત્ર સાથે રીનાને પરણાવી દીધી. એ પહેલાં રીનાનો ગર્ભપાત પણ કરાવી દીધો. રીના હવે ગોવિંદ દુબેના ઘરે રહેવા જતી રહી.

રીનાનો પ્રશ્ન હલ થઈ જતાં સંદીપ દીક્ષિત ફરી રાજકુમારી સાથે રહેવા લાગ્યો. રીના જતી રહેતાંં રાજકુમારી હવે નિશ્ચિંત હતી. એ વખતે તેની નાની પુત્રી કોમલ કે જે હવે ૧૬ વર્ષની થઈ ચૂકી હતી તે હવે રામદુલારી સ્કૂલમાં નવમા ધોરણમાં ભણતી હતી. સંદીપ દીક્ષિતની નજર હવે યુવાનીમાં ડગલાં માંડી રહેલી કોમલ પર પડવા લાગી. એક બે વાર રાજકુમારીની ગેરહાજરીમાં તેણે કોમલને સ્પર્શવા પ્રયાસ કર્યો પરંતુ કોમલે દૂર રહી જઈને સાંજે માંને ફરિયાદ પણ કરી દીધી.

રાજકુમારી તો પહેલાંથી જ સંદીપ પર નારાજ હતી. નાની દીકરી કોમલની ફરિયાદ બાદ તેનું કલેજું કાંપી ઊઠયું. તેણે સખ્ત શબ્દોમાં સંદીપને કહી દીધુંઃ ”મારી નાની દીકરી કોમલથી સો ગજ દૂર રહેજે.” સંદીપ એવી ચેતવણીઓ સાંભળી માત્ર સ્મિત કરતો. અલબત્ત રાજકુમારી હવે સંદીપ પર નજર રાખવા લાગી. તે કોમલને કદી એકલી પડવા દેતી નહીં, તેના બદલામાં સંદીપે રાજકુમારીને ઘર ચલાવવા પૈસા આપવાનું બંધ કરી દીધુંઃ રાજકુમારી ઘર ચલાવવા ફરી પાન-મસાલા વેચવા લાગી. સ્કૂલ છૂટી જાય તે પછી તે કોમલને પણ પોતાની સાથે રેલવે સ્ટેશન પર લઈ જતી.

આ બધી જ સતર્કતાઓ પછી પણ સંદીપ દીક્ષિત કોમલને પોતાની હવસનો શિકાર બનાવવાની તક શોધતો હતો. રાજકુમારી પણ સંદીપ દીક્ષિતથી દૂર રહેવા લાગી. કોઈવાર સંદીપ રાત્રે આવી જતો પણ રાજકુમારી પણ હવે સંદીપને પોતાના શરીરને સ્પર્શવા દેતી નહીં. એક દિવસ તો તેનું અપમાન કરીને રાજકુમારી સંદીપને ઘરની બહાર કાઢી મૂક્યો. સંદીપ સમસમીને ચાલ્યો ગયો.

આ વાતને કેટલાક દિવસો વીત્યા. સંદીપે રાજકુમારીના ઘરે આવવાનું બંધ કરી દીધું.

દિવસો વીતતા રહ્યા.

એક દિવસ નોબસ્તા વિસ્તારના પોલીસ સ્ટેશને કોઈકે માહિતી આપી કે, સિમરા ગામ પાસે એક બંધ બોરી પડી છે. તેમાં લાશ હોય તેમ લાગે છે. પોલીસ ઘટના સ્થળે પહોંચી ગઈ. એ બોરીનું મોં ખોલ્યું તો તેની અંદર એક અર્ધનગ્ન કિશોરીની લાશ હતી. એની વય ૧૬ વર્ષની લાગતી હતી.

એની થોડી વાર જ પછી પોલીસને બીજી માહિતી મળી કે કુંજ બિહાર પાસે ૨૧ નંબરના પુલિયા પાસે એક મહિલાની લાશ પડી છે. પોલીસે એ સ્થળે જઈને જોયું તો પોલિથિલીન બેગમાં એક મહિલાની લાશ પડેલી હતી. તેની બાજુમાં યાત્રી પાન મસાલાની કંપનીની બેગ પડેલી છે. મૃત મહિલાની ઉંમર ૩૫ વર્ષની લાગતી ગતી. બંને લાશો પોસ્ટમોર્ટમ માટે મોકલી દેવામાં આવી. કાનપુરના દક્ષિણ ઈલાકામાં વાત ફેલાઈ ગઈ કે જે લાશો મળી છે તે મા- દીકરીની જ છે. પોલીસે બાતમીદારોને કામે લગાડયા. તરત જ માહિતી બહાર આવી કે સંદીપ દીક્ષિત ઉર્ફે નેતા નામનો ગુનેગાર રોજ રાત્રે જે ઘરમાં જતો હતો તે ઘર બંધ છે. તેમાં રહેતી રાજકુમારી અને તેની પુત્રી કોમલ ગૂમ છે.

બીજી બાજુ માનું ઘર બંધ જોઈ મોટી દીકરી રીનાને પણ શંકા ગઈ. એ સીધી પોલીસ સ્ટેશને ગઈ. હોસ્પિટલના શબ-રૃમના જઈ એણે મા રાજકુમારી અને બહેન કોમલના મૃતદેહોને ઓળખી કાઢયા. એણે બયાન આપ્યું ઃ ”આ કામ સંદીપ દીક્ષિત ઉર્ફે નેતાનું જ હોવું જોઈએ.”

પોલીસે ભારે જહેમત બાદ સંદીપ દીક્ષિતને પકડી લીધો. સંદીપ દીક્ષિત બોલ્યોઃ ”જે સ્ત્રીઓ મને સરેન્ડર ના થાય તેમની આ જ હાલત હું કરું છું. હું રાજકુમારીથી ધરાઈ ગયો હતો અને કોમલને ભોગવવા માંગતો ગતો. બંનેનો એ સામે વિરોધ હતો તેથી મેં જ એ બંનેને પતાવી દીધી છે.”

પોલીસ સંદીપ દીક્ષિતનું બયાન સાંભળી સ્તબ્ધ થઈ ગઈ.

– દેવેન્દ્ર પટેલ

મને ભજતાં મારા ભક્તોનો વિનાશ હું કદી થવા દેતો નથી

ભગવાન વિષ્ણુ શેષનાગની શય્યા પર બિરાજમાન છે, ત્યાં પૃથ્વી માતા આવીને બે હાથે પ્રણામ કરીને કહે છે : “હે પ્રભુ! હવે હું દુઃખોનો ભાર સહન કરી શકતી નથી. મારી કૂખે પાકેલી પુરુષ અને સ્ત્રીઓની નવી પેઢી પાપાચારમાં ડૂબી ગઈ છે, શાસકો સ્વાર્થી બન્યા છે, સત્તાના મદમાં મારાં સંતાનોને રંજાડે છે, ધર્મને અવગણે છે. પાપાચારી રાજકર્તાઓ બળજબરી અને કપટથી સ્ત્રી-પુરુષોને ભોળવે છે. સંતોને પણ વિડંબના કરે છે. હું તો દુઃખી દુઃખી થઈ ગઈ છું.”

ભગવાન નારાયણે કહ્યું :”પુત્રી! તેં મને જે કહ્યું તે બધું હું જાણું છું, તું નિર્ભય બન. મેં તને જે વચન આપ્યું છે તે વચનને હું બંધાયેલો છું,જ્યારે જ્યારે ધર્મ ગ્લાનિ પામે છે ત્યારે ત્યારે અધર્મનો વિનાશ કરવા હું પૃથ્વી પર અવતાર ધારણ કરું છું. મારા ભક્તોનો વિનાશ કદાપિ શક્ય નથી : હવે હું જરૃર આવીશ! “

એ દ્વાપર યુગનો સમય હતો જ્યારે યાદવો યમુના નદીના ફળદ્રૂપ તટ પર આવીને વસ્યા હતા. એ વિસ્તાર વ્રજભૂમિ તરીકે જાણીતો હતો. એ કાળમાં ભારતમાં મથુરા ખાતે રાજા ઉગ્રસેનનો પુત્ર કંસ એક ઉદ્ધત અને અભિમાની રાજા હતો. એક વાર નારદ મુનિ કંસ પાસે આવ્યા અને પાપના માર્ગથી પાછા વળવા કંસને સમજાવ્યો. એ સાંભળી કંસે કહ્યું : “મુનિવર, મને ઈશ્વરનો ભય નથી, હું કોઈનું બંધન સ્વીકારતો નથી.”

નારદજીએ મંદ સ્મિત સાથે કહ્યું : “વત્સ, ધર્મ અવિચલ છે, એનું ઉલ્લંઘન કરી શકાય નહીં, એટલું યાદ રાખજે કે જ્યારે જ્યારે ધર્મની ગ્લાનિ થાય છે ત્યારે ત્યારે તેની પુનઃસ્થાપના કરવા માટે ભગવાન પોતે પૃથ્વી પર અવતાર ધારણ કરે છે.”

કંસે અટ્ટહાસ્ય કર્યું : “મુનિવર, કોઈ પણ દેવ કે માનવીની મારી આડે આવવાની તાકાત નથી.”

કંસની આ ઉદ્ધત વાણી સાંભળી નારદજી બોલ્યા : “તારી શક્તિનો તને આટલોબધો ગર્વ છે પણ ઈશ્વરે તારો વિનાશ નિરમી જ દીધો છે, જા, તારા કાકાની પુત્રી દેવકીનું આઠમું સંતાન તારો સંહાર કરશે.”

એટલું કહી નારદમુનિ અંતર્ધાન થઈ ગયા અને ભગવાન નારાયણે કારાવાસમાં પુરાયેલી દેવકીની કૂખે જન્મ લીધો. તે પછી બાળકને યમુના પાર કરાવી નંદરાજાને ઘેર લઈ જવામાં આવ્યો. નંદની પત્ની યશોદાને લાંબા સમય બાદ પ્રથમ પ્રસૂતિએ તેની સ્થિતિ વિષમ બની ગઇ હતી. સંતાન જન્મ્યું ત્યારે પીડાને કારણે તે બેભાન બની ગઈ હતી. યશોદા સવારે જાગ્રત થઈ ત્યારે વસુદેવની પત્ની રોહિણીએ બાળક તેના હાથમાં મૂક્યું. એ બાળકને છાતીસરસું ચાંપતાં કહ્યું : ” મારા લાલ, મારા લાડકવાયા!”

ઋષિ ગર્ગાચાર્ય અને વસુદેવ ત્યાં આવ્યા. કુળપુરોહિતે બાળકના જન્માક્ષર બનાવ્યા હતા. તદ્નુસાર બાળકનું નામ ક, છ અને ઘ પર પાડવાનું હતું. કોઈ તેને ઘનશ્યામ કહે છે, તે પછી વ્રજમાં ગંર્ગાચાર્યે વિધિપુરઃસર બાળકનું નામ કૃષ્ણ પાડયું.

એ સિવાય પણ કૃષ્ણનાં અનેક નામો છે. તેમનાં અનંત રૃપો હોઈ કૃષ્ણ ‘અનંતરૃપ’ તરીકે ઓળખાય છે. તેમનો કદી પણ ક્ષય થતો ન હોવાથી ‘અચ્યુતા’ તરીકે ઓળખાય છે. વિના પ્રયત્ને દુશ્મનનો નાશ કરવાની ક્ષમતા ધરાવતા હોવાથી ‘અરિસૂદન’ પણ કહેવાય છે. ‘કૃષ્ણ’ એટલે કે કૃષ-એ સત્તાવાચક શબ્દ છે અને ણ-એ આનંદવાચક શબ્દ છે. એ બંને સત્તા અને આનંદની એકતા સૂચક જે પરબ્રહ્મ છે તે ‘કૃષ્ણ’ કહેવાય છે. ક-બ્રહ્મા અને ઈશને(શિવને)વશમાં રાખનાર હોવાથી ‘કેશવ’ કહેવાય છે. ગો-એટલે વેદાંત વાક્યો જેના દ્વારા જાણી શકાય છે તેથી ‘ગોવિન્દ’ પણ કહેવાય છે. દુષ્ટજનોને તેઓ પીડતા હોવાથી ‘જનાર્દન’ કહેવાય છે. દેવતાઓમાં શ્રેષ્ઠ હોવાથી ‘દેવવર’ કહેવાય છે. ક્ષર અને અક્ષર, એ બંને પુરુષોથી જે ઉત્તમ છે તે કારણે તેઓ ‘પુરુષોત્તમ’ કહેવાય છે. મધુ નામના દૈત્યને હણ્યો હોવાથી મધુસૂદન કહેવાય છે. માયાના-લક્ષ્મીના પતિ હોવાથી ‘માધવ’ કહેવાય છે. યદુ કુળમાં જન્મેલા હોવાથી ‘યાદવ’ કહેવાય છે. વસુદેવના પુત્ર હોવાથી ‘વાસુદેવ’ કહેવાય છે. ઈન્દ્રિયોના ઈશ-સ્વામી હોવાથી ‘ઋષિકેશ’ કહેવાય છે. સંસારરૃપી દુઃખો હરતા હોવાથી ‘હરિ’ કહેવાય છે. આ સિવાય પણ તેઓ દામોદર, કુંજબિહારી, બાંકેબિહારી, મુરલીધર, યોગેશ્વર, વનમાળી, શ્રીનાથજી બાબા, રણછોડરાય, શામળિયો, દ્વારકાધીશ, ગિરિરાજધરણ, લાલજી અને ગોકુલેશનાં નામે પણ ઓળખાય છે.

શ્રીકૃષ્ણનો અર્થ એ પણ છે કે જેનામાં સામેની વ્યક્તિને આકર્ષવાની શક્તિ છે. બ્રહ્મા, વિષ્ણુ અને મહેશ એ ત્રણેય દેવોનું સ્વરૃપ એટલે જ પરબ્રહ્મ શ્રીકૃષ્ણ. સમગ્ર જગતના પરમવંદનીય હોય ‘શ્રી કૃષ્ણમ્ વંદે જગદ્ગુરુમ’ કહેવાય છે. શ્રીકૃષ્ણ માત્ર ઉપદેશક જ નથી, પરંતુ ઉમદા માનવીય જીવન જીવીને ઉત્કૃષ્ટ દાખલો પૂરો પાડયો છે. એક સામાન્ય માનવીની જેમ તેમણે પણ સુખ-દુઃખ ભોગવી પરિશ્રમ સાથે કર્મ કર્યાં છે. અલબત્ત, તેઓ ભગવાન હોવાથી તેમને કર્મ સ્પર્શતાં નથી. શ્રીકૃષ્ણનું જીવન બાળપણથી જ દુષ્ટોના સંહારક અને ક્રાંતિકારી બનીને ધર્મરાજ્યની સ્થાપના, સમાનતા, પુરાણી ખોટી માન્યતાઓને તોડીને નવરચના કરવામાં વ્યસ્ત રહ્યું હોવાનું જણાય છે. શ્રીકૃષ્ણ એક રાજનીતિજ્ઞા પણ છે, આદર્શ અર્થશાસ્ત્રી પણ છે, આદર્શ શિક્ષક પણ છે, આદર્શ ઉપદેશક પણ છે, આદર્શ પિતાતુલ્ય રાજા પણ છે. રાજધર્મ રૃપે મહાભારતમાં, પ્રેમપૂજારી તરીકે વ્રજમાં, ક્રાંતિકારી તરીકે ઈન્દ્રની પૂજા છોડીને ગોવર્ધનની પૂજા કરાવવાની ક્રિયામાં તેઓ અનોખા દેખાય છે. તેઓ લોકનાયક પણ છે, નિરાભિમાની પણ છે, નિર્વેર પણ છે, નિરૃપમ પણ છે અને નિષ્કલંક પણ છે.

શ્રીકૃષ્ણનું જીવન પારદર્શક છે. ત્રણ ભુવનના નાથ હોવા છતાં અર્જુનના સારથી બનવાનું પસંદ કરે છે. દ્વારકાધીશ હોવા છતાં સુદામા સાથેની મૈત્રી નિભાવે છે. જગદીશ હોવા છતાં યુધિષ્ઠિરનાં પગરખાં સાચવે છે. રાજવી હોવા છતાં પાંડવોના રાજસૂય યજ્ઞામાં ઘોડાઓને ચારો નાખે છે. સાક્ષાત્ નારાયણ હોવા છતાં બ્રાહ્મણોનાં એંઠાં પતરાળાં ઉપાડે છે અને છેલ્લે તેમના પગમાં તીર મારનાર પારધીને માફી આપતા કૃષ્ણ તેને છાતીએ વળગાડી મોક્ષ બક્ષે છે.

પૂજ્ય ડોંગરેજી મહારાજ કહે છે : “આધિભૌતિક, આધિદૈવિક અને આધ્યાત્મિક આ ત્રણેય પ્રકારના તાપનો નાશ કરનાર પરમાત્મા શ્રીકૃષ્ણનું જે શરણ લે છે તે જીવ ઈશ્વરનો થાય છે અને તે નિર્ભય બને છે. પરમાત્મા શ્રીકૃષ્ણનાં દર્શન કરવાથી માનવજન્મ સફળ થાય છે. ગમે તેવું સુંદર માનવસ્વરૃપ હોય પણ તેને તમે એક વાર જુઓ, બે વાર જુઓ, દશ વાર જુઓ પછી તેના પરથી મન હટી જશે પણ પરમાત્માનું સ્વરૃપ અતિ સુંદર છે, જેનું વર્ણન થઈ શકે તેમ નથી. કરોડો કરોડો કામદેવ કરતાં શ્રીકૃષ્ણ અતિ સુંદર છે. કરોડો કરોડો સૂર્ય કરતાં શ્રીકૃષ્ણ પ્રકાશમાન છે. કરોડો કરોડો ચંદ્ર કરતાં શ્રીકૃષ્ણ અતિ શીતળ છે. પરમાત્માનું વર્ણન કરતાં કરતાં વેદો પણ થાકી ગયા છે. તમે જેટલી વાર તેમનાં દર્શન કરો એટલી વાર નવો આનંદ આવે છે. દર્શન કરવાથી જે ધરાઈ જાય તે વૈષ્ણવ નહીં. પરમાત્માનું સ્વરૃપ નિત્ય નવીન છે.”

ભગવાન શ્રીકૃષ્ણ શ્રીમદ્ ભગવદ્ગીતાના ૯મા અધ્યાયમાં કહે છે : “ક્રતુ એટલે કે શ્રોતકર્મ હું છું. યજ્ઞા એટલે કે પંચમહાયજ્ઞા વગેરે સ્માર્તકર્મ હું છું. સ્વધા એટલે કે પિતૃઓને તર્પણરૃપે અપાતું અન્ન હું છું. ઔષધ હું છું, મંત્ર હું છું, ઘૃત હું છું, અગ્નિ હું છું અને હવનરૃપી ક્રિયા પણ હું જ છું. આ સકળ જગતને ધારણ કરનાર, કર્મોનાં ફળ આપનાર, માતા-પિતા, દાદા, જે જાણવાયોગ્ય છે તે તત્ત્વ, પવિત્ર ઁકાર તેમજ ઋગ્વેદ, યજુર્વેદ અને સામવેદ પણ હું છું. સહુનું ભરણપોષણ કરનાર, સહુના સ્વામી, શુભ-અશુભ જોનાર, સહુનું રહેઠાણ, શરણ લેવા યોગ્ય, પ્રત્યુષકાર, ઇચ્છયા વિના હિત કરનાર, સહુની ઉત્પત્તિ અને પ્રલયનો હેતુ પણ હું જ છું. હું જ સૂર્ય રૃપે તપું છું. હું જ વર્ષાને સમુદ્ર વગેરે સ્થાનોમાંથી ખેંચું છું અને વરસાવું છું. હું જ અમૃત અને મૃત્યુ છું તથા સત્-અસત્ પણ હું જ છું.”

ભગવાન શ્રીકૃષ્ણ કહે છે : “જે કોઈ ભક્ત મને પ્રેમથી પત્ર, પુષ્પ, ફળ, જળ વગેરે અર્પે છે એ શુદ્ધ બુદ્ધિના નિષ્કામપ્રેમી ભક્તનું પ્રેમપૂર્વક આપેલું એ પત્ર, પુષ્પ આદિ હું સગુણપણે પ્રગટ થઈને ઘણા પ્રેમથી આરોગું છું. હે કોન્તેય! તું જે કાંઈ કર્મ કરે છે, જે ખાય છે, જે હોમે છે, જે દાન કરે છે અને જે તપ કરે છે એ સઘળું મને અર્પણ કર. આ પ્રમાણે જેમાં સમસ્ત કર્માે મુજ ભગવાનને અર્પણ થાય છે એવા સંન્યા
સયોગથી મુક્ત થયેલા ચિત્તનો તું શુભાશુભ ફળરૃપી બંધનમાંથી છૂટી જઈશ અને મને જ પ્રાપ્ત કરીશ.”

શ્રીમદ્ ભગવદ્ગીતામાં શ્રીકૃષ્ણ કહે છે : ” જ્યારે જ્યારે પૃથ્વી પર ધર્મની ગ્લાનિ થાય છે ત્યારે ત્યારે પાપીઓનો વિનાશ કરવા અને ધર્મની સ્થાપના કરવા હું યુગે યુગે જન્મ લઉં છું.” ભગવાન શ્રીકૃષ્ણ ગીતાજીમાં કહે છેઃ ‘મારા જે ભક્તો કામ, ક્રોધ, લોભ, મોહ અને બીજી તમામ આસક્તિઓને છોડીને તથા કર્મના ફળનો ત્યાગ કરીને મને જ પામવા ભજે છે એવા ભક્તોનો હું કદી વિનાશ થવા દેતો નથી.’

– દેવેન્દ્ર પટેલ
www.devendrapatel.in

અમેરિકા આ પ્રશ્નોના જવાબ આપે

રેડ રોઝ : દેવેન્દ્ર પટેલ

ભારતના વડાપ્રધાન નરેન્દ્ર મોદીને અમેરિકાના પ્રેસિડેન્ટ બરાક ઓબામાએ વોશિંગ્ટન આવવા આમંત્રણ આપ્યું છે. કોંગ્રેસ (અમેરિકાની સંસદ)ના કેટલાંક સભ્યોએ સેનેટને સંબોધવા ઝુંબેશ ઉપાડી છે. આ આમંત્રણ પ્રેસિડેન્ટ બરાક ઓબામાના વ્યક્તિગત દૂત દ્વારા વડાપ્રધાનને રૂબરૂમાં પાઠવવામાં આવ્યું છે. વડાપ્રધાન નરેન્દ્ર મોદીએ આ આમંત્રણનો સ્વીકાર પણ કર્યો છે. ચાલો, સારી વાત છે,અમેરિકાને મોડેમોડે ડહાપણની દાઢ ફૂટી તો ખરી.

અમેરિકા વિશ્વનો સહુથી શક્તિશાળી દેશ છે. વિશ્વનો ૩૦૦ વખત નાશ કરી શકાય તેટલાં અણુઆયુધો તેની પાસે છે. અમેરિકાના પ્રેસિડેન્ટને વિશ્વનો ‘જમાદાર’ કહેવાય છે. વિશ્વના બીજા દેશોમાં અમેરિકાના પ્રેસિડેન્ટ ‘અંકલ સેમ’ તરીકે ઓળખાય છે. અમેરિકા લોકતાંત્રિક પણ વેપારી દેશ છે. રાજનીતિમાં ખંધો અને અત્યંત સ્વાર્થી દેશ છે. માનવ અધિકારની વાતો કરી નરેન્દ્ર મોદીને ૧૦ વર્ષ સુધી વિઝા આપવાનો ઈન્કાર કરનાર અમેરિકાને હિરોશીમા-નાગાસાકીમાં ૧૦ લાખ નિર્દોષ નાગરિકોને એટમ બોમ્બ ફેંકી પળભરમાં રાખ કરી દીધા હતા. વિયેતનામ પર અનેક બોમ્બ ઝીંકી હજારો વિયેતનામી લોકોને મારી નાખ્યા હતા. અમેરિકન સૈનિકોેએ સેંકડો વિયેતનામી સ્ત્રીઓને ગર્ભવતી બનાવી દીધી હતી. ઓઈલના રાજકારણને લીધે અમેરિકાએ ઇરાક પર બે બે વાર આક્રમણ કરી ૧૦ લાખ ઈરાકીઓની હત્યા કરી નાખી હતી. હવે ભારતમાં નરેન્દ્ર મોદીના નેતૃત્વ હેઠળ સ્થિર સરકારની સ્થાપના થઈ છે એટલે અમેરિકાએ તેનું અગાઉનું વલણ બદલીને વડાપ્રધાન નરેન્દ્ર મોદી માટે રેડ કાર્પેટ પાથરી દીધી છે.

મોદી માટે રેડ કાર્પેટનું કારણ?

અમેરિકાને ભારત એક મોટું બજાર દેખાય છે. અમેરિકા તેની ખરાબ આર્િથક મંદીમાંથી ગુજરી રહ્યું છે. અમેરિકન મોટરો કોઈ ખરીદતું નથી. ઈલેક્ટ્રોનિક્સ બજાર જાપાન, કોરિયા અને ચીને સર કર્યું છે. અમેરિકન લોકોનાં ઘરમાં સોની ટીવી કે ટોયોટો કાર જોવા મળે છે. અમેરિકન બાળકો રમકડાં પણ ચાઈનીઝ બનાવટનાં રમે છે. આવા અમેરિકાને ગ્રાહકો જોઇએ છે અને તે ભારતમાં છે. અમેરિકાના પ્રવાસે જતા પહેલાં વડાપ્રધાન એ વાતનો ખ્યાલ જરૂર રાખે કે, અમેરિકા પાકિસ્તાનને

અબજો ડોલરની સહાય કરી રહ્યું છે. એ સહાય પાકિસ્તાન તેના આર્િથક વિકાસના બદલે ભારત વિરુદ્ધ તેના લશ્કરી તંત્રને મજબૂત કરવા કરી રહ્યું છે. અમેરિકા પહેલાં પાકિસ્તાનને લોન પેટે અબજો ડોલર આપે છે અને તે પછી એ જ રકમ માંડવાળ કરી દે છે. ભારત દક્ષિણ એશિયામાં શક્તિશાળી રાષ્ટ્ર ના બને તે માટે તે પાકિસ્તાનનો ભારત સામે ચેક એન્ડ બેેલેન્સ તરીકે ઉપયોગ કરે છે.

એ જ રીતે અમેરિકા પર નાઈન ઈલેવનનો હુમલો કરાવનાર માસ્ટર માઈન્ડ ઓસામા બીન લાદેનને પાકિસ્તાને તેની જ ભૂમિ પર સંતાડયો હતો અને અમેરિકાની નેવી સીલ કમાન્ડોઝની ટીમે રાત્રી ઓપરેશન કરી ઓસામા બીન લાદેનને ખત્મ કરી નાખ્યો. ત્રાસવાદની નિકાસ કરનાર પાકિસ્તાન ભારતના મોસ્ટ વોન્ટેડ ગુનેગાર ડોન દાઉદ ઈબ્રાહીમને પણ પનાહ આપી રહ્યું છે. ભારતના વડાપ્રધાન વોશિંગ્ટન જાય ત્યારે તેમણે ખતરનાક ગુનેગાર દાઉદ ઈબ્રાહીમને ભારત લાવવા અમેરિકા દ્વારા પાકિસ્તાન પર દબાણ કરાવવાનો મુદ્દો પણ ઉઠાવવો જોઈશે. અમેરિકા ભારત સાથે મૈત્રી અને વ્યાપારી સંબંધો ઇચ્છતું હોય તો ભારતના દુશ્મનોને મદદ કરવાની બંધ કરવી જોઈશે.

અમેરિકાએ જે રીતે નરેન્દ્ર મોદીને વિઝા આપવા ઈન્કાર કર્યો હતો તે જ રીતે ગુજરાતથી અને દેશના અન્ય ભાગોમાંથી અમેરિકા જવા માંગતા અનેક ભારતીયોના વિઝા ઈન્કારવાનો અભિગમ અપનાવેલો છે. ઘણા ગુજરાતીઓ સાથે મુંબઈ ખાતેની અમેરિકી કોન્સ્યુલેટ કચેરીના ઈમિગ્રેશન અધિકારીઓનો વ્યવહાર રૂક્ષ હોય છે. આ મુદ્દો પણ ઉઠાવવો જોઈશે.

એથીયે વધુ ગંભીર બાબત તો અમેરિકાની ભારત પરની ગેરકાયદે જાસૂસીની છે. તાજેતરમાં જ અમેરિકાના જ અખબાર ‘ધી વોશિંગ્ટન પોસ્ટ’માં છપાયેલા એક અહેવાલ અનુસાર અમેરિકા વિશ્વના અનેક દેશોમાં કોઈનીય જાણ વિના જાસૂસી કરે છે. અમેરિકા પાસે વૈશ્વિક જાસૂસી માટે ‘નેશનલ સિક્યોરિટી સિસ્ટમ’ (એનએસએ)નામનું એક ટેક્નિકલ ડિપાર્ટમેન્ટ છે. આ સંસ્થાના એક પૂર્વ કોન્ટ્રાક્ટર દ્વારા કેટલાંક દસ્તાવેજો લીક કરવામાં આવ્યા હતા. તે દસ્તાવેજો વ્હિસલ બ્લોઅર તરીકે જાણીતા એડવર્ડ સ્નોડને આખા વિશ્વને લીક કરી અમેરિકાના જાસૂસીકાંડને ઉઘાડો પાડી દીધો છે. આ દસ્તાવેજોમાં એવો ઉલ્લેખ છે કે અમેરિકાની ફોરસ કોર્ટે અમેરિકન જાસૂસી સંસ્થા- ‘એનએસએ’ ને ભારતની ભારતીય જનતા પાર્ટી તથા વિશ્વની બીજી રાજકીય પાર્ટીઓ પર જાસૂસી કરવા ૨૦૧૦માં પરવાનગી આપી હતી. અમેરિકાને એવી દહેશત હતી કે, ભારતની મોટી રાષ્ટ્રીય એવી ભારતીય જનતા પાર્ટી કટ્ટરવાદી વિચારધારા ધરાવે છે. આવી શંકાના કારણે આ જાસૂસી કરવામાં આવી હતી. આ ઉપરાંત લેબેનોનની હેઝબોલ્લા કે જે અમોલ તરીકે પણ જાણીતી છે તે પાર્ટીની પણ જાસૂસી કરવામાં આવી હતી. અમેરિકા દેશની એક શક્તિશાળી પાર્ટી પર જાસૂસી કરતી હોવાની વાત બહાર આવ્યા બાદ ભાજપાના નેતાઓ તરફથી જે પ્રતિક્રિયા આવવી જોઈએ તે આવી નથી. ભારતની એ કમનસીબી છે કે આ દેશના લોકોને પહેલેથી જ ગોરી ચામડીના લોકોનું ઓબ્સેશન છે. ભારતના લોકો તીવ્ર બુદ્ધિશાળી હોવા છતાં ગોરા લોકોને પોતાનાથી વધુ ચડિયાતા માને છે. ભારત હજુ ગોરાઓથી પ્રભાવિત છે અને ગોરા લોકોની માનસિક ગુલામીમાંથી ભારતીયો હજુ બહાર આવ્યા નથી. અમેરિકાની પોતાની પ્રજાએ તેમની માનસિકતા બદલી છે અને આજે એક અશ્વેત વ્યક્તિ અમેરિકાના પ્રેસિડેન્ટ છે. ભારતે અમેરિકાથી ડર્યા વિના અમેરિકાને કયાં કારણોસર ભારતીય જનતા પાર્ટીની જાસૂસી કરી એ પ્રશ્નનો વોશિંગ્ટન પાસે જવાબ માંગવો જોઈએ. ભારત એક સ્વતંત્ર અને સાર્વભૌમ દેશ છે, હવે ગોરાઓનો ગુલામ નથી એ વાતની પ્રતીતિ વોશિંગ્ટનને કરાવવી જોઈએ.

એમ કહેવાય છે કે ૨૦૧૦ પછી અમેરિકાની ‘એનએસએ’ સંસ્થાએ ભાજપના ટોચના નેતાઓને જાસૂસીમાં આવરી લીધા હતા. આ ઘટના આંતરરાષ્ટ્રીય ડિપ્લોમસીનો રીતસરનો ભંગ છે. માત્ર ડિપ્લોમેટિક ધારાધોરણનો જ નહીં, પરંતુ ભારતના સાર્વભૌમત્વનો પણ ભંગ છે. એ વાત યાદ રહે કે અમેરિકન સંસ્થા ‘એનએસએ’ પાસે કોઈનીયે જાસૂસી કરવા તથા કોઈ પણ ટેલિફોન્સ કે ઈ-મેઇલ્સ આંતરવાની જબરદસ્ત ક્ષમતા છે. એનએસએ ૮૦ જેટલાં અમેરિકન કોર્પોરેશન્સ સાથે ગુપ્ત સંબંધો ધરાવે છે. ભારતમાં કામ કરતી અમેરિકી કંપનીઓ પણ અમેરિકાની આ જાસૂસી સંસ્થા માટે કામ કરતી હોઈ શકે છે. આવાં કોર્પોરેશન્સ સામાન્ય રીતે ટેલિકોમ જાયન્ટ્સ છે. આવી કંપનીઓના દરિયા નીચે નાખેલા કેબલ્સનો આ પ્રકારની જાસૂસી માટે ઉપયોગ થાય છે. અને તેઓ ઇચ્છિત વિશ્વ ડેટા હાંસલ કરી શકે છે. આ બધી મલ્ટિનેશનલ કંપનીઓ, સોફટવેર કંપનીઓ, હાર્ડવેર કંપનીઓ અને ઈન્ફર્મેશન ટેક્નોલોજી સાથે સંકળાયેલી કંપનીઓનો અમેરિકા ઉયયોગ કરે છે અને જરૂરી ડેટા મેળવી લે છે. આ એક પ્રકારની અમેરિકાની ભારતમાં અને બીજા દેશોમાં ગેરકાયદે ઘૂસણખોરી જ છે. અમેરિકા ખુદ સાઈબર ક્રાઈમ આચરી રહ્યું છે અને ભારતીય પ્રશાસન મૌન છે. આ પ્રશ્ન પણ ભારતીય વડાપ્રધાને વોશિંગ્ટન સમક્ષ ઉઠાવવો જોઈશે. એટલું જ નહીં પરંતુ અમેરિકા જેવા શક્તિશાળી દેશની સાયબર-જાસૂસી સામે ભારતે પોતાની ડિફેન્સ સિસ્ટમ પણ ઊભી કરવી પડશે.

વડાપ્રધાન નરેન્દ્ર મોદી આ પ્રશ્નો વોશિંગ્ટનમાં ઉઠાવે

www. devendrapatel.in

Powered by WordPress & Theme by Anders Norén